¶ 1 HILI ia naa ne toe omi au ki mui i he hala oe mataba oe botu tabu ki tua, aia oku haga ki hahake; bea nae tabuni ia.

2 Bea nae behe ai e Jihova kiate au; e tabuni ae mataba ni, bea e ikai fakaava ia, bea e ikai ha tagata e hu atu ki ai; he koeuhi kuo haele atu ai a Jihova, koe Otua o Isileli, koia e tabuni ai ia.

3 Kuo tuku ia ki he tu‘i; e nofo i ai ae tu‘i ke kai ma i he ao o Jihova; koia ia e hu atu i he hala oe fale hala i he mataba koia, bea te ne toe alu atu ai be ki tua.

¶ 4 Hili ia naa ne omi au ki he hala i he mataba ki tokelau i he mata fale: bea naaku jio, bea vakai nae fakabito aki ae fale o Jihova ae nāunāu o Jihova; bea naaku to hifo ki hoku mata.

5 Bea nae behe e Jihova kiate au, Foha oe tagata, tokaga lahi ho loto, bea jio aki ho mata, bea fanogo ho teliga ki he mea kotoabe, oku ou lea aki kiate koe i he gaahi tuutuuni, oku kau ki he fale o Jihova, mo hono gaahi fekau; bea ke tokaga lahi ki he gaahi huaga ki loto fale, mo hono gaahi hala kotoabe ki tua, mei he botu tobutabu.

6 Bea te ke lea ki he kau agatuu, ki he fale o Isileli, Oku behe e Jihova koe Otua; E fale o Isileli, tuku ke lahi eni a hoo mou gaahi fakalielia,

7 He kuo mou omi ae kakai muli, ae kau taekamu i loto, bea taekamu fakakakano ke nau i hoku botu tobutabu ke nau fakalielia‘i ia, io, a hoku fale, i hoo mou atu a eku mea, ae gako, bea moe toto, bea kuo nau maumau‘i a eku fuakava, koe mea i he e nau gaahi fakalielia.

8 Bea kuo ikai te mou tauhi a eku gaahi mea maonioni; ka kuo mou fakanofo ae kau leo ma amoutolu be, ke tauhi‘i a hoku botu tobutabu.

¶ 9 Oku behe e Jihova koe Otua; E ikai ha taha muli, be ha taekamu i loto, be ha taekamu fakakakano, e hu ki hoku botu tobutabu, be ha taha i he kau muli kotoabe oku nofo moe fānau a Isileli.

10 Bea koe kau Livai nae alu o he mamao meiate au, i he ene alu hehe a Isileli, aia nae alu he meiate au, koe muimui ki ho nau gaahi tamabua; te nau fua be ekinautolu ae nau fai agahala.

11 Ka ne ogo ia te nau tauhi a hoku fale tabu, mo leohi ae gaahi mataba oe fale, mo fai ae gaue i loto fale: te nau tamate‘i ae feilaulau tutu, moe feilaulau ae kakai, bea te nau tutuu i ho nau ao, mo gaue kiate kinautolu.

12 Koeuhi naa nau gaue kiate kinautolu i he ao o ho nau gaahi tamabua, mo nau fakahala‘i ae fale o Isileli; koia kuou hiki hake ai a hoku nima kiate kinautolu, oku behe e Jihova koe Otua, bea te nau fua e nau agahala.

13 Bea e ikai te nau ha‘u ke ofi kiate au, ke fai ha gaue fakataulaeiki kiate au, be te nau ofi mai ki he eku gaahi mea maonioni, i he botu tobutabu aubito: ka te nau fua be e nau ma, bea moe gaahi fakalielia aia kuo nau fai.

14 Ka teu tuku akinautolu ke tauhi ki he nāunāu oe fale, i hono gaue oia, mo ia kotoabe e fai i ai.

¶ 15 Ka koe kau taulaeiki ae kau Livai, koe gaahi foha o Satoki, akinautolu nae tauhi ki hoku fale tabu, i he ene alu hehe ae fānau a Isileli meiate au, ko kinautolu ia e omi ke ofi kiate au, ke nau tauhi kiate au, bea te nau tutuu i hoku ao, ke feilaulau aki kiate au, ae gako moe toto, oku behe e Jihova koe Otua:

16 Te nau hu atu ki hoku botu tabu, bea te nau unuunu mai ke ofi ki he eku keinagaaga, ke fai gaue kiate au, bea te nau tauhi a eku fekau.

