¶ 1 BEA hili ia naa ne omi au ki he fale tabu, o ne fua ae gaahi bou, koe kiubite e ono hono laulahi i he botu e taha, bea ono hono kiubite i he botu e taha, he ko hono laulahi ia oe falefehikitaki.

2 Bea ko hono laulahi oe mataba koe kiubite e hogofulu; bea koe kau mataba koe kiubite e nima i hono botu e taha, bea koe kiubite e nima i hono botu e taha: bea naa ne fua hono loloa koe kiubite e fagofulu; bea ko hono laulahi koe kiubite e uofulu.

3 Bea nae toki alu ia ki loto, bea ne fua ae bou oe mataba ko kiubite e ua; bea ko mataba ko kiubite e ono; bea ko hono laulahi oe mataba ko kiubite e fitu.

4 Nae behe mo ene fua a hono loloa, koe kiubite e uofulu; bea ko hono laulahi i he mua fale tabu koe kiubite e uofulu: bea naa ne behe mai kiate au, Koe botu tobu tabu eni.

5 Hili ia naa ne fua ae holiji oe fale, koe kiubite e ono: bea koe laulahi oe gaahi botu fale ki tua, aia nae takatakai aki ae fale i hono botu kotoabe, koe taki taha ae kiubite e fa.

6 Bea nae fata tolu ae gaahi botu fale ki tua, bea taki tolugofulu a hono fakaotu; bea nae faaki hono gaahi lalago ki he a kitua, koeuhi ke malohi, ka nae ikai ke a‘u ki he holiji oe fale.

7 Bea nae ai hono fakaataatā moe hala fakatakamilo, nae alu hake ki oluga ki he gaahi botu fale: he nae alu hake o takatakai ae fale e he hala fakatakamilo: bea nae fakaaau o atāage ae gaahi botu fale o fakatatau mo ene alu ki oluga o fua fai mei lalo.

8 Bea naaku mamata foki ki he maoluga oe fale i hono takatakai hake: koe keli hono tuuga oe gaahi botu fale ki tua, koe kaho katoa e taha nae ono hono kiubite loloa.

9 Ko hono matolu oe holiji ki he botu fale ki tua, koe kiubite e nima: bea koe botu nae tuku ke atā koe tuuaga ia oe gaahi botu fale ki lotoa.

10 Bea ko hono fakavahavaha oe gaahi botu fale, koe kiubite e uofulu, bea nae behe fakatakamilo hake be i he fale katoa.

11 Bea nae haga atu ae mataba oe gaahi botu fale ki tua, ki he botu nae tuku ke ataatā, koe mataba e taha ki he botu tokelau, bea koe taha ki he botu toga: bea koe laulahi oe botu nae tuku atā be, koe kiubite e nima hono fua takatakai.

12 Bea koeni, koe fale aia nae tuu ki mua i he ataatā i he botu gataaga ki luluga, ko hono laulahi koe kiubite e fitugofulu: bea ko hono matolu oe a nae takatakai aki ae fale koe kiubite e nima, bea ko hono loloa, koe kiubite e hivagofulu.

13 Koia naa ne fua ae fale, koe kiubite e teau a hono loloa; bea ko hono botu ataatā, bea moe fale, fakataha mo hono gaahi a, ko hono loloa, koe kiubite e teau;

14 Moe laulahi foki oe mata fale, mo hono botu ataatā ki he feituu hahake, koe kiubite ia e teau.

15 Bea naa ne fua hono loloa oe fale, i he botu oku haga ki he botu ataatā, aia nae i tua i ai, mo hono gaahi hala ki tua fale i hono botu fakatouoji, koe kiubite ia e teau, aia moe botu tobu tabu ki loto, moe gaahi fale hala oe lotoa;

16 Ae gaahi bou oe mataba, moe gaahi katuba fājii, moe gaahi hala ki tua, o takatakai hake i hono fata e tolu, aia nae haga mai ki he mataba, nae aofi aki kotoabe ia ae akau o fai mei he fuga kelekele o a‘u hake ki he gaahi katuba, bea nae aofi foki moe gaahi katuba;

17 Nae fai fakafuofua be o a‘u ki oluga i he mataba, io, o a‘u ki he fale ki loto mo tua, o takatakai hake i he a i loto mo tua.

18 Bea nae teu‘i aki ia ae gaahi jelubi, moe gaahi akau koe boga, he nae fevahaanaki aki ae akau koe boga, ae gaahi jelubi; bea nae taki ua ae mata oe jelubi;

19 Koia nae haga ae mata oe tagata ki he akau koe boga, i hono botu e taha, bea haga ae mata oe laione mui ki he akau koe boga, i hono botu e taha; nae behe hono gaohi o takatakai i he fale o oji.

20 Nae gaohi ae jelubi, moe gaahi boga, o fua fai mei he fuga kelekele o a‘u ki he botu ki oluga i he mataba, bea i he a oe fale tabu.

21 Nae fua ke botubotutatau ae bou oe fale tabu, moe mata fale oe botu tobu tabu; naa na mata tatau oji be.

22 Koe kiubite e tolu ko hono maoluga ia oe feilaulauaga akau, mo hono loloa, koe kiubite e ua; bea ko hono tuliki, mo hono botu fakaloloa, mo hono kaokao nae gaohi aki ae akau: bea naa ne behe mai kiate au, Koe balebale ia aia oku i he ao o Jihova.

23 Bea nae ua ae mataba i he fale tabu, bea moe botu tobu tabu.

24 Bea nae taki ua ae botu mataba nae tautau; koe botu mataba e ua ki he mataba e taha, bea ua ki he mataba e taha.

25 Bea nae togi ki ai, moe mataba oe fale tabu ae jelubi, moe gaahi boga, o tatau mo ia nae i he gaahi a; bea nae aofi aki ae laubaba matolu ae mata fale oe fale hala kitua.

26 Bea nae i ai ae gaahi katuba fājii, moe gaahi boga, i hono botu fakatouoji, bea moe gaahi botu oe fale hala, moe gaahi botu fale oe fale lahi, moe gaahi laubaba matolu.