¶ 1 NAE hoko foki kiate au ae folofola a Jihova, o behe,

2 Koeni, akoe foha oe tagata, e ikai koa te ke fakamāu ae kolo bani toto? io, te ke fakaha kiate ia a ene gaahi fakalielia.

3 Bea ke toki behe, Oku behe e Jihova koe Otua, oku liligi toto e he kolo i hono lotolotoga oia, koeuhi kae hoko hono aho, o ne gaohi maana ae gaahi tamabua, ka ne fakalielia aki ia.

4 Kuo ke halaia koe i he toto kuo ke liligi; bea kuo ke fakalielia‘i koe ekoe i he gaahi tamabua aia kuo ke gaohi; bea kuo ke fakaofi ekoe ho gaahi aho, bea kuo hokojia ni ho gaahi ta‘u: koia ia kuou gaohi koe koe manukiaga oe hiteni, moe lumaaga ki he gaahi fonua kotoabe.

5 E manuki kiate koe akinautolu kotoabe oku ofi, mo ia oku mamao, akoe kuo fakalielia ho higoa, bea kuo fakamamahi‘i aubito.

6 Vakai, nae malohi ke liligi toto a ho gaahi houeiki kotoabe iate koe.

7 Kuo nau liaki iate koe ae tamai moe fa‘e: kuo nau fai fakamalohi ki he muli iate koe: bea iate koe kuo nau fakamamahi‘i ae tamai mate moe kau fefine nae mate a ho nau unoho.

8 Kuo ke manuki a eku gaahi mea maonioni, bea kuo ke fakalielia‘i a hoku gaahi aho tabu.

9 Oku iate koe ae kau tagata oku feaveaki lea ki he liligi oe toto: bea oku iate koe akinautolu oku kai i he gaahi mouga: oku fai ae fakalielia iate koe.

10 Kuo nau jio iate koe ki he ma oe nau tamai: kuo nau fakatokilalo ia, aia nae fakatabu‘i i hono mahaki.

11 Bea kuo taki taha tono‘i ae unoho o hono kaugaabi, bea kuo taki taha fai kovi mo hono ofefine i he fono, bea kuo taki taha fai kovi mo hono tuo fefine, ae ofefine o ene tamai.

12 Kuo nau atu mea iate koe ke liligi ni ae toto; kuo ke ma‘u ae totogi moe tubu oe koloa taetotonu, bea kuo ke fakatootoo ae tubu o hoo koloa i he fai fakamalohi ki ho kaugaabi, bea kuo ke fakagalogalo‘i au, oku behe e Jihova koe Otua.

13 Vakai, koia ia kuou baji tataha ai hoku nima, koe mea i he koloa taetotonu kuo ke ma‘u, bea moe toto kuo liligi i loto iate koe.

14 E faa kataki koa ho loto, be malohi ho nima i he aho te ta fai ai mo koe? ko au ko Jihova kuou lea aki ia, bea teu fai ki ai.

15 Bea teu fakahe‘i koe ki he gaahi hiteni mo fakamovetevete koe ki he gaahi fonua, bea teu fakaojioji mei ho lotolotoga a hoo fakalielia.

16 Bea e fakalielia‘i koe ekoe be i he ao oe hiteni, bea te ke ilo au, ko au ko Jihova.

¶ 17 Bea nae hoko mai ae folofola a Jihova kiate au, o behe,

18 Foha oe tagata, kuo hoko ae fale o Isileli kiate au koe efinaga mea: kuo tatau kotoabe akinautolu moe balasa, moe tini, moe ukamea, moe bulu i he loto tutuaga mea; bea kuo nau tatau be moe toega uli oe siliva.

19 Koia oku behe ai e Jihova koe Otua: Koe mea i hoo mou hoko koe efinaga mea, vakai, koia ia teu tanaki akimoutolu ki he lotolotoga o Jelusalema.

20 O hage oku tanaki ki he lotolotoga oe tutuaga mea ae siliva, moe balasa, moe ukamea moe bulu, bea moe tini, kae tafu ae afi ki ai, ko hono haka ke vai; e behe mo eku tanaki koe i hoku houhau mo eku tubutamaki, bea teu tuku koe i ai, bea te ke hoko koe vai.

21 Io, teu tanaki akimoutolu, bea teu ifi kiate kimoutolu i he afi o hoku houhau, bea e fakavai akimoutolu i hono lotolotoga oia.

22 O hage oku fakavai ae siliva i he loto tutuaga mea, e behe moe fakavai akoe i hono lotolotoga; bea te mou ilo ko au ko Jihova kuou liligi hoku houhau kiate kimoutolu.

¶ 23 Bea nae hoko mai ae folofola a Jihova kiate au, o behe,

24 Foha oe tagata, ke ke behe kiate ia, Koe fonua koe, oku ikai ke fakamaa, be uheina, i he aho oe houhau.

25 Kuo kau taha ae kau kikite iate ia, o hage koe laione gugulu, ke haehae ene mea kai, kuo nau faa buku hake ae gaahi laumalie: kuo nau ave ae koloa moe gaahi mea mahuiga; kuo nau fakamajiva unoho ae fefine toko lahi i ai.

26 Kuo maumau‘i eku fono e he ene kau taulaeiki, bea kuo nau fakalielia‘i a eku gaahi mea maonioni: nae ikai te nau ai ke iloga ae maonioni moe fakalielia, bea nae ikai foki te nau ai ke iloga aia oku taemaa mo ia oku maa, bea kuo tafoki ho nau mata mei hoku gaahi aho tabu, bea kuo fakalielia‘i au iate kinautolu.

27 Oku hage ae houeiki iate ia, koe faga ulofi oku haehae e nau mea kai, ke liligi toto, mo maumau laumalie, bea ke ma‘u koloa taetotonu.

28 Bea kuo laku ae lahe taebibiki e he ene kau kikite kiate kinautolu, kuo nau jio ki he vaiga mo kikite aki ae loi kiate kinautolu, o nau behe, Oku behe, e Jihova koe Otua, ka nae ikai folofola a Jihova.

29 Kuo fai ae fakamalohi e he kakai oe fonua, o nau fai ae kaihaa, moe fakamamahi ae majiva moe baea: io, kuo nau fakamalohi tae totonu ki he kau muli.

30 Bea naaku kumi ki ha tagata iate kinautolu ke ne fakamaoboobo ae a mo tuu i he ava i hoku ao koeuhi koe fonua, koeuhi ke oua naaku fakaauha ia; ka nae ikai iloa ha taha.

31 Koia kuou liligi atu ai a hoku houhau kiate kinautolu; kuou fakaauha akinautolu i he afi o hoku tubutamaki: Oku behe e Jihova koe Otua, kuou totogi ki ho nau tumuaki be onautolu ae nau faiaga.