Naʻe folofola ʻa e Fakamoʻuí ko e laumālie ʻo e fakakikihí ʻoku ʻo e tēvoló (vakai, 3 Nīfai 11:29). Ko e hā ʻa e faikehekehe ʻo e taʻe loto tataú mo e fakakikihí?
ʻOku anga maheni pē ke kehekehe ʻa e fakakaukau ʻa e kakaí, pea ʻoku ʻi ai e taimi ʻoku fie maʻu ai e kau ākonga ʻa Sīsū Kalaisí ke nau taukaveʻi ʻi he ʻao ʻo e filí ʻa e meʻa ʻoku tau tui ki aí. Ka ʻoku fie maʻu ke tau fakahaaʻi mahino hotau tuʻungá ʻi ha founga lelei mo moʻoni kae ʻikai ʻita, loto tāufehiʻa, pe fakatupu ʻita. ʻOku tau fakaʻehiʻehi fēfē mei he fakafekikí?
Mahalo kuo mou ʻosi fanongo ʻe lava pē ke “kehekehe hotau lotó kae ʻikai fakafekiki,” ʻOku kamata ʻa e fakaʻehiʻehi mei he fakafekikí ʻi hoʻo ngaahi taumuʻá mo e fakaʻamú. ʻOku pehē ʻe he folofolá “oku tupu ʻi he fie lahí ʻa e fakakikihí” (Lea Fakatātā 13:10). Kapau ʻokú ke tokanga lahi “ke ikunaʻi ha fakakikihi” pe “ke ke tonu,” ʻoku mahino ʻe muiaki mai ai ʻa e laumālie ʻo e fakakikihí.
Kuo ʻosi akoʻi ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi founga ke fakaʻehiʻehi ai mei he fakafekikí: (1) “fakahaaʻi ha ʻofa ki he niʻihi kehé”; (2) “puleʻi ʻa e ongoʻi ke lea pe tohi fakafekiki ki heʻete tupu pe lāngilangi fakatāutahá; mo e (3) “[ʻofa] ʻi he founga loto-fakatōkilalo mo ongongofua, mo moʻoni ki he ʻOtuá.”1 Pea te tau lava leva ke maʻu ʻa e Laumālie ʻo e ʻEikí, kae ʻikai ko e laumālie ʻo e fakakikihí.