¶ 1 KOENI ae higoa oe gaahi faahiga. Mei he botu tokelau, ki he fonua i he hala ki Hetiloni, i he alu ha taha ki Hamati, ko Hasaenani, koe gataaga o Tamasikusi ki he feituu tokelau, o a‘u ki he matātahi o Hamati; he ko hono fakagataaga ia ki hahake mo luluga; koe tofia ia o Tani.

2 Bea hoko moe gataaga o Tani, mei he botu hahake, o a‘u ki he botu luluga, koe tofia ia o Aseli.

3 Bea hoko moe gataaga o Aseli, mei he botu hahake, o a‘u ki hono botu luluga, koe tofia ia o Nafitalai.

4 Bea hoko moe gataaga o Nafitalai, mei he botu hahake, o a‘u ki hono botu luluga, koe tofia ia o Manase.

5 Bea hoko moe gataaga o Manase, mei he botu hahake, o a‘u ki hono botu luluga, koe tofia ia o Ifalemi.

6 Bea hoko moe gataaga o Ifalemi, mei he botu hahake, o a‘u ki hono botu luluga, koe tofia ia o Lubeni.

7 Bea hoko moe gataaga o Lubeni, mei he botu hahake, o a‘u ki hono botu ki luluga, koe tofia ia o Juta.

¶ 8 Bea hoko moe gataaga o Juta, mei he botu hahake, o a‘u ki hono botu luluga, e i ai ae feilaulau, aia te mou fakatabu‘i, koe kaho e ua mano hono laulahi, bea e tatau hono loloa moe gaahi botu kehe mei he botu hahake, o a‘u ki hono botu luluga; bea e tuu ae fale tabu i hono lotolotoga oia.

9 Bea koia te mou fakatabu‘i kia Jihova, koe ua mano moe nima afe a hono loloa, bea koe taha mano a hono laulahi.

10 Bea e tuku ae botu tabu ni ma anautolu oku taulaeiki; koe ua mano moe nima afe hono loloa, ki he botu tokelau, bea ko hono laulahi ki luluga koe taha mano, bea mo hono laulahi ki hahake koe taha mano, bea ko hono loloa i he botu toga koe ua mano, moe nima afe: bea e tuu ae fale tabu o Jihova, i hono lotolotoga oia.

11 Bea e oe kau taulaeiki ia, akinautolu kuo fakatabu‘i i he gaahi foha o Satoki; akinautolu kuo fai eku fekau, bea nae ikai te nau alu he i he ene alu hehe, ae fānau a Isileli, be hage koe alu he ae kau Livai.

12 Bea koe botu fonua koia kuo feilaulau aki, e hoko ia koe mea tabu aubito ma anautolu, i he gataaga oe kau Livai.

13 Bea i he botu oku hagatonu atu moe gataaga oe kau taulaeiki, e i he kau Livai ha botu, ko hono loloa, koe ua mano ma nima afe, bea koe taha mano hono laulahi: ko hono loloa katoa, koe ua mano moe nima afe, bea ko hono laulahi koe taha mano.

14 Bea e ikai te nau fakatau ia, be fetogi aki ha mea, be jiaki‘i ae uluaki fua oe fonua: he koe mea ia kuo fakatabu ma a Jihova.

¶ 15 Bea koe nima afe aia oku toe i hono laulahi, bea oku feouga atu mo hono ua mano ma nima afe, koe botu gofua ia ke tuu ai ae kolo, ke fai ai ae nofo, bea mo hono gaahi fale ki tuaa: bea e tuu ae kolo i hono lotolotoga oia.

16 Bea ko hono gaahi fua eni; ko hono botu tokelau, koe fa afe moe nimageau, mo hono botu ki toga, koe fa afe moe nimageau, ko hono botu ki hahake, koe fa afe moe nimageau, bea ko hono botu ki luluga, koe fa afe moe nimageau.

17 Bea koe botu ki tua kolo koe uageau ma nimagofulu, ki hono botu fakatokelau, bea koe uageau ma nimagofulu ki he botu toga, bea koe botu ki hahake, koe uageau ma nimagofulu, bea ki hono botu ki luluga, koe uageau moe nimagofulu.

