Ang Musika sa Akong Kinabuhi
Ang tagsulat nagpuyo sa Brazil.
Mihunong ko sa pagtukar og piano tungod kay nahadlok ko nga masayop. Karon duna na koy kahigayunan sa pagbuntog sa akong kahadlok.
Ang akong damgo sukad sa akong pagkabata mao ang pagtukar sa piano. Sa dihang nag-edad ko og 12 anyos, usa ka minahal nga miyembro sa Simbahan mitudlo nako sa pagtukar. Unya nakadawat ko og regalo nga keyboard gikan sa akong amahan. Bisan pa niana, ang kadasig sa pagtukar nagsugod sa pagkawala tungod kay kulbaan ko kon mosulay sa pagtukar sa sakrament miting. Nakahimo ko og daghang mga sayop, naulaw, ug dili na gusto nga motukar pa. Giingnan nako ang akong kaugalingon nga mosulay lamang ako niini pag-usab human ako makapraktis og maayo ug makatukar nga hapit na maperpekto. Apan nawad-an ko sa kadasig ug gibaligya nako ang akong keyboard ug gitago kini nga talento.
Paglabay sa katuigan, usa ka Dominggo walay makatukar. Ang sister nga motukar sa piano sa among ward mibalhin. Sa dihang akong nakita ang mga miyembro nga nanganta nga walay piano o organ nga nagduyog, gibati nako ang Espiritu nga nag-awhag nako sa pagpakigsulti sa bishop. Miingon ko, “Ok ra ba kon akoy motukar?” Misugot siya.
Human sa katuigan nga naglikay sa piano, akong nabuntog ang akong kahadlok sa paghimo og mga sayop. Sa akong kasurprisa, misugod ko sa pagtukar ingon og dili kaayo dugay sukad ako mihunong. Nakahimo ko og mga sayop sa pipila ka mga nota apan dili daghan. Kadto nga kasinatian nakahatag nako og kalig-on sa pagsugyot ngadto sa akong bishop nga ako mopasalig nga motukar matag Dominggo.
Nagpraktis ko matag semana, ug giganahan na usab sa piano. Kon ako magpraktis, bation nako nga kusog ang Espiritu sa akong panimalay. Usahay kon ako motukar, ang mga sakop sa akong pamilya nga nagtrabaho sa balay moapil sa pagkanta. Nagkahiusa kami, nanganta sa samang himno.
Daghang mga miyembro sa ward nakamatikod sa akong kalamboan ug mipahalipay nako. Mapasalamaton ko nga nakasalmot sa pagkaespirituhanon sa mga miting sa akong ward ug mapasalamaton ko nga akong gibalikan ang usa ka talento nga akong gibiyaan.
Nakat-unan nako ang pagpasalamat sa musika sa piano; ang kakalma nga ikahatag niini talagsaon. Manghinaot ko nga sa langit madungog nato kini nga estilo sa musika, ug kinsa ang nasayud, basin ako ang motukar didto sa mga celestial choir!
Linya nga gidrowing pinaagi sa Kleyman/iStock/Thinkstock