Jesukristo—Atong Prinsipe sa Kalinaw
Ni Elder Russell M. Nelson
Sa Korum sa Napulog Duha ka mga Apostoles
Gikan sa pagkigpulong sa 2013 nga Debosyonal sa Pasko.
Ang kalinaw mahimong moabut sa tanang nagtinguha sa Prinsipe sa Kalinaw.
Si Kristo Nagtawag sa Duha ka Disipulo, ni Gary E. Smith
Ang pagtutok diha sa Ginoo ug sa mahangturong kinabuhi makatabang kanato sa pagbuntog sa tanang hagit sa mortalidad. Ang dili hingpit nga mga tawo nagpuyo sa yuta uban sa lain pang mga dili hingpit. Ang atong napukan nga kalibutan puno sa sobrang utang, gubat, kalamidad, sakit, ug kamatayon.
Ang personal nga mga hagit moabut. Bisan unsa pay gikabalak-an, matag usa nato nangandoy nga makabaton og kalinaw.
Ang akong mensahe may kalabutan sa bugtong tinubdan sa tinuod ug mahangturong kalinaw, si Jesukristo—atong Prinsipe sa Kalinaw.1
Si Jesus miingon, “Paduola kanako ang gagmayng kabataan, ug ayaw sila ninyo pagpugngi: kay ang gingharian sa langit ila sa mga sama kanila.”2
Makahatag siya og kalinaw sa kinabuhi niadtong naapektuhan sa gubat. Ang mga pamilya nga nabalda gumikan sa katungdanan sa militar dunay handumanan sa gubat, nga nasilsil sa akong hunahuna atol sa Korean War.
Ang mga gubat sa atong panahon mas moderno apan nakapalisud gihapon sa pamilya. Kadtong nag-antus niini makadangup sa Ginoo. Ang Iyang mensahe mao ang mensahe sa kalinaw sa kalibutan ug panagdait sa katawhan.3
Ang kalinaw moabut niadtong mibati og kasakit. Ang ubang lawas samdan. Ang uban espirituhanong nasakit tungod sa nawala nga minahal o ubang emosyonal nga trauma. Mga kaigsoonan, ang kalinaw mahimong moabut sa inyong kalag samtang nag-ugmad kamo og pagtuo sa Prinsipe sa Kalinaw.
“Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, … o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila.”4
“Kay Ako nakakita nga ang inyong hugot nga pagtuo igo nga Ako moayo kaninyo.”5
Ang kalinaw mahimong moabut niadtong nag-antus sa kasubo. Nagagikan man ang kasubo sa sayop o sala, ang gikinahanglan lamang sa Ginoo mao ang tinuod nga paghinulsol. Ang kasulatan naghangyo nato nga “likayi ang mga pangibog nga iya sa kabatan-on: … [ug] simba sa Ginoo uban sa putli nga kasingkasing.”6 Dayon ang Iyang “balsamo sa Galaad” makaayo sa masakiton nga kalag.7
Hunahunaa ang kausaban ni John Newton, natawo sa London niadtong 1725. Naghinulsol siya sa iyang makasasala nga kinabuhi isip negosyante og mga ulipon [slave trader] aron mahimong usa ka Anglican clergyman. Nianang dakong kausaban sa kasingkasing, si John misulat sa mga pulong sa himno nga “Amazing Grace [Kahibulongan nga Grasya].”
Kahibulongan nga grasya! Kanindot paminawon
Nga miluwas sa usa ka makasasala sama nako.
Kaniadto nahisalaag, apan karon dili na,
Kaniadto buta, apan karon makakita na.8
“May labi pang kalipay unya didto sa langit tungod sa usa ka makasasala nga magahinulsol.”9
Ang kalinaw mahimong moabut niadtong nabug-atan:
“Umari kanako, kamong tanan nga nabudlay ug nabug-atan, ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing: ug makakaplag kamog pahulay alang sa inyong mga kalag.
“Kay masayon ang akong yugo, ug magaan ang akong luwan.”10
Ang kalinaw mahimong moabut niadtong nagbangutan. Ang Ginoo miingon, “Bulahan ang mga nagamasulob-on kay sila pagalipayon.”11 Samtang nag-antus kita sa pagkamatay sa usa ka minahal, mapuno kita sa kalinaw sa Ginoo pinaagi sa mga paghunghong sa Espiritu.
“Kadtong namatay tungod kanako dili makatilaw og kamatayon, kay kini matam-is ngadto kanila.”12
“Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.”13
“Ako mao ang pagkabanhaw, ug ang kinabuhi: ang mosalig kanako, bisan siya mamatay, mabuhi siya:
“Ug ang tanan nga buhi ug nagasalig kanako dili na gayud mamatay.”14
Ang kalinaw mahimong moabut sa tanang nagtinguha sa Prinsipe sa Kalinaw. Ang Iyang mensahe mao ang mensahe nga malumo ug makaluwas nga gidala sa atong mga misyonaryo sa tibuok kalibutan. Nagsangyaw sila sa ebanghelyo ni Jesukristo nga gipahiuli Niya pinaagi kang Propeta Joseph Smith. Ang mga misyonaryo nagtudlo niining makapausab sa kinabuhi nga mga pulong sa Ginoo: “Kon nahigugma kamo kanako, inyong pagatumanon ang akong mga sugo.”15
Ang kalinaw mahimong moabut sa tanan nga naglakaw sa pamaagi sa Manluluwas. Ang iyang imbitasyon gipahayag sa mahigugmaong mga pulong: “Sumunod kanako.”16
Atong daygon sa awit ang Prinsipe sa Kalinaw,17 kay Siya mobalik pag-usab. Dayon “ang himaya sa Ginoo igapadayag, ug ang tanan nga unod sa tingub makakita niini.”18 Isip Mesiyas, Siya mohari isip Hari sa kaharian ug Ginoo sa kaginoohan.19
Samtang kita mosunod ni Jesukristo, Siya mogiya kanato aron makapuyo uban Niya ug sa atong Langitnong Amahan, uban sa atong pamilya. Sa atong daghang hagit sa pagkamortal, kon magpabilin kitang matinud-anon sa mga pakigsaad, kon kita molahutay sa katapusan, kita mahimong angayan nianang labing mahinungdanon sa tanang gasa sa Dios, ang kinabuhing dayon.20 Sa Iyang balaang presensya, ang atong pamilya magkauban sa kahangturan.
Hinaut nga panalanginan kamo sa Dios, akong mga kaigsoonan. Ug hinaut matagamtam ninyo ang tanang panalangin sa Ginoo—ang atong Prinsipe sa Kalinaw.