ʻOku Fakafiefia ʻa e ʻAho Sapaté
Fai ʻe ʻEletā Russell M. Nelson
ʻO e Kōlomu ʻo e Kau ʻAposetolo ʻe Toko Hongofulu Mā Uá
Te ke fakapapauʻi fēfē ko hoʻo ngaahi tōʻonga ʻi he Sāpaté ʻe fakaiku ki he fiefiá mo e nēkeneká?
Siʻi kāinga ʻofeina, kuo nāunauʻia ʻa e ongo ʻaho ko ʻeni ʻo e konifelenisí. Kuo langaki kitautolu ʻe he hiva fakalaumālié mo e ngaahi lotu leleí. Kuo fakamāmaʻi hotau laumālié ʻe he ngaahi pōpoaki ʻo e māmá mo e moʻoní. ʻOku tau toe fakataha mo fakafetaʻi fakamātoato ʻi he Sāpate Toetuʻú ni ki he ʻOtuá koeʻuhí ko e palōfitá!
Ko e fehuʻi kiate kitautolu takitaha: ʻi he meʻa kuó u ongona mo ongoʻi ʻi he lolotonga ʻo e konifelenisi ko ʻení, te u liliu fēfē? Ko e hā pē haʻo tali, tuku ke u fakaafeʻi koe ke ke vakavakaiʻi e ngaahi ongo ʻokú ke maʻu fekauʻaki mo hoʻo tōʻonga ʻi he ʻaho Sāpaté.
ʻOku ou mālieʻia ʻi he lea ʻa ʻĪsaiá, ʻa ia naʻá ne ui ʻa e Sāpaté ko e “fakafiefia.”1 Ka ʻoku ou fifili, ʻoku hoko moʻoni nai ʻa e Sāpaté ko ha meʻa fakafiefia kiate koe pea mo au?
Naʻá ku ʻuluaki maʻu ʻa e fiefia he Sāpaté ʻi he ngaahi taʻu lahi kuo hilí ʻi heʻeku kei hoko ko ha taha faitafa femoʻuekiná, naʻá ku ʻilo ai ne hoko ʻa e Sāpaté ko ha ʻaho ʻo e fakaakeake fakafoʻituitui. ʻI he fakaʻosinga ʻo e uiké, naʻe mamahi hoku ongo nimá ʻi hono toutou olo ʻaki ʻa e koá, vaí, mo ha polosi fefeka. Naʻá ku toe fie maʻu foki ha kiʻi mālōlō mei he mafasia ʻo e ngāue faingataʻá ni. Naʻe ʻomi ʻe he Sāpaté ʻa e fakafiemālie naʻe fie maʻu lahí.
Naʻe ʻuhinga ki he hā ʻa e Fakamoʻuí ʻi Heʻene folofola “naʻe ngaohi ʻa e sāpaté koeʻuhí ko e tangatá, ka naʻe ʻikai ngaohi ʻa e tangatá koeʻuhí ko e sāpaté”?2 ʻOku ou tui naʻá Ne fie maʻu ke mahino kiate kitautolu ko e Sāpaté ko ʻEne meʻaʻofa ia kiate kitautolu, ʻokú ne ʻomi ha mālōlō moʻoni mei he haʻahaʻa ʻo e moʻui fakaʻahó pea mo ha faingamālie ke fakafoʻou fakalaumālie mo fakatuʻasino ai. Naʻe foaki mai ʻe he ʻOtuá ʻa e ʻaho makehé ni, ʻo ʻikai ki he fakafiefiá pe ngāue fakaʻahó ka ke mālōlō ai mei he ngāué, ko ha tokoni fakatuʻasino mo fakalaumālie.
