Pagpangandam sa Pagsulod sa Balay sa Ginoo
Ni Elder Kent F. Richards
Sa Seventy ug Executive Director sa Temple Department
Pahiyom kon maghunahuna mo kabahin sa templo. Kini usa ka dapit sa gahum ug panalangin.
Sa usa ka open house sa templo, nakamatikod ko og pipila ka mga babaye nga anaa sa luyo sa ilang ginikanan sulod sa templo. Sila mipahiyom samtang ilang makita ang ilang repleksyon diha sa mga samin sa brides’ room. “Hinumdumi,” mihunghong ilang lola, “kon unsa kamo ka espesyal ug unsa ka dako sa gugma sa Langitnong Amahan alang kaninyo.” Ang matag babaye naghunahuna sa panahon nga sila mobalik sa templo isip babaye nga may hugot nga pagtuo, uban sa nagkahingkod nga katahum ug kapasidad, andam nga motuman sa iyang misyon dinhi sa yuta. Ang mga lalaki nga mitambong sa open house nasigpatan usab nila ang ilang umaabut nga mga panalangin ug responsibilidad.
Ang nabati niining mga bataa sulod sa templo maoy husto. Ang Langitnong Amahan gusto nga mopanalangin kaninyo. Ang Iyang labing dagkong panalangin moabut samtang kamo mosulod sa templo aron sa pagdawat sa sagradong mga ordinansa ug sa paghimo ug pagtuman sa sagradong mga pakigsaad. Kamo ang responsable sa pagpangandam ug mahimong andam.
Ang templo importante sa inyong kinabuhi, ilabi na kon kamo mga batan-on: “Ang batan-ong mga lalaki mas nagkinahanglan nga moadto sa templo kaysa iyang amahan ug apohan, kinsa nalig-on pinaagi sa kasinatian sa kinabuhi; ug ang batan-ong mga babaye kinsa bag-ohay lang nga mosinati sa kinabuhi, nagkinahanglan sa espiritu, impluwensya ug giya nga nagagikan sa pag-apil diha sa mga ordinansa sa templo.”1 Sugdi karon sa pag-andam sa inyong kasingkasing ug hunahuna aron hingpit nga makadawat ug makasabut niining mga panalangin (tan-awa sa Mateo 13:23; Marcos 4:20).
Ang Pagdawat sa Kahingpitan sa Ebanghelyo
Kon inyong andamon ang inyong kaugalingon sa pagsulod sa templo, kamo mahimong “andam sa pagdawat sa kahingpitan sa [Iyang] ebanghelyo” diha sa templo (D&P 35:12; emphasis gidugang). Ang templo usa ka dapit sa gahum ug panalangin. Ang Ginoo misugo kang Propeta Joseph Smith ug sa nag-unang mga Santos nga magpundok sa Kirtland, Ohio, USA, diin sila sa katapusan magtukod og templo. “Didto kamo pagatugahan uban sa gahum nga gikan sa kahitas-an” (D&P 38:32; emphasis gidugang).
Sa bag-ohay lang nga open house sa templo, usa ka Apostol mipundok sa iyang pamilya libut sa balaang altar diha sa sealing room. Iyang gitudlo nga ang tanan nga atong gibuhat sa Simbahan—mga klase, kalihokan, programa, ug miting—nag-andam kanato para makaduol sa altar sa templo aron madawat ang ordinansa sa pagbugkos. Ang templo nagrepresentar sa mismong kahulugan sa plano sa Langitnong Amahan sa inyong mahangturong kalipay ug pag-uswag.
Pag-andam sa Paghimo og mga Pakigsaad ngadto sa Dios
Ang inyong pagpangandam sa pagsulod sa templo ug paghimo og mga pakigsaad dili dali nga mahitabo. Kini nagsugod sa inyong bunyag ug pagkumpirma sa gasa sa Espiritu Santo ug dayon molambo pinaagi sa pag-ampo, pagtuon sa kasulatan, pagkamasulundon, ug pagserbisyo. Kini nagdapit nga magmalimpyo samtang kamo moambit sa sakrament. Kini mahitabo samtang kamo nagtinguha nga mapasaylo pinaagi sa paghinulsol, samtang inyong gisunod ang mga sumbanan, ug samtang kamo takus nga naghupot og limited-use nga rekomend sa templo. Ang mga programa sa kabatan-onan makatabang kaninyo, apan ang inyong pagpangandam personal; kamo nagpalambo sa inyong katakus, inyong pagpamatuod, inyong pagkakabig. Personal ninyong magamit ang Pag-ula sa Manluluwas.
