ʻOiauē! Ko e Hā Leva ʻe fai he Taimi ní?

ʻOku lava ke hoko ia ʻi ha feituʻu pē—ʻi ʻapi, ʻi ʻapiako, pe ko ha ʻapi ʻo ha kaungāmeʻa. Fakafokifā pē ʻokú ke sio ki ha meʻa ʻokú ke ʻilo ʻoku ʻikai sai—ʻi ha telefoni, TV, komipiuta, pe keimi, pe ʻi ha tohi pe makasini. Ko e hā te ke fai he taimí ni ke ke ongoʻi fiefia ange aí?

Mavahe mei ai. Tāmateʻi ia Tuku ia ki lalo. ʻAi ke hangē ʻoku kona ia ki ho ʻatamaí—koeʻuhí he ʻoku pehē.
Tala ki hoʻo fineʻeikí pe tangataʻeikí. Ko e mātuʻá ʻoku nau ʻiloʻi lelei taha koé, pea ʻoku nau fie maʻu ke tokoniʻi koe ke ke malu mo fiefia. ʻOua naʻá ke mā. Ko e meʻa ʻoku hoko kiate koé ʻoku hoko ia he taimi ʻe niʻihi ki he meimei tokotaha kotoa pē.
Faʻa talanoa. ʻI ha taimi pē ʻokú ke sio ai ki ha faʻahinga meʻa ʻokú ne ngaohi koe ke ke ongoʻi taʻemanonga lolotonga e ʻahó ʻe ala tokoni kiate koe haʻo talanoa ki hoʻo fineʻeikí pe tangataʻeikí. ʻE lava ke tokoniʻi koe ʻe he