Ang LDS Charities: 30 ka Tuig nga Nagserbisyo

Ang baruganan sa pag-alagad sa atong isig ka tawo dili bag-o. Sa tanang mga dispensasyon, ang Simbahan mahalaron sa pagtabang sa kabus ug timawa.

Traynta ka tuig ang milabay, niadtong Enero 27, 1985, ang pagpahinungod gipakita atol sa usa ka espesyal nga puasa diin ang mga miyembro sa Simbahan midonar og US $6 ka milyon sa pagtabang sa mga biktima sa kagutom sa Ethiopia. Kini mitimaan sa sinugdanan sa LDS Charities. Sa mao gihapon nga tuig, ang pagpuasa niadtong Nobyembre nakatigum og laing $5 ka milyon alang sa tabang sa kagutom. Kadtong duha ka mga pagpuasa nakapapaspas pag-ayo sa buhat sa atong panahon.

Sa 30 ka tuig sukad niadto nga mga pagpuasa, ang Simbahan nakahatag og $1.2 billion isip tabang ngadto sa mga tawo nga nag-antus. Naglakip kana sa pagkaon, kapasilongan, medikal nga suplay, sinina, ug mga butang. Dugang pa, ang LDS Charities mihatag og long-term nga tabang pinaagi sa proyekto nga naghatag og mga wheelchair, bakuna, limpyo nga tubig, nutrisyon sa pamilya, pag-atiman sa panan-aw, ug pag-atiman sa inahan ug bag-ong natawo nga bata. Ang Simbahan nakig-partner sa ubang maayong humanitarian organizations aron mapahimuslan pag-ayo ang tanang mga donasyon.

Si Presidente Thomas S. Monson sa kasagaran nagtudlo nga, isip mga miyembro sa Simbahan, kita adunay responsibilidad sa pagtabang sa mga gigutom, walay kapuy-an, ug gisakit. Ang mga miyembro sa Simbahan midawat sa hagit. Walay daghang lanog o pormal nga pasalamat, sila sa hilum nakatampo og minilyon ka mga oras sa pagserbisyo ug gatusan ka minilyon ka dolyares. Agi og dugang sa paghatag ngadto sa humanitarian fund sa donation slip, mga miyembro adunay gihatag ngadto sa LDS Philanthropies, nagserbisyo og misyon, maayong mga higala ug mga silingan, miboluntaryo sa welfare facilities o sa komunidad, ug mihatag sa ilang panahon ug gugma ngadto sa gatusan ka liboan nga kasaligan nga lokal nga mga organisasyon.

Samtang sila nagbuhat niini, nagsugod sila sa pagtuman unsa ang gitudlo sa Manluluwas mahitungod sa pag-atiman sa kabus ug timawa:

“Kay gigutom ako ug inyo ako nga gipakaon: Giuhaw ako ug inyo ako nga gipainom: Langyaw ako ug ginahangop ninyo ang pagpasaka kanako:

“… Nga maingon nga gibuhat ninyo kini ngadto sa usa sa labing gagmay niini … , gibuhat usab ninyo kini kanako.” (Mateo 25:35, 40).