Ko e Foaki ʻo e Meʻaʻofa Lelei Tahá
ʻOku nofo e tokotaha naʻá ne faʻú ʻi Tekisisi, USA.
Naʻá ku ʻoange ki hoku kaungāmeʻá ʻa e meʻaʻofa lelei taha kuo faifaiangé peá ne maʻú.
Tā fakatātaaʻi ʻe Taia Morley
Ko e taimi naʻá ku taʻu 13 aí, naʻe kole ʻe he palōfitá ki he kāingalotu ʻo e Siasí ke nau lau e Tohi ʻa Molomoná ʻi he māhina ʻe ono, ki he ngataʻanga ʻo e taʻu ko iá, mo ne talaʻofa ha ngaahi tāpuaki ki heʻenau fai iá. Lolotonga ʻeku lau ia he pasí ʻi ha ʻaho ʻe taha, naʻe tangutu ha taʻahine ko Sinisia ʻi hoku tafaʻakí peá ne ʻeke mai pe ko e hā ʻa e tohí. Naʻá ku talaange ko e Tohi ʻa Molomoná pea ko ha tohi mahuʻinga. Naʻá ku talaange naʻá ku fie ʻosiki hono laú kimuʻa pea toki ʻosi ʻa e taʻú ka u lava ʻo maʻu ha ngaahi tāpuaki.
Naʻe kamata ke ne fai ha ngaahi fehuʻi lahi ange, peá u talaange te ne lava ʻo haʻu ki hoku ʻapí ka ma lava ʻo talanoa lahi ange ki ai. Naʻá ne tali ʻeku fakaafé, pea ne ma fakaʻaongaʻi ai ha ngaahi houa ʻi he ngaahi ʻaho hono hokó he talanoa ki he Tohi ʻa Molomoná mo e Siasí.
Naʻá ku fakaafeʻi hono fāmilí ʻi he Mōnite hokó ki he efiafi fakafāmili ʻi ʻapí, peá u fakafeʻiloaki ai ia ki he ongo faifekaú. Naʻá na kamata akoʻi ia ʻi he ngaahi lēsoní, pea kamata ke haʻu ki he lotú mo e ngaahi ʻekitivitī kotoa ʻa e toʻu tupú mo e ngaahi houalotu kehe kotoa ʻa e Siasí.
Naʻá ne fakakaukau ai kuó ne fie papitaiso, pea ʻi he fakangofua heʻene ongomātuʻá, naʻe papitaiso leva ʻi hono ʻaho fāʻeleʻí he taʻu ko iá. Naʻá ne pehē ko e meʻaʻofa lelei taha ia kuo faifaiange peá ne maʻú. Naʻe ʻi he ouau papitaisó ʻene faʻeé mo e fānaú. Naʻe kole mai ke u hivaʻi ʻa e “Ko e Laumālie ʻo e ʻOtuá” (Ngaahi Himi, fika 2), pea naʻá ne kole ʻeku tamaí ke ne fakahoko e papitaisó. Naʻá ma fāʻofua mo tangi ʻi he hili ʻo ʻene ʻalu hake mei he vaí. He ʻikai toe ngalo ʻiate au ʻa e ʻaho ko iá koeʻuhí he naʻá ku ongoʻi ha fiefia lahi fau.
Naʻe hiki homau fāmilí ʻi ha ʻosi ha taʻu ʻe taha mei ai. Naʻe faingataʻa koeʻuhí he ne u hoko mo Sinisia ko ha ongo kaungāmeʻa mamae mo e ongo tautehina ʻi he ongoongoleleí.
Neongo ʻoku ʻikai ke ma toe nofo vāofi, ka ʻokú ma kei hoko pē ko e ongo kaungāmeʻa lelei. ʻOkú ma faʻa talanoa ʻi he telefoní, pea naʻe telefoni mai kimuí ni ke talamai ʻoku fanongo ʻene faʻeé ki he ngaahi lēsoni fakafaifekaú. ʻOku ʻai ʻe he meʻá ni ke u fiefia koeʻuhí he naʻe ʻikai fie fanongo ʻene faʻeé kimuʻa ai ki he ngaahi lēsoní. Naʻe talamai ʻe Sinisia ʻoku fakaʻamu ke ʻalu ʻi ha ʻaho ki he lotú mo hono fāmilí kotoa. Naʻe fakamālō mai ʻi heʻeku fakafeʻiloaki ange ki ai ʻa e Siasí.