Pōpoaki ʻa e Faiako ʻAʻahí
Ko e Ngaahi ʻUlungaanga ʻo Sīsū Kalaisí: ʻAlo Talangofua
Ako ʻi he faʻa lotu ʻa e fakamatala ko ʻení pea feinga ke ʻiloʻi e meʻa ke vahevahé. ʻE fakatupulaki fēfē ʻe he mahino kiate koe e moʻui mo e ngaahi fatongia ʻo e Fakamoʻuí, ʻa hoʻo tui kiate Iá mo faitāpuekina ai ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
ʻOku hanga ʻe he muimui ki he sīpinga talangofua ʻa Sīsū Kalaisí ʻo fakatupulaki ʻetau tui kiate Iá. Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ʻi ai nai ha ofo, ʻi he ʻuluaki fili mo fakamuʻomuʻa taha ʻe Kalaisi ke fakamahinoʻi Ia ʻi Hono vā mo ʻEne Tamaí—ʻa ʻEne ʻofa mo talangofua pea mo fakavaivai kiate Iá, ʻo taau mo Hono tuʻunga ko e ʻAlo fai mateakí? … Ko e talangofuá ko e ʻuluaki fono ia ʻo e langí.”1
ʻOku akoʻi ʻe he folofolá “ʻo ka tau ka maʻu ha tāpuaki mei he ʻOtuá, ʻoku tupunga ia ʻi he talangofua ki he fono ʻa ia ʻoku makatuʻunga ia ki aí” (T&F 130:21). ʻOku hoko ʻetau tupulaki fakalaumālié ʻi heʻetau ʻunuʻunu ʻo ofi ki he ʻOtuá ʻo fou ʻi he talangofuá pea mo fakaafeʻi ʻa e mālohi ʻo e Fakalelei ʻa e Fakamoʻuí ki heʻetau moʻuí.
Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku tau fiefia … he hokohoko tafe mai ʻa e ngaahi tāpuaki ne talaʻofa ʻaki ʻe he ʻOtuá ʻi Heʻene fuakava mo kitautolú. ʻOku ʻomi ʻe he ngaahi tāpuaki ko iá ʻa e ngaahi maʻuʻanga tokoni ʻoku tau fie maʻu ke tau ngāue aí, kae ʻikai [ke toki fakakounaʻi] ʻi heʻetau fononga atu ʻi he moʻuí. … ʻOku hanga ʻe he talangofuá ʻo ʻomai kiate kitautolu ha mālohi lahi ange ke tau puleʻi ʻetau moʻuí, ha ivi lahi ange ki heʻetau feʻaluʻakí, pea ke ngāue mo fakatupu.”2
Ngaahi Potufolofola Kehé
Mei he Folofolá
Naʻe fehuʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻE lava nai ke foaki ki ha taha kehe ʻa e mālohi fakalaumālie ʻoku maʻu tupu mei he talangofua maʻu pē ki he ngaahi fekaú? Ko e tali mahinó … ko e ʻikai.”3
ʻOku hoko ʻa e talafakatātā ʻo e kau tāupoʻou ʻe toko hongofulú ko ha sīpinga ʻo e tefitoʻi moʻoni ko ʻení. Neongo naʻe ō kotoa ʻa e kau tāupoʻoú mo ʻenau ngaahi māmá ke “fakafetaulaki ki he tangata taʻané,” ka ko e toko nima pē naʻe poto ʻo ʻave ha lolo ʻi heʻenau ngaahi māmá. Naʻe vale ʻo e toko nima ko ʻeé koeʻuhí he “naʻe ʻikai ke [nau] ʻave … [haʻanau] lolo.”
Pea naʻe pā mai ‘a e kalangá ʻi he tuʻuapoó: “Vakai, ʻoku haʻu ʻa e tangata taʻané, mou ʻalu atu ʻo fakafetaulaki kiate ia.” Naʻe teuteu ʻe he kau tāupoʻoú kotoa ʻenau ngaahi māmá, ka naʻe ʻikai ha lolo ʻa e kau tāupoʻou valé. Naʻa nau lea ki he kau tāupoʻou potó, “Foaki mai maʻamautolu ʻi hoʻomou loló; he ʻoku teimate ʻa ʻemau [māmá].”
Naʻe taliange ʻe he kau tāupoʻou potó, “Koeʻuhí naʻa siʻi ia kiate kimautolu mo kimoutolu: ka mou ʻalu …ʻo fakatau maʻamoutolu.” Pea lolotonga ʻa e ʻalu ʻa e kau tāupoʻou valé, naʻe haʻu ʻa e ʻeiki taʻané pea hū ʻa e kau tāupoʻou potó mo ia pea “tāpuni ʻa e matapaá”