Ne Mau Muimui ʻi he Halá

Lu ti ʻOliveila Mākolino, Tokelau ʻo Lio Kelení, Palāsila

Taimi nounou pē mei heʻema kamata he kiʻi hala foʻoú, kuó ma fakatokangaʻi atu ha fefine ʻoku lue hangatonu mai kiate kimaua. Naʻá ma fakatokangaʻi naʻá ne tangi.

Naʻá ku ngāue ʻi he feituʻu fakamuimui taha ʻo ʻeku ngāue fakafaifekaú mo hoku hoá ʻi ha ongo kiʻi kolo naʻe tuʻu ʻi he loto vahefonua Sao Paulo, Palāsilá. Naʻe ʻi he vahaʻa ʻo e ongo kiʻi koló ha hala tuʻusi ʻi ha loto vaotā naʻe teʻeki ke ma ō ai koeʻuhí he naʻá ma ongoʻi naʻe fakatuʻutāmaki pea ʻoku ngali he ʻikai ke ma fetaulaki ai mo ha taha.

Naʻá ma fakaofiofi atu ki he kiʻi halatuʻusí ni ʻi ha hoʻātā efiafi ʻe taha, kuó u ongoʻi ʻa e Laumālie Māʻoniʻoní ʻi hoku lotó, ʻo talamai ʻoku totonu ke ma hū he loto vaotaá. Naʻá ku sio kia ʻEletā ʻEnitileti mo fakamatala ange ʻa e ongo kuó u toki maʻú. Naʻá ne talamai naʻá ne ongoʻi ʻa e meʻa tatau.

Taimi nounou pē mei heʻema kamata he kiʻi hala foʻoú, kuó ma fakatokangaʻi atu ha fefine ʻoku lue hangatonu mai kiate kimaua. Naʻe fāsiʻi ʻa e kiʻi halá, pea ʻi heʻemau fakalaka atu aí, naʻá ma fakatokangaʻi naʻe tangi.

Ko e taimi naʻá ne fakatokangaʻi ai kimauá, naʻá ne fakaafeʻi ke ma muimui ange ai ki hono ʻapí, ʻo ma feʻiloaki ai mo hono husepānití. Naʻá ma kamata leva ke akoʻi ki he ongomātuʻa tokangá ni ʻa e ongoongoleleí. Naʻá ma fakaafeʻi kinaua ke na papitaiso ʻi he ʻosi pē ha ngaahi uike siʻi. Naʻá ma fiefia ʻi heʻena tali leleí koeʻuhí he kuo lava ha taʻu mei he papitaiso fakamuimui taha he uōtí. Naʻá ma fiefia ʻi heʻema talangofua ki he ueʻi ke ma fou he kiʻi halá ʻi he ʻaho ko iá.

Neongo ia, naʻe pehē ʻe he uaifí ʻi ha taimi nounou kimuʻa heʻena papitaisó naʻá ne fie maʻu ke talanoa mo kimaua. Naʻá ne pehē kuo taʻu lahi ʻene toutou maʻu e misi tatau. Naʻá ne fakatokangaʻi ia ʻi he misí ʻoku tatali ʻi loto Sao Paulo. Naʻe haʻu ha tangata motuʻa ange ʻo talaange ʻoku haʻu ha ongo talavou ke liliu ʻene moʻuí. Hili ia peá ne fakatokangaʻi ha ongo talavou ʻokú na ō mai, ka naʻe ngata maʻu pē ʻene misí he meʻa ko iá.

ʻI ha ʻaho ʻe taha ʻi ha ngaahi uike siʻi kimuʻa, lolotonga ʻene tafi hono falé ne talaange ʻe ha leʻo ki ai naʻe omi ʻa e ongo talavoú pea naʻe fie maʻu ke ʻalu he momeniti pē ko iá ki he kiʻi halatuʻusí, ʻa ē ne ma fuofua sio ai ki aí. Naʻe ʻikai mahino ki ai ʻa e ueʻí ka naʻá ne fie ʻilo e ʻuhinga ʻo ʻene misí, peá ne lī leva ʻene taufalé kae lue ki he kiʻi halá.

Naʻe foki mai ʻa e ngaahi ʻīmisi ʻo ʻene misí ki heʻene fakakaukaú ʻi heʻene luelué, ʻo hangē ha foʻi heleʻuhilá ʻi heʻene sio ki he fofonga ʻo e ongo talavoú. Naʻá ne toe sio foki ʻokú na takitaha tui ha suti ʻuliʻuli mo ha pine hingoa. Naʻá ne pehē, naʻe ʻosi pē ha ngaahi momeniti siʻi kuó u ʻasi ange mo ʻEletā ʻEnitileti ʻi muʻa ai ʻi he kiʻi halá. Naʻe ʻikai ke ne mapukepuke e māfana hono lotó, pea ʻikai ke lava ʻo mataʻofi kae tangi.

ʻI heʻeku manatuʻi he ʻahó ni ʻa e aʻusia toputapu ko iá, ʻoku ou toe ongoʻi ʻa e Laumālié mo sioloto ʻi heʻeku fakakaukaú ki he fofonga loʻimataʻia ʻo e fefine naʻá ne tali ʻa e ongoongoleleí. Naʻá ku ongoʻi ngofua mo hoku hoá mo maʻu ʻa e lototoʻa ke muimui ʻi he kiʻi hala naʻe finangalo ʻa e ʻEikí ke ma foua ʻi he ʻaho ko iá.