Fakamanatua ʻo e Efiafi Fakafāmili ʻi ʻApí
ʻI he taʻu 1915, ne fakahinohino mai ai ʻe he kau palōfita kimuí ní kiate kitautolu ke tuku mavahe ha efiafi ʻi he uiké maʻa hotau fāmilí. Naʻe tomuʻa ui ia ko e “efiafi ʻi ʻapí”—ko ha taimi ke ako ki he ongoongoleleí pea fiefia fakataha, lolotonga hono fakamālohia hotau ngaahi vā fetuʻutaki fakaemāmaní mo taʻengatá.
Hili ha taʻu ʻe teau mei ai, ne hokohoko atu hono tokoniʻi kitautolu ʻe he efiafi fakafāmili ʻi ʻapí ke langa ha ngaahi fāmili ʻe tolonga ʻo taʻengatá. ʻOku talaʻofa mai ʻe he kau palōfitá, ʻe tupulaki ai ha tui maʻongoʻonga ange mo ha mālohi fakalaumālie ʻi hotau lotó, pea malu ange, uouongataha, mo melino hotau ngaahi ʻapí.
ʻOku tau kau kotoa ki ha fāmili ʻi he māmaní pea ko e konga kitautolu ʻo ha fāmili ʻo ʻetau Tamai Hēvaní. Ko e fē pē ha feituʻu te tau ʻi ai ʻi he māmaní pea tatau ai pē ko e hā hotau tūkungá ʻi he moʻuí, ʻoku tau lava ʻo fakamanatua mo kau ʻi he efiafi fakafāmili ʻi ʻapí.
Toʻohemá: Ko e fāmili Mouá ne nau toki hiki mai ki Taileni, ʻa ia ne nau ʻilo ai ʻa e ongoongoleleí pea papitaiso foki. ʻOku nau ako ʻa e Tohi ʻa Molomoná ʻo tatau pē ʻi he lea faka-Heimongí, ko ʻenau lea tuʻufonuá, mo e lea faka-Tailení, ʻa e lea honau ʻapi foʻoú.
ʻI laló: Ko e vaʻingá mo e fiefiá ʻa e taha e founga ʻoku ngaohi ai ʻe he fāmili Sanitesi ʻo Potukalí ke nau toe feohi vāofi ange ai ʻi he efiafi fakafāmili ʻi ʻapí.
Toʻomataʻú: ʻOku mahulu hake ʻa e ʻuhinga ʻo e fāmilí ʻi he ʻi ai ha faʻē, tamai, mo e fānau ʻi he Temokālati Lepupelika ʻo Kongokoó. ʻI he taimi ʻoku fakatahatahaʻi ai ʻe Misa Suekamana hono fāmilí ki he efiafi fakafāmili ʻi ʻapí, ʻoku fie kau mai e tokolahi ia ʻo e koló.
Taupotu ki ʻolungá: ʻOku fakaʻaongaʻi ʻe Sisitā Sēkona ʻo e ʻOtu FIlipainí ʻa e ngaahi hiva Palaimelí mo e ngaahi hiva tukufakaholó ke akoʻi ki heʻene fānaú ʻa e fiefia ʻo e ongoongoleleí.
ʻI ʻolungá: Ko e fāmili ʻEnitasoní, ʻoku nau hā ʻi he taá ʻi he peito honau ʻapí ʻi Siōsia, USA, ʻoku nau manako ke taʻo pisikete. ʻOku nau faʻa fakaʻaongaʻi he taimi ʻe niʻihi ko ha konga ʻo e lēsoní pe fakaneifuaʻaki.
ʻI ʻolungá: Ko Misa mo Sisitā Leinolo ʻo Uasingatoni, USA, ʻokú na filioʻi ha founga ke akoʻi ai ʻa e ongoongoleleí ke mahino mo ako ʻe heʻena fānau kei īkí.
Toʻomataʻú, taupotu ki ʻolungá: ʻOku fakalāngilangiʻi ʻe he fāmili ʻEsipinosa ʻo Poliviá ʻenau kui fefiné ʻi he efiafi fakafāmili ʻi ʻapí lolotonga ʻenau hiva mo ako e ongoongoleleí.
Ki he fāmili Sini ʻo Siosiá, USA, ʻoku hoko ʻa e hisitōlia fakafāmilí ia ko ha ʻekitivitī efiafi fakafāmili manakoa. ʻOku nau fiefia ʻi hono akoʻi ki heʻenau fānaú fekauʻaki mo honau tukufakaholo faka-Kōleá.
ʻOku faʻa ʻalu ʻa e fāmili Likauti ia ʻo ʻAositelēlia ʻo ʻeva ko e konga ia ʻo ʻenau efiafi fakafāmilí, ʻo takaiʻi e ngaahi feituʻu fakaʻofoʻofa honau koló.