Mensahe sa Unang Kapangulohan
Maayo Ang Tanan
Ni Presidente Dieter F. Uchtdorf
Ikaduhang Magtatambag sa Unang Kapangulohan
Ang Pioneer, ni Robert T. Barrett, sa maayong kabubut-on sa Church History Museum
Samtang maghunahuna ko kabahin sa atong pioneer nga panulundon, usa sa akong mahinumduman mao ang himno nga “Dali, Dali Kamo mga Santos” (Mga Himno ug mga Awit sa mga Bata, nu. 2). Kadtong mibuhat sa taas nga panaw padulong sa Walog sa Salt Lake kanunay mokanta niining himno panahon sa ilang paglakaw.
Nasayud gyud ko nga dili maayo ang tanan alang niining mga Santos. Sila misinati og mga sakit, kainit, kakapoy, katugnaw, kahadlok, kagutom, kasakit, katahap, ug gani kamatayon.
Bisan pa man nga sila adunay rason sa pagsinggit, “Dili maayo ang tanan,” sila nakapalambo og kinaiya nga dili gyud nato malikayan nga madayeg karon. Wala nila igsapayan ang ilang mga kalisud alang sa mahangturong mga panalangin. Sila mapasalamaton sa ilang mga kahimtang. Bisan pa sa ebidensya sa kalisud, sila kinasingkasing nga mikanta uban sa ilang tibuok kalag, “Maayo ang tanan!”
Ang atong pagdayeg sa mga pioneer haw-ang lang kon dili nato kini ikonsiderar sa atong kaugalingon. Mohisgot ko og pipila sa ilang mga kinaiya nga nakapadasig nako samtang namalandong ko sa ilang sakripisyo ug pasalig.
Kalooy
Ang mga pioneer nag-alima sa usag usa bisan unsa pa ang ilang sosyal, ekonomiya, o politikanhon nga background. Bisan kon kini nakapahinay sa ilang paglambo, nakapalisud nila, o nagkinahanglan og personal nga sakripisyo ug trabaho, sila nagtinabangay.
Sa atong kalibutan nga dinasig sa tumong ug mapihigon, ang mga tumong sa indibidwal o grupo mas mag-una pa kaysa pag-atiman sa uban o sa paglig-on sa gingharian sa Dios. Sa karon nga katilingban, ang pagkab-ut og pihong ideyolohiya nga mga tumong mahimong makita nga sukod sa atong bili.
Ang paghan-ay ug pagkab-ut sa mga tumong mahimong maayo kaayo nga butang. Apan kon ang kalampusan sa pagkab-ut sa mga tumong makapahimo nato sa pagbaliwala o pagpasakit sa uban, ang bili niana nga kalampusan mahimong sobra ra ka kaayo.
Ang mga pioneer nag-atiman sa ilang mga ka-grupo, apan ila usab nga gikonsiderar kadtong nagsunod kanila, nananom sila alang sa mga pundok sa nagsunod nga karwahe.
Sila nasayud sa kalig-on sa pamilya ug mga higala. Ug tungod kay sila nagtinabangay sa usag usa, sila nalig-on. Ang mga higala gitratar nga sama sa pamilya.
Ang mga pioneer nagsilbi nga maayong pahinumdom nganong kita mopalayo sa tintasyon nga magkinaugalingon ug, hinoon, magtinabangay, malooy, ug mohigugma sa usag usa.
Trabaho
“Dali, dali, kamo mga Santos.”
Kini nga hugpong sa mga pulong nahimong awit sa nagluya nga mga tigbiyahe. Lisud kaayo hunahunaon kon sa unsang paagi nagkugi kining halangdong mga tawo. Ang paglakaw maoy usa sa kinasayunang butang nga ilang nabuhat. Silang tanan kinahanglang magkahiusa sa pagsangkap og pagkaon, pag-ayo sa mga karwahe, pag-atiman sa mga hayop, pagpangalagad sa masakiton ug sa huyang, pagpangita ug pagkolekta og tubig, ug pagprotektar sa ilang kaugalingon gikan sa nagsingabut nga kakuyaw sa panahon ug sa daghang sa peligro sa kamingawan.
Sila momata matag buntag nga adunay klarong mga katuyoan ug tumong nga nasabtan sa tanan: aron sa pagserbisyo sa Dios ug sa ilang isig katawo ug aron makaabut sa Walog sa Salt Lake. Matag adlaw kadtong mga katuyoan ug tumong klaro ngadto kanila; sila nasayud unsay angay nilang buhaton ug ang kalamboan sa matag adlaw mahinungdanon.