ʻOku ʻuhinga ʻa e foʻi lea Sāpaté ʻi he lea faka-Hepeluú ko e “mālōlō.” ʻOku foki ʻa e taumuʻa ʻo e Sāpaté ki he Fakatupu ʻo e māmaní, ʻa ia naʻe ʻosi e ʻaho ʻe ono ʻo e ngāué, naʻe mālōlō leva ʻa e ʻEikí mei he ngāue ʻo e fakatupú.3 ʻI hono fakahā ʻe he ʻOtuá kia Mōsese ʻa e Fekau ʻe Hongofulú, naʻá Ne fekau ke tau “manatu ki he ʻaho sāpaté, ke tauhi ia ke māʻoniʻoni.”4 Naʻe tauhi kimui ʻa e Sāpaté ko ha fakamanatu ʻo e fakatauʻatāinaʻi ʻo ʻIsileli mei heʻenau nofo pōpula ʻi ʻIsipité.5 Mahalo ko e mahuʻinga tahá, naʻe foaki ʻa e Sāpaté ko ha fuakava ke tauhi maʻu, ko ha fakamanatu maʻu pē ʻe ala fakamāʻoniʻoniʻi ʻe he ʻEikí Hono kakaí.6
ʻIkai ngata aí, ʻoku tau maʻu ʻeni ʻa e sākalamēnití ʻi he ʻaho Sāpaté ko e fakamanatu ki he Fakalelei ʻa Sīsū Kalaisí.7 ʻOku tau toe fuakava ai ʻoku tau loto fiemālie ke toʻo kiate kitautolu Hono huafa māʻoniʻoní.8
Naʻe fakahā ʻe he Fakamoʻuí ko Ia ʻa e ʻEiki ʻo e Sāpaté.9 Ko Hono ʻahó ia! Kuó Ne toutou kole mai ke tau tauhi ʻa e Sāpaté10 pe ke fakamāʻoniʻoniʻi ʻa e ʻaho Sāpaté.11 ʻOku tau haʻisia ʻi he fuakava ke fai ia.
ʻOku tau fakaʻapaʻapaʻi fēfē ʻa e ʻaho Sāpaté? ʻI hoku ngaahi taʻu kei talavou angé, naʻá ku ʻilo ai ki ha ngāue ʻa ha kakai kehe naʻa nau fakatahaʻi ha ngaahi lisi ʻo e ngaahi meʻa ke fai pea mo ha ngaahi meʻa ke ʻoua ʻe fai ʻi he ʻaho Sāpaté. Naʻá ku toki ako kimui ange mei he folofolá ʻoku hoko ʻeku tōʻonga mo ʻeku fakakaukau ʻi he Sāpaté ko ha fakaʻilonga ʻi hoku vā mo ʻeku Tamai Hēvaní.12 ʻI he mahino ko iá, ʻoku ʻikai ke u toe fie maʻu ʻa e ngaahi lisi ʻo e meʻa ke fai pe taʻe faí. Ko e taimi kuo pau ai ke u fai ha fili pe tuʻutuʻuni pe ʻoku taau ʻa e ʻekitivitī ko iá pe ʻikai mo e Sāpaté, ʻoku ou fehuʻi pē kiate au, “Ko e hā ʻa e fakaʻilonga ʻoku ou fie foaki ki he ʻOtuá?” Naʻe ʻai ʻe he fehuʻí ni ke mahino ʻaupito ʻeku ngaahi fili kau ki he ʻaho Sāpaté.
Neongo naʻe kamata mei onoʻaho e tokāteline fekauʻaki mo e Sāpaté, ka kuo toe fakafoʻou ia ʻi he ngaahi ʻaho kimui ní ko e konga ʻo ha fuakava mo ha talaʻofa foʻou. Fakafanongo ki he mālohi ʻo e tuʻutuʻuni fakalangi ko ʻení:
“Pea ko e meʻa ke tauhi ai koe ke maʻa ange mei māmaní, ke ke ʻalu ki he fale ʻo e lotú pea ʻohake ai hoʻo ngaahi ouau toputapú ʻi hoku ʻaho tapú;
“He ko e moʻoni ko e ʻaho ʻeni kuo tuʻutuʻuni kiate koe ke ke mālōlō ai mei hoʻo ngaahi ngāué, pea fai hoʻo ngaahi huú ki he Fungani Māʻolungá. …
“Pea ko e ʻaho ko ʻení … ʻoua naʻá ke fai mo ha toe meʻa kehe kae tuku pē ke teuteuʻi hoʻo meʻakaí ʻi he loto ʻoku angatonu, … koeʻuhí ke kakato ʻa hoʻo fiefiá. …
“Pea fakatatau ki hoʻomou fai ʻa e ngaahi meʻá ni ʻi he fakafetaʻi, ʻi he loto fiefia mo e ngaahi fofonga malimali, … te mou maʻu ʻa e mahu ʻo e māmaní.”13
Fakakaukau ki he maʻongoʻonga ʻo e kupuʻi lea ko iá! ʻOku talaʻofa ʻa e koloa ʻo e māmaní kiate kinautolu ʻoku nau tauhi ʻa e Sāpaté ke māʻoniʻoní.14 ʻOku ʻikai ai ha ofo ʻi hono ui ʻe ʻĪsaia ʻa e Sāpaté ko e “fakafiefiá.”
