¶ 1 BEA i he ene hoko ki hono hogofulu ma ua oe ta‘u, i hono hogofulu ma ua oe mahina, bea i he uluaki aho oe mahina, nae hoko mai ae folofola a Jihova kiate au, o behe,

2 Foha oe tagata, te ke fai ha tagilāulāu koeuhi ko Felo koe tu‘i o Ijibite, bea ke behe kiate ia, Oku ke hage koe koe laione mui i he gaahi buleaga, bea oku ke hage koe tofuaa i he tahi, bea naa ke ha‘u koe mei ho gaahi vaitafe, bea kuo ke fakagau‘e‘i ae vai aki ho va‘e, mo ke fakauli‘i ho nau gaahi vaitafe.

3 Oku behe e Jihova koe Otua; koia ia teu folahi atu ai hoku kubega kiate koe moe niihi mei he kakai toko lahi; bea te nau fuji hake koe i hoku kubega.

4 Bea teu toki liaki koe i he fonua, bea teu li atu koe ki he ataatā oe vao, bea e heka kiate koe ae manu buna kotoabe oe lagi, bea teu fakamakona aki koe ae faga manu kotoabe o mamani.

5 Bea teu ai ho kakano ki he gaahi mouga, mo fakabito aki ho agaaga ae gaahi telea.

6 Teu lomaki‘i foki ae fonua oku ke tētē ai aki ae toto, o a‘u ki he gaahi mouga; bea e bito ai ae gaahi vaitafe.

7 Bea kau ka ifi koe ke mate teu uufi ae lagi, mo gaohi ke fakabouli hono gaahi fetuu; teu ufiufi ae laa aki ae ao, bea e ikai tuku mai e he mahina a hono māmā.

8 Teu gaohi ke bouli kiate koe ae gaahi māma gigila kotoabe oe lagi, bea e ai moe fakabouli ki ho fonua, oku behe e Jihova koe Otua.

9 Teu fakamamahi foki ae loto oe kakai toko lahi, o kau ka ave ho kau bobula ki he gaahi buleaga, ki he gaahi fonua aia nae ikai te ke ilo‘i.

10 Io, teu fakatubu ae ofo kiate koe i he kakai lahi, bea e lilika fakamanavahe ho nau gaahi tu‘i, koeuhi ko koe, o kau ka vilo eku heleta i ho nau ao; bea te nau tetetete mau ai be taki taha ae tagata, telia a ene moui aana, i he aho koia te ke higa ai.

¶ 11 He oku behe e Jihova koe Otua; e hoko mai kiate koe ae heleta ae tu‘i o Babilone.

12 Teu fakahiga ae toko lahi iate koe i he heleta ae kau malohi, koe kau to‘a akinautolu kotoabe oe gaahi buleaga: bea te nau maumau‘i ae fieeiki a Ijibite, bea e fakaauha a hono kakai kotoabe.

13 Teu fakaojioji foki ae gaahi manu kotoabe i ai, i hono gaahi vee vai; bea e ikai toe fakagau‘e‘i ia e he va‘e oe tagata, be fakagau‘e‘i ia e he va‘e o ha faga manu.

14 Bea teu toki ai ke loloto e nau gaahi vai, bea teu gaohi e nau gaahi vaitafe ke tafe hage koe lolo, oku behe e Jihova koe Otua.

15 O kau ka fakaauha ae fonua ko Ijibite, bea ka majiva ae fonua i he gaahi mea koia nae mahu ai, o kau ka teia kotoabe akinautolu oku nofo ai, te nau toki ilo, ko Jihova au.

16 Ko eni ae tagilāulāu, aia te nau tagi mamahi ai koeuhi koia: e mamahi koeuhi koia ae ofefine oe gaahi buleaga: te nau mamahi koeuhi koia, io, a Ijibite, bea mo hono kakai kotoabe, oku behe e Jihova koe Otua.

¶ 17 Nae behe foki i hono hogofulu ma ua oe ta‘u, mo hono hogofulu ma nima oe aho i he mahina, nae hoko mai ae folofola a Jihova kiate au, o behe,

18 Foha oe tagata, tagi mamahi koeuhi koe kakai o Ijibite, bea li hifo akinautolu ki lalo, aia moe gaahi ofefine oe buleaga ogoogo, o a‘u ki he botu māulalo o mamani, fakataha mo kinautolu oku alu hifo ki he luo.