Sa atong panahon—diin daghan na kaayo sa atong gitinguha sayon nalang kaayong makab-ot—makatintal sa pagtalikod o pag-undang kon ang dalan sa unahan may pagkalibaong o tungason kaayo alang kanato. Niining mga panahona, makapadasig kanato nga maghunahuna og maayo niadtong mga kalalakin-an, kababayen-an, ug kabataan nga wala magpapugong sa sakit, kalisud, kasakit, ug gani kamatayon diha sa ilang gipili nga dalan.
Ang mga pioneer nakakat-on nga ang pagbuhat sa lisud nga mga butang makadasig ug makalig-on sa ilang lawas, hunahuna, ug espiritu; makapalambo sa ilang pagsabut sa ilang diosnong kinaiya; ug makapadako sa ilang kalooy ngadto sa uban. Kini nga kinaiya naglig-on sa ilang mga kalag ug nahimong panalangin ngadto kanila sukad nahuman ang ilang pagtabok sa mga kapatagan ug kabukiran sa dugayng panahon.
Pagkapositibo
Sa dihang ang mga pioneer mikanta, sila mikanta sa ikatulo nga leksyon: “Maglipays paglakaw.”
Kini maoy usa sa dakong kasulian [ironies] sa atong panahon nga kita napanalanginan sa hilabihan ug bisan pa man dili kita kaayo nagmalipayon. Ang mga katingalahan sa kauswagan ug teknolohiya makapasanap ug naghatag kanato og daghang seguridad, kalingawan, diha-diha nga katagbawan, ug kasayon. Apan daghan gihapon sa atong palibut nga atong makita nga dili malipayon.
Ang mga pioneer, kinsa hilabihan ang pagsakripisyo, nagpadayon nga wala ug nagkulang sa nag-unang mga kinahanglanon aron mabuhi. Sila nakasabut nga ang kalipay dili moabut isip resulta sa swerte o sulagma lang. Sigurado nga dili kini moabut bisan kon ang tanan natong mga pangandoy matinuod. Ang kalipay wala magagikan sa panghitabo sa gawas. Kini nagagikan sa atong kaugalingon—dili igsapayan kon unsay nahitabo sa atong palibut.
Ang mga pioneer nasayud niini, ug uban niana nga diwa sila nakakaplag og kalipay sa matag sirkumstansya ug pagsulay—bisan niadtong mga pagsulay nga nakaapekto sa kinailadman nga bahin sa ilang pagkatawo.
Mga Pagsulay
Usahay kita mohinumdom sa gilahutay sa mga pioneer ug mosulti nga, “Maayo na lang gyud nga wala ko mabuhi nianang panahon.” Apan naghunahuna ko kon kadtong maisugong mga pioneer, kon sila nakakita pa kanato karon, dili kaha mosulti sa samang kabalaka.
Bisan tuod ang panahon ug sirkumstansya nausab, ang mga baruganan sa pagsagubang sa mga pagsulay ug malampusong mag-uban sa pagpuyo isip maamumahon ug mabungahong komunidad ubos sa Dios wala gyud mausab.
Gikan sa mga pioneer kita makakat-on sa pagbaton og hugot nga pagtuo ug pagsalig sa Dios. Kita makakat-on og kalooy alang sa uban. Kita makakat-on nga ang trabaho ug kakugi makapanalangin kanato dili lang sa temporal apan sa espiritwal nga paagi usab. Kita makakat-on nga ang kalipay anaa kanatong tanan dili igsapayan sa atong mga kahimtang.
Ang labing maayo nga paagi nga atong mapasidunggan ug magpakita og pasalamat sa mga pioneer mao ang pagkamatinud-anon ngadto sa mga sugo sa Dios, kalooy ug paghigugma sa atong isig ka tawo, ug kakugi, pagkapositibo, ug hingpit nga kalipay nga gipakita sa mga pioneer diha sa ilang kinabuhi.
Kon ato kining buhaton, kita makatabok sa daghang katuigan, gunitan ang kamot niadtong halangdong mga pioneer, ug dungan nga mokanta kanila: “Maayo ang tanan! Maayo ang tanan!”
Ang Pioneer, ni Robert T. Barrett, sa maayong kabubut-on sa Church History Museum