Te ke fakapapauʻi fēfē ko hoʻo ngaahi tōʻonga ʻi he Sāpaté ʻe fakaiku ki he fiefiá mo e nēkeneká? Makehe mei hoʻo ʻalu ki he lotú, maʻu ʻa e sākalamēnití, pea mo ngāue faivelengá, ko e hā mo ha toe ngaahi ʻekitivitī kehe ʻe tokoni ke ke ʻai ʻa e Sāpaté ko ha meʻa fakafiefia kiate koé? Ko e hā ha fakaʻilonga te ke ʻoange ki he ʻEikí ke fakahaaʻi hoʻo ʻofa kiate Iá?
ʻOku ʻomi ʻe he Sāpaté ha faingamālie lelei ke fakamālohia ai ʻa e ngaahi haʻi ʻo e familí. Ko hono aofangatukú, ʻoku fie maʻu ʻe he ʻOtuá ʻa kitautolu kotoa, ʻi heʻetau hoko ko ʻEne fānaú, ke tau foki ange kiate Ia ko ha mēmipa kuo ʻosi fakakoloaʻi, ʻosi sila ʻi he temipalé ko e famili, ki heʻetau ngaahi kuí, mo hotau hakó.15
ʻOku tau ʻai ʻa e Sāpaté ko ha meʻa fakafiefia ʻi he taimi ʻoku tau akoʻi ai ʻa e ongoongoleleí ki heʻetau fānaú. ʻOku mahino ʻaupito hotau fatongia ko e mātuʻá. Naʻe folofola ʻa e ʻEikí, “Pea ko e tahá, kapau ʻoku maʻu ha fānau ʻe ha ongomātuʻa ʻi Saione … ʻoku ʻikai te nau akoʻi ʻa kinautolu ke nau ʻiloʻi ʻa e tokāteline ʻo e fakatomalá, tui kia Kalaisi ko e ʻAlo ʻo e ʻOtua moʻuí, pea mo e papitaisó mo e foaki ʻo e Laumālie Māʻoniʻoní ʻi he hilifaki ʻo e nimá, ʻi he taimi ʻoku nau taʻu valu aí, ʻe ʻi he ʻulu ʻo e mātuʻá ʻa e angahalá.”16
Naʻe hanga ʻe he Kau Palesitenisī ʻUluakí ʻo fakamamafaʻi he ngaahi taʻu lahi kuohilí, ʻa hono mahuʻinga ʻo e taimi lelei mo e fāmilí. Naʻa nau tohi:
“ʻOku mau kole ki he ngaahi mātuʻá ke fai honau tahá ke akoʻi mo ohi hake ʻenau fānaú ʻi he ngaahi tefitoʻi moʻoni ʻo e ongoongoleleí ʻa ia te ne pukepuke kinautolu ke nau kei mālohi ai ʻi he Siasí. Ko ʻapi ʻa e makatuʻunga ʻo ha moʻui māʻoniʻoní, pea ʻoku ʻikai ha toe faʻahinga meʻa te ne lava ke fetongi pe fakahoko hono ngaahi fatongia mahuʻingá ʻi hono paotoloaki ʻo e fatongia ko ʻeni kuo foaki mai ʻe he ʻOtuá.