18 Bea ko hono botu oku toe i hono loloa, o feaga‘i atu moe botu tabu kuo feilaulau aki, koe taha mano ki he botu hahake, bea taha mano ki he botu luluga; bea e feagai atu ia moe botu tabu kuo feilaulau aki, bea ko hono tubu oia e tuku koe mea kai anautolu oku tauhi ki he kolo.

19 Bea e fili mai akinautolu e tauhi ki he kolo mei he gaahi faahiga kotoabe o Isileli.

20 Ko hono katoa oia e feilaulau aki, koe ua mano ma nima afe hono botu fakaloloa, bea ua mano ma nima afe hono fakamāukubu: te mou ai ke botubotu malie ae feilaulau tabu, bea moe tuuga oe kolo.

21 Bea ko hono toe i hono botu fakatouoji oe feilaulau maonioni, e tuku ia moe tu‘i, bea koe tuuaga oe kolo e alu feouga moe ua mano ma nima afe oe feilaulau, ki hono botu fakahahake, bea feouga ki hono botu luluga, moe ua mano ma nima afe ki hono gataaga fakaluluga, ke fehagaaki moe vahe ki he tu‘i: bea e tuku ia koe feilaulau maonioni; bea e tuu ae botu tabu oe fale i hono lotolotoga.

22 Bea e oe tu‘i ae botu mei he tofia oe kau Livai, bea mei he vahe oe kolo, koeuhi oku tuu ia i he botu vahe oe tu‘i, i he vahaa oe gataaga o Juta, bea moe gataaga o Benijimani.

¶ 23 Bea koeuhi koe gaahi faahiga oku toe, e ma‘u e Benijimani ae tofia mei he botu hahake, o a‘u ki he botu luluga.

24 Bea mei he gataaga o Benijimani, mei hono botu hahake, o a‘u ki he botu ki luluga, koe tofia ia o Simione.

25 Bea mei he gataaga o Simione, mei hono botu hahake, o a‘u ki he botu ki luluga, koe tofia ia o Isaka.

26 Bea mei he gataaga o Isaka, mei hono botu hahake, o a‘u ki he botu ki luluga, koe tofia ia o Sebuloni.

27 Bea mei he gataaga o Sebuloni, mei hono botu hahake, o a‘u ki be botu ki luluga, koe tofia ia o Kata.

28 Bea koe gataaga o Kata, i hono botu fakatoga, e fai atu ki he toga o gata mai mei Tema, o a‘u ki he gaahi vai i Meliba‐Ketesi, moe vaitafe oku tafe atu ki he Tahi Lahi.

29 Ko eni ia, ae fonua aia te mou vahevahe i he talotalo ki ai, koe tofia oe gaahi faahiga o Isileli, bea ko ho nau tofia eni, oku behe e Jihova koe Otua.

¶ 30 Bea koe gaahi fua eni oe kolo: i hono botu tokelau, ko hono fua koe fa afe moe nimageau.

31 Bea e ui aki ae higoa oe gaahi faahiga o Isileli, ae gaahi mataba oe kolo: koe mataba e tolu ki he tokelau; koe mataba e taha kia Lubeni, moe mataba e taha kia Juta, bea moe mataba e taha kia Livai.

32 Bea ko hono botu fakahahake, koe fa afe moe nimageau: bea e tolu a hono mataba; koe mataba e taha kia Josefa, moe mataba e taha kia Benijimani, bea moe mataba e taha kia Tani.

33 Bea ko hono fua ki he botu ki toga, koe fa afe moe nimageau; bea e tolu a hono mataba; koe mataba e taha kia Simione, moe mataba e taha kia Isaka, bea moe mataba e taha kia Sebuloni.

34 Bea ko hono botu ki luluga, koe fa afe moe nimageau; bea mo hono mataba e tolu; koe mataba e taha kia Kata, moe mataba e taha kia Aseli, bea moe mataba e taha kia Nafitalai.

35 Ko hono fua takatakai nae meimei taha mano moe valu afe: bea e ui ae kolo mei he aho koia o fai ki mui, Koe afioaga o Jihova.