Samtang kamo magdugang sa inyong espirituhanong kahamtong, kamo magtinguha nga mangandam ug mosulod sa templo. Didto inyong madawat ang mga ordinansa ug maghimo og mga pakigsaad, nga mga kinahanglanong lakang aron mas maduol sa inyong Langitnong Amahan. Ang mga ordinansa sa templo mao “ang labing mahimayaon … nga mga ordinansa nga napadayag ngadto sa mga katawhan.”2
Samtang inyong madawat ang mga ordinansa sa templo, kamo kausa mohimo og ligdong nga pakigsaad ngadto sa inyong Amahan alang sa inyong kaugalingon, ug dayon maningkamot nga mosunod niini sa tibuok ninyong kinabuhi. Sa matag higayon nga kamo mosulod sa templo, inyong mabati ang Iyang Espiritu ug makadawat og dugang pagpadayag ug pasabut samtang nagpahigayon sa kinahanglanong mga ordinansa alang sa uban. Kamo makasabut ug makadawat og kasiguroan sa inyong mahangturong kinabuhi ug walay katapusang gahum sa inyong mga pakigsaad. Kon kita dili mga mahangturong binuhat, ang templo walay hinungdan. Kamo mosulod sa templo ug maghimo og mga pakigsaad tungod kay kamo mahangturong mabuhi ug gusto nga makauban ang inyong Langitnong Amahan ug pamilya nga “walay katapusan ang kalipay” (Mosiah 2:41). Kini nga kasigurohan molambo diha sa inyong kalag ug ipamatuod sa Espiritu Santo.
Pagkahimong Takus
Ang tahas sa Espiritu Santo tinuod. Siya motudlo ninyo, molimpyo kaninyo, ug mopabati sa gugma sa Amahan (tan-awa sa Mga Taga-Roma 5:5). Ang Balaan nga Espiritu sa Saad mao ang mopahingmatuod nga gahum sa Espiritu Santo, nga mobalido sa matag pakigsaad sa mahangturong paagi.
Aron madawat ang Espiritu, kamo kinahanglang mosulod sa templo nga limpyo ug putli, libre sa mga kalapasan nga wala pa mapasaylo. Kon ang kaaway molampus sa pagtintal kaninyo, kini mopugong kaninyo sa pagsulod sa templo o sa pagdani kaninyo nga moadto didto nga dili takus.
Tungod niini, kamo dapiton sa usa ka personal nga interbyu uban sa inyong bishop o presidente sa branch, aron ikonsiderar ang inyong katakus ug kaandam sa pagdawat og rekomend sa pagsulod sa templo. Pagmatinuoron ug salig kaniya nga kamo tabangan. Sa pagkatinuod, kamo ang nagdeterminar sa inyong kaugalingong gibarugan diha sa Ginoo (tan-awa sa D&P 109:24). Kamo ang unang mopirma sa inyong rekomend. Kamo mismo ang nagmatuod sa inyong katakus sa atubangan sa Ginoo.3
Aron mahimong takus wala magpasabut nga kamo hingpit na. Kini nagpasabut nga husto ang tinguha sa inyong kasingkasing, nga kamo nagsunod sa mga sugo, ug kamo nagtinguha nga molambo matag adlaw.
Pagkat-on gikan sa mga Simbolo
Sa templo, sama sa kasulatan, ang Ginoo nagtudlo gamit ang mga simbolo. Kamo makakita og daghang mga simbolo diha sa kasulatan, sama sa bato, liso, punoan sa kinabuhi, ug pan ug tubig sa sakrament (tan-awa, sama pananglit, 1 Nephi 11; Alma 32; Helaman 5:12). Ang pagbunyag pinaagi sa pagpaunlod nagpasabut og bag-ong kinabuhi, pagkatawo og usab, ug pagkalimpyo (tan-awa sa Mga Taga-Roma 6:3–5). Sa templo kitang tanan nagsul-ob og puti, nagsimbolo sa kaputli, kabalaan, kahayag, ug pagkasama.
Pipila sa mga simbolo diha sa templo alang sa pisikal ug espiritwal. Sama pananglit, ang pagsul-ob sa garment usa ka pisikal nga pahinumdom matag adlaw sa mga pakigsaad diha sa templo ug sa gisaad nga mga panalangin. Kon tahuron ug pasidunggan, ang garment moprotektar kanato gikan sa mga tintasyon ug dili matarung nga mga impluwensya.
Ang matag ordinansa sa templo adunay simbolo. “Sa sagrado nga tulumanon, ang usa ka tawo mahimong mahugasan ug madihugan,”4 susama sa mga hari ug pari sa karaang Israel nga nangandam sa pag-asumir sa ilang mga posisyon (tan-awa sa 1 Samuel 10:1; 16:13). Ang instruksyon ug mga pakigsaad diha sa endowment nagpasabut nga sininaan o hatagan og dugang gahum ug mga saad gikan sa Dios (tan-awa sa Lucas 24:49). Tingali ang pinakanindot nga simbolo mao ang ordinansa sa pagbugkos, diin ang magtiayon hiusahon sa dili mabugto nga bugkos nga molungtad sa kahangturan.
Ang mga saad sa templo daghan ug halangdon. Kini ang mga “dako nga kalooy” ug “daghan nga mga panalangin” (3 Nephi 10:18) nga personal nga giandam sa atong Amahan alang kaninyo. Busa pahiyom kon maghunahuna mo kabahin sa templo.
Dili igsapayan sa inyong edad, buhata kon unsay kinahanglanon aron maandam sa pagdawat sa talagsaong mga panalangin nga gitanyag sa inyong Langitnong Amahan alang kaninyo. Salig sa inyong pagbati sa dihang kamo bata pa ug mikanta, “Gusto kong makita ug moadto sa templo. … Samtang bata pa mangandam ko. Kini katungdanan ko.”5 Kini mahitabo usab kaninyo.
Litrato sa Rexburg Idaho Temple
BINTANA NGA STAINED-GLASS, Laie Hawaii Temple