Tokoni Mai Kiate Kimautolu!
ʻOku fakahaaʻi he ʻaho kotoa pē ʻe he fānau he funga ʻo e māmaní kotoa ʻoku nau tokanga ʻaki ʻenau kumi ha ngaahi founga ke tokoni ai ki ha niʻihi kehe!
Kūkisí mo e Fanga Kiʻi Tamapuá
Naʻe fakahoko ʻe homau fāmilí ha “faʻahitaʻu ʻo e ngāue tokoní.” Naʻá ku ngaohi mo hoku tuongaʻané ha fanga kiʻi tamapua maʻá e fānau ʻi he fale ʻo e fānau ohí. Naʻa mau toe ʻave foki mo ha ngaahi kūkisi sokoleti ki ha kau tangata tāmate afi mo fakamaʻa ha anovai. ʻOku ou fiefia heʻemau lava ʻo tokoní!
Tōpini P., taʻu 9, ʻAitahō, USA
Ngaahi Hiva Fiefia
Naʻa mau ʻaʻahi mo tokoni ʻi homau ngaahi ʻaho tokoni makehé ki ha senitā nofoʻanga. Ko e taimi naʻa mau kamata hivaʻi ai ʻa e ngaahi hiva Palaimelí mo e ngaahi hiva kehé, naʻe kamata ke pasi ʻa e kakaí mo hiva fakataha mo kimautolu. Naʻe aʻu hanau niʻihi ʻo nau hulohula! Naʻa mau fāʻofua mo tuku ha ngaahi kaati maʻanautolu.
Vahefonua Leiliá, Potukali
Lelei Ange ʻi he Kilisimasí
Naʻe ongosia ʻeku faʻeé mo ʻeku tamaí mei ha ʻaho ngāue lahi. Naʻá ku fufulu mo tuku fakalelei ʻa e ngaahi peletí pea fakamaʻa mo e falikí, tēpilé, mo e funga kānitá. Hili ia peá u fakamaau ʻa e loto falé mo e loki vaʻingá. Ko e taimi naʻe ʻā hake ai ʻeku faʻeé mo ʻeku tamaí, naʻá na pehē naʻe lelei ange ia ʻi he Kilisimasí!
Kemipilī G., taʻu 11, Siōsiá, USA
Ngāue ki he Puha Sitōkení
ʻOku mātuʻaki mokosia e kakai ʻoku ʻikai hanau ʻapí he faʻahitaʻu momokó! Naʻa mau pehē leva ke tānaki ha ngaahi sitōkeni māfana maʻá e kakai taʻe ʻapi ʻi homau feituʻú. Naʻe tokoni ʻa e kau talavoú mo e kau finemuí, pea ʻikai hano taimi kuo hake ʻemau puhá ʻi ha sitōkeni ʻe laungeau maʻá e kau taʻe-ʻapí!
ʻAlapeta, Kānata