¶ 1 NAE toe hoko foki ae folofola a Jihova kiate au, o behe,

2 Foha oe tagata, kikite, bea ke behe, Oku behe e Jihova koe Otua; Tagi kalaga, Oiaue, oiaue ae aho!

3 He kuo ofi mai ae aho, io, kuo ofi ae aho o Jihova, koe aho fakaboubouli; koe kuoga ia ki he hiteni.

4 E hoko mai ae heleta ki Ijibite, bea e ai ae mamahi lahi i Itiobea, oka to hifo ae kakai mate i Ijibite, bea te nau ave hono kakai toko lahi, bea e maumau‘i a hono gaahi tuuga.

5 Bea e higa fakataha mo kinautolu i he heleta a Itiobea, mo Libea, mo Litea, bea moe kakai muli kehekehe, mo Kuba, moe kakai oe fonua oku nau kau taha.

6 Oku behe e Jihova; e higa foki akinautolu oku tokoni ki Ijibite; bea e fakatokilalo ae fielahi o ene malohi: te nau to i he heleta i ai o fai mai mei he fale leo maoluga o Saiini, oku behe e Jihova koe Otua.

7 Bea te nau lala i he lotolotoga oe gaahi fonua oku lala, bea ko hono gaahi kolo e i he lotolotoga ia oe gaahi kolo kuo fakaauha.

8 Bea te nau ilo ko au ko Jihova, o kau ka tutu ae afi i Ijibite, bea oka fakaauha a hono kau tokoni kotoabe.

9 I he aho ko ia teu fekau atu meiate au ae gaahi vaka ke fakamanavahe‘i ae kau Itiobea oku fakafiemalie, bea e hoko ae mamahi lahi kiate kinautolu, o tatau mo ia i he aho o Ijibite: he vakai, oku ha‘u ia.

10 Oku behe e Jihova koe Otua; teu fakaoji a hono toko lahi o Ijibite e he nima o Nebukalesa koe tu‘i o Babilone.

11 E omi ia, bea mo ene kakai mo ia, ae kau to‘a oe gaahi buleaga, ke nau fakaauha ae fonua: bea te nau toho e nau heleta ki Ijibite, bea e fonu ae fonua i he kakai mate tamate‘a.

12 Bea teu fakamomoa ae gaahi vai, bea teu fakatau atu ae fonua ki he nima oe agakovi: bea teu gaohi ke lala ae fonua, moe mea kotoabe oku i ai, i he nima oe kau muli: ko au Jihova kuou lea ki ai.

13 Oku behe e Jihova koe Otua; Teu fakaauha foki ae gaahi tamabua, bea teu fakaoji mei a Nofe ae gaahi fakatātā; bea e ikai toe ai ha tu‘i oe fonua ko Ijibite: bea teu ai ha manavahe ki he fonua ko Ijibite.

14 Bea teu gaohi ke lala a Batalosi, bea teu fakatubu ae afi i Soani, bea teu fai ae tautea i No.

15 Bea teu liligi hoku houhau ki Belusiumi koe malohi o Ijibite; bea teu motuhi ae toko lahi i No.

16 Bea teu tuku ae afi i Ijibite: e mamahi lahi a Belusiumi, bea e hae ua a No, bea e mamahiia a Nofe i he aho kotoabe.

17 E to hifo i he heleta ae kau talavou o Aveni, bea mo Bubasite: bea e alu ae ogo kolo koia ki he bobula.

18 E fakabouli‘i foki ae aho i Tafanisi, o kau ka maumau‘i i ai ae haamoga o Ijibite: bea e gata meiate ia ae fielahi o ene malohi: bea koeuhi koia e ufiufi ia aki ae ao, bea e alu ki he bobula a ene fānau fefine.

19 E behe be a eku fai ae fakamalaia ki Ijibite: bea te nau ilo ko Jihova au.

¶ 20 Bea i he ene hoko ki hono hogofulu ma taha oe ta‘u, i he uluaki mahina, bea mo hono fitu oe aho i he mahina, nae hoko mai ae folofola a Jihova kiate au, o behe,

21 Foha oe tagata, kuou feji‘i ae nima o Felo koe tu‘i o Ijibite; bea vakai, e ikai nonoo ia ke fakamoui, bea e ikai lafoji ia ke toe malohi ke buke ha heleta.

22 Koia oku behe ai e Jihova koe Otua; Vakai, oku ma fai mo Felo koe tu‘i o Iijbite, bea teu feji‘i hono nima, aia oku malohi, bea mo ia kuo mafeji; bea teu fakahomo ae heleta mei hono nima.

23 Bea teu fakamovete ae kakai Ijibite ki he gaahi buleaga, bea teu fakahe‘i akinautolu ki he gaahi fonua.

24 Bea teu fakamalohi ae nima oe tu‘i o Babilone, bea teu ai eku heleta ki hono nima: ka teu feji‘i ae nima o Felo, bea te ne to‘e i hono ao o hage koe to‘e o ha tagata kuo lavea ke mate.

25 Ka teu fakamalohi ae nima oe tu‘i o Babilone, bea e to hifo ki lalo ae nima o Felo; bea te nau ilo ko Jihova au, o kau ka ai eku heleta ki he nima oe tu‘i o Babilone, bea te ne mafao atu ia ki he fonua ko Ijibite.

26 Bea teu fakamovete ae kakai Ijibite ki he gaahi buleaga, bea fakahe‘i akinautolu ki he gaahi fonua; bea te nau ilo ko Jihova au.