“ʻOku mau faleʻi ʻa e mātuʻá mo e fānaú ke nau fakamuʻomuʻa taha ʻa e lotu fakafāmilí, efiafi fakafāmili ʻi ʻapí, ako mo e fakahinohinoʻi ʻo e ongoongoleleí, pea mo e ngaahi ʻekitivitī langaki moʻuí. Neongo pe ko e hā hono lelei mo taau ʻo e ngaahi fie maʻu pe ʻekitivitī kehé, ka kuo pau ke ʻoua naʻa tuku ke nau fetongi ʻa e ngaahi fatongia kuo fokotuʻu fakalangi ko e mātuʻá pē mo e familí te nau lava ke fakahoko totonú.”17
ʻI heʻeku fakakaukau ki he faleʻi ko ʻení, naʻá ku meimei fakaʻamu ke u toe hoko ko ha tamai kei talavou. ʻOku maʻu ʻeni ʻe he ngaahi mātuʻá ha maʻuʻanga tokoni fakaʻofoʻofa ke tokoni ke nau fokotuʻu ha taimi fakafāmili ʻoku mahuʻinga angé, ʻi he Sāpaté pea mo e ngaahi ʻaho kehé foki. ʻOku nau maʻu ʻa e LDS.org, Mormon.org, ngaahi vitiō ʻo e Tohi Tapú, the Mormon Channel, Mesia Library, Friend, New Era, Ensign, Liahoná, pea toe mahulu ange—ʻo lahi ʻaupito. ʻOku fuʻu tokoni lahi moʻoni ʻa e ngaahi maʻuʻanga tokoni ko ʻení ki he ngaahi mātuʻá ʻi he fakahoko honau fatongia toputapu ko e akoʻi ʻenau fānaú. ʻOku ʻikai ha toe ngāue te ne lakasi e fatongia fakaemātuʻa māʻoniʻoni mo moʻoní!
Te ke ʻilo lahi ange ʻi hoʻo akoʻi e ongoongoleleí. Ko e founga ʻeni ʻa e ʻEikí ke tokoniʻi koe ke ke ʻilo ʻEne ongoongoleleí. Naʻá Ne folofola:
“Pea ʻoku ou fai kiate kimoutolu ʻa e fekau ke mou feakoʻiʻaki ʻiate kimoutolu ʻa e tokāteline ʻo e puleʻangá.
“Ke mou akoʻi faivelenga … , koeʻuhí ke akonekina ʻa kimoutolu ʻo kakato ange … ʻi he ngaahi tokāteline, ʻi he fono ʻo e ongoongoleleí, ʻi he ngaahi meʻa kotoa pē ʻoku kau ki he puleʻanga ʻo e ʻOtuá.”18
ʻOku ʻai ʻe he faʻahinga ako pehē ʻo e ongoongoleleí ke hoko ʻa e Sāpaté ko ha fakafiefia. ʻOku mahuʻinga ʻa e talaʻofá ni neongo pe ko e hā e tokolahi ʻo e familí, faʻungá, pe feituʻu ʻokú ke ʻi aí.
ʻOku ʻikai ngata pē ʻi he taimí mo e fāmilí, ka te mou lava ʻo aʻusia ha fiefia moʻoni ʻi he ʻaho Sāpaté ʻi he ngāue hisitōlia fakafāmilí. ʻE lava ʻe he fekumi ke ʻiloʻi e kau mēmipa ʻo e fāmilí ne moʻui ʻi muʻa ʻiate kimoutolú—ʻa kinautolu naʻe ʻikai ke nau maʻu ha faingamālie ke tali ʻa e ongoongoleleí heʻenau ʻi hení—ke ne ʻoatu ha fiefia lahi.
Kuó u mātā tonu ia. Naʻe fakakaukau hoku uaifi ʻofeina ko Uenitií, ʻi he ngaahi taʻu kuo hilí, ke ne ako e founga fakahoko ʻo e fakatotolo he hisitōlia fakafāmilí. Naʻe māmālie ʻene fakalakalaká ʻi he kamataʻangá, ka naʻá ne ako māmālie, ki hono faingofua ke fai ʻa e ngāue toputapú ni. Pea kuo teʻeki ai ha taimi te u fakatokangaʻi naʻe toe fiefia ange ai. ʻOku ʻikai fie maʻu foki ke mou fononga ki he ngaahi fonua kehe pe ki ha senitā hisitōlia fakafāmili. Te ke lava pē ʻi ʻapi, ʻaki e tokoni ʻa e komipiutá pe telefoni toʻotoʻó, ke ʻilo ha kakai ʻoku nau fakaʻānaua honau ngaahi ouaú. ʻAi ʻa e Sāpaté ke fakafiefia ʻaki haʻo fekumi ki hoʻo ngaahi kuí pea fakatauʻatāinaʻi kinautolu mei he fale fakapōpula ʻo e ngaahi laumālié!19
ʻAi ʻa e Sāpaté ko ha ʻaho fakafiefia ʻaki haʻo fai ha tokoni ki he niʻihi kehé, tautautefito kiate kinautolu ʻoku ʻikai ke nau ongoʻi moʻui leleí pe ko kinautolu ʻoku taʻelatá pe fie maʻu tokoní.20 ʻI hono hiki hake honau laumālié ʻe hiki ai foki mo ho laumālié.
