Moadto Ko Didto sa Umaabut nga Adlaw
Sa dihang hapit nako mag-12 anyos, naghinam-hinam ko nga moadto sa templo. Ang akong pamilya ug ako naghisgot kon unsay bation kon maanaa sa sulod niini, ug nagtan-aw ko sa mga litrato sa sulod sa templo usab.
Mga pipila ka semana sa wala pa ko mohimo og mga bunyag diha sa templo, ang akong pamilya adunay espesyal nga family home evening. Kami naminaw sa talagsaong mga istorya kabahin sa among mga katigulangan ug nasayran asa sila nagpuyo ug sa unsang paagi sila nagkinabuhi. Gani akong nasayran nga ang akong lolo sa sungkod naigo sa kilat ug naluwas! Pipila sa akong mga katigulangan gikan sa England, busa ang akong gagmayng igsoon nga mga lalaki ug ako nag-kolor sa mga litrato sa bandila sa England. Mibati ko nga nasumpay sa akong mga katigulangan.
Ang templo nindot kaayo sa sulod sama sa gawas. Ang tanan buotan, ug adunay mainiton ug malinawong diwa didto. Lahi kini kaysa akong nabati sukad. Ang tanan ingon og hingpit gyud. Ang akong tiya nagdala og mga ngalan sa paryente kinsa wala pa mabunyagi. Samtang kami nagpaabut, ang akong mama ug tiya ug ako naghunahuna unsay panagway niining mga babaye sa dihang nagpuyo sila sa kalibutan mga 300 ka tuig na ang milabay. Espesyal kadto nga gibunyagan ko sa akong papa alang kanila.
Nagtan-aw sa tanan nga nakaputi, mibati ko nga napalibutan sa mga anghel. Ang templo mora og langit dinhi sa yuta.
Paghulagway pinaagi ni Jennifer Tolman