17 Bea e hoko ia o behe, oka nau ka hu atu i he gaahi mataba oe lotoa ki loto, te nau kofu aki ae kofu tubenu lelei; e ikai jii kau ha kofu sibi ki he e nau kofu, oka nau ka fai ae gaue i he gaahi mataba oe lotoa ki loto, be i loto.

18 Te nau tatā aki ae tubenu lelei ki ho nau ulu, bea te nau kofu aki ae tubenu lelei ki ho nau kogaloto; e ikai te nau ai kiate kinautolu ha mea oku fakatubu bubuha.

19 Bea ka nau ka alu atu ki he lotoa ki tua, io ki he lotoa ki tua ki he kakai, te nau too ho nau gaahi kofu naa nau gaue ai, mo tuku ia i he gaahi botu fale maonioni, bea te nau ai ae gaahi kofu kehe; bea e ikai te nau fakamaonioni‘i ae kakai i ho nau gaahi kofu.

20 Bea e ikai te nau tekefua, bea e ikai te nau tuku ke loloa ho nau louulu, ka e kojikoji be ke nonou.

21 Bea e ikai jii inu ha uaine e ha taulaeiki oka fai eia ke hu ki he lotoa ki loto.

22 Bea e ikai te nau unoho aki ha fefine kuo mate a hono unoho be ha taha kuo fakamavae: ka te nau unoho moe kau fine mui i he hako oe fale o Isileli, be koe fefine nae unoho mo ha taulaeiki kuo bekia.

23 Bea te nau ako‘i a hoku kakai ke ilo aia oku maonioni mo ia oku kovi, mo nau fakaha ke mahino kiate kinautolu ae mea oku tae maa mo ia oku maa.

24 Bea ka ai ha fakakikihi, ko kinautolu ia e tuu ko hono fakamāu‘i; bea te nau fakamāu‘i ia o fakatatau ki he eku fakamāu: bea te nau fai a eku gaahi fono mo eku gaahi fekau i he gaahi fakataha kotoabe oku fai kiate au; bea te nau fakamaonioni‘i a hoku gaahi aho tabu.

25 Bea e ikai te nau ala ki ha taha kuo mate ke nau uli ai: ka e gofua e nau fakauli‘i akinautolu o kabau ko haa nau tamai, be koe fa‘e, be koe foha be koe ofefine, be ko ha tokoua, be ha tuofefine oku ikai ke unoho.

26 Bea hili hono fakamaa ia, te nau lau kiate ia ha aho e fitu.

27 Bea i he aho koia oku ne hu atu ai ki he botu tabu, ki he lotoa ki loto, ke gaue i he botu tabu, oku behe e Jihova koe Otua, te ne feilaulau aki maana ha feilaulau i he agahala.

28 Bea e hoko ia koe tofia kiate kinautolu: ko au ko ho nau tofia: bea koia e ikai vahe ai ha nau tofia i Isileli: he ko ho nau tofia au.

29 Te nau kai mei he feilaulau oe mea kai, moe feilaulau koeuhi koe agahala, moe feilaulau i he fai hala; bea e anautolu ae mea kotoabe oku feilaulau aki i Isileli.

30 Bea e i he kau taulaeiki ae uluaki vahe i he uluaki fua oe mea kotoabe, moe feilaulau kotoabe i hoo mou feilaulau kehekehe: te mou atu foki ki he kau taulaeiki ae uluaki vahe o hoo mou ma kuo natu, koeuhi ke hoko ai mo nofo mau ae tabuaki ki ho mou fale.

31 E ikai kai e he taulaeiki i ha mea kuo mate mahaki be, be i ha mea kuo haehae be ko ha manu buna be ko ha manu kehe ia.