Ko e taimi naʻe fakamatalaʻi ai ʻe ʻĪsaia ʻa e Sāpaté ko ha “fakafiefiá,” naʻá ne toe akoʻi foki ai e founga ke ʻai ia ke fakafiefiá. Naʻá ne pehē:
“Kapau te ke taʻofi … pea ʻoua naʻa fai ki ho lotó ʻi hoku ʻaho māʻoniʻoní; peá ke ui ʻa e ʻaho [sāpaté] ko e ʻaho fakafiefia, … pea fakaʻapaʻapa ki [he ʻEikí], ʻo taʻe fai ki ho ngaahi halá, pea taʻe lea ʻaki ʻa e ngaahi lea ʻaʻaú:
“Pea te ke toki fiefia koe ʻi he ʻEikí.”21
ʻOku fie maʻu ʻa e mapuleʻi kitá ʻi he ʻikai kumi hoʻo “fiefia ʻaʻaú” ʻi he Sāpaté. Mahalo naʻa fie maʻu ke ke taʻofi meiate koe ha meʻa te ke saiʻia aí. Kapau te ke fili ke ke fiefia ʻi he ʻEikí, he ʻikai te ke tuku ke ke ʻai ia ke tatau mo ha toe ʻaho kehe. ʻE lava ke fai ʻa e ngaahi ʻekitivitī angamaheni mo fakafiefiá ʻi ha taimi kehe.
Fakakaukau ki heni: ʻI he totongi vahehongofulú, ʻoku tau fakafoki ai ha vahe hongofulu ʻe taha ʻo ʻetau tupú ki he ʻEikí. ʻI he tauhi ʻo e Sāpaté ke māʻoniʻoní, ʻoku tau tuku mavahe ai ha ʻaho ʻe taha ʻi he ʻaho ʻe fitú Maʻana. ʻOku pehē pē mo hotau faingamālie ke fakatapui ʻa e paʻangá mo e taimí kiate Ia ʻokú Ne foaki mai ʻa e moʻuí ʻi he ʻaho takitaha.22
ʻOku fakatupu ʻe he tui ki he ʻOtuá ha ʻofa ki he Sāpaté; ʻoku fakatupu ʻe he tui ki he Sāpaté ha ʻofa ki he ʻOtuá. ʻOku hoko e ʻaho Sāpate toputapú ko ha meʻa fakafiefia moʻoni.
ʻI he ʻamanaki ʻosi ʻa e konifelenisi ko ʻení, ʻoku tau ʻiloʻi neongo pe ko e fē ha feituʻu ʻoku tau nofo ai, kuo pau ke tau hoko ko e sīpinga ʻo e kakai tuí ʻi hotau ngaahi fāmilí, kaungāʻapí, mo e ngaahi kaungāmeʻá.23 Ko e kakai tui moʻoní ʻoku nau tauhi ʻa e ʻaho Sāpaté ke māʻoniʻoni.
ʻOku ou fakaʻosi ʻaki e lea māvae ʻa Molonaí, ʻi heʻene fakaʻosi ʻa e Tohi ʻa Molomoná. Naʻá ne tohi, “Haʻu kia Kalaisi, pea hoko ʻo haohaoa ʻiate ia, pea fakafisi ʻa kimoutolu mei he anga taʻe-māʻoniʻoni kotoa pē; pea kapau te mou fakafisi ʻa kimoutolu mei he anga taʻe-māʻoniʻoni kotoa pē, pea ʻofa ki he ʻOtuá ʻaki homou iví, ʻatamaí, mo e mālohí kotoa, pea ʻoku toki … fakamāʻoniʻoniʻi ʻa kimoutolu.”24
ʻOku ou ʻoatu ʻaki hoku ʻofá, ʻa ʻeku lotú mo ʻeku fakamoʻoní, pea ha tāpuaki maʻamoutolu, ʻi he huafa toputapu ʻo Sīsū Kalaisí, ʻēmeni.