Fokotuʻu ʻe he Tukupā ʻo e Fokotuʻutuʻu Fakamotuʻaleá ha Lekooti

Naʻe fokotuʻu ʻe kinautolu ʻoku kau ʻi he Tukupā Fakavahaʻapuleʻanga ki he Fakahokohoko Fakamotuʻaleá ha lekooti foʻou ki he kau fakahokohoko fakamotuʻalea lahi taha ʻi he ʻinitanetí ʻi he ʻaho pē ʻe taha. Naʻe ʻi ai ha kau ngāue tokoni fakakātoa ʻe 66,511 ne nau hū ki he ʻinitanetí ʻi he ʻaho 22 ʻo Siulai 2014, ke vakaiʻi ʻa e ʻata ʻo e ngaahi lekooti fakahisitōliá mo hiki ʻa e fakamatala ke fakakau ʻi he faile fakakomipiutá ʻi he FamilySearch.org. Naʻe fokotuʻu ʻi Siulai 2012 ʻa e lekooti ʻo e kau ngāue tokoni lahi taha ʻi ha ʻaho pē ʻe tahá, ko e toko 49,025 lolotonga e ngāue ki hono fakahokohoko fakamotuʻalea ʻo e Tohi Kakai ʻo e 1940 ʻo e ʻIunaiteti Siteití

Naʻe ʻomi foki ʻe he tukupaá e fika ua māʻolunga taha fakakātoa hono fakatahaʻi (ne fakahokohoko fakamotuʻaleá pe fakamaau) ʻo e ngaahi lekooti kuo fakahuú, ʻa ia ne laka hake ʻi he 5.7 miliona. (ʻOku fakahokohoko fakamotuʻalea e lekooti takitaha ʻe ha ongo ngāue tokoni pea vakaiʻi ʻe he toko taha ngāue tokoni fika tolu, ʻa ia ʻoku ʻiloa ko ha fakamaau, ke fakapapauʻi ʻoku ʻi ha tuʻunga lelei pea mo fakapapauʻi ʻoku tonu.)

Naʻe pehē ʻe Pīsope Koloueti ʻo Tulosi Falaniseé, “Kuo kau loto fiefia atu hotau kāingalotú, ʻa e talavou mo e matuʻotuʻa.” “Ko ha aʻusia fakaʻofoʻofa ʻeni.”

Naʻe pehē ʻe Kulisitofā Sōnasi ʻo Uēlesí, “Ne mau fokotuʻutuʻu ʻemau efiafi fakafāmili ʻi ʻapí ke mau lava kotoa ʻo fakahokohoko fakamotuʻalea—ongomātuʻá mo e fānau ʻe toko fitú ʻa ia ʻoku nau ʻi he taʻu 5 ki he 18. Naʻe fakahā mai kuo mau fakahoko fakafāmili hono fakahokohoko fakamotuʻalea ha ngaahi lekooti ʻe 900 tupu!”

Naʻe pehē ʻe Natalī Teli ʻo Pengikoki Taileni, naʻá ne saiʻia ke kau mo ʻene tama fefine taʻu 13 ki he ʻaho fakamāmani lahi ʻo e fakahokohoko fakamotuʻaleá. Pea naʻe pehē ʻe Kulisi Siate ʻo Kōlei, ʻIngilaní, naʻe lava ke ne maʻu ha hingoa fakafāmili foʻou ʻe 30 nai, kau ai “ha kiʻi taʻahine ne pekia hili ha taimi nounou mei hono papitaisó pea pea puli ia he ngaahi lekooti tohi kakaí.”