19 Oku ke toulekeleka lahi hake koe i ahai? alu hifo, bea ke tokoto fakataha hifo moe kau taekamu.

20 Te nau to hifo i he lotolotoga onautolu oku tamate‘i aki ae heleta: kuo tukuage ia ki he heleta; tohoaki ia, bea mo hono kakai kotoabe.

21 E lea mai kiate ia ae malohi iate kinautolu oku malohi mei loto heli, mo kinautolu kuo tokoni kiate ia: kuo nau mole hifo, kuo nau tokoto koe taekamu, koe kau tamate‘a e he heleta.

22 Oku i ai a Asilia mo hono kakai kotoabe: oku tuu takatakai iate ia hono faitoka: kuo nau mate kotoabe, koe to i he heleta:

23 Aia oku tuu hono faitoka i he tafaaki luo, bea oku tuu takatakai hono kakai i hono faitoka: kuo mate kotoabe akinautolu koe to i he heleta, aia nae fakamanavahe aki akinautolu i he e nau kei i he fonua oe moui.

24 Oku i ai a Ilami mo hono kakai, oku tuu takatakai i hono faitoka, koe kau mate kotoabe akinautolu, koe to i he heleta, kuo nau alu hifo ki he botu māulalo o mamani fakataha moe taekamu, akinautolu naa nau manavahe ki ai, i he fonua oe moui; ka kuo nau fua be e nau ma fakataha mo kinautolu oku alu hifo ki he luo.

25 Kuo nau tuku hono mohega i he lotolotoga oe kau mate tamate‘a mo hono kakai kotoabe: oku tuu takatakai iate ia hono gaahi faitoka: koe kau taekamu kotoabe akinautolu, kuo tamate‘i aki ae heleta: ne ogo ae manavahe kiate ia i he fonua oe moui, ka kuo nau fua be e nau ma fakataha mo kinautolu oku alu hifo ki he luo: kuo ai fakataha ia mo kinautolu kuo tamate‘i.

26 Oku i ai a Meseke, mo Tubale, bea mo ene kakai: oku tuu takatakai iate ia hono gaahi faitoka: koe kau taekamu kotoabe akinautolu, kuo tamate‘i aki ae heleta, ne ogo naa nau fai fakamanavahe i he fonua oe moui.

27 Bea e ikai te nau tokoto fakataha moe kau to‘a kuo higa i he kau taekamu, akinautolu kuo alu hifo ki heli moe nau mahafu tau: bea kuo nau ai e nau heleta ki lalo i ho nau ulu, ka e iateki nautolu be e nau gaahi hia, ne ogo koe kau fakamanavahe akinautolu i he fonua oe moui ki he kakai malohi.

28 Koe mooni, e haaki koe ke lailai i he lotolotoga oe kau taekamu, bea te ke tokoto fakataha mo kinautolu kuo tamate‘i aki ae heleta.

29 Koena a Itomi, mo hono gaahi tu‘i, mo hono houeiki, ko kinautolu moe nau malohi kuo fakatokoto fakataha mo kinautolu kuo tamate‘i aki ae heleta: te nau tokoto fakataha moe kau taekamu, mo kinautolu oku alu hifo ki he luo.

30 Oku i ai ae houeiki mei he botu tokelau oku nau katoa, moe kakai Saitoni kotoabe, kuo to hifo fakataha moe kau mate tamate‘a; koe mea i he e nau lilika kuo nau ma ki he e nau malohi; bea oku nau tokoto koe kau taekamu fakataha mo kinautolu kuo tamate‘i aki ae heleta, bea te nau fua e nau ma fakataha mo kinautolu oku alu hifo ki he luo.

31 E mamata a Felo kiate kinautolu, bea e fiefia ia mo hono kakai kotoabe, io, a Felo mo ene kau tau kotoabe nae tamate‘i aki ae heleta, oku behe e Jihova koe Otua.

32 He kuou fai eku fakamanavahe i he fonua oe moui: bea e fakatokoto ia ki he lotolotoga oe kau taekamu, fakataha mo kinautolu kuo tamate‘i aki ae heleta, io, a Felo mo hono kakai, oku behe e Jihova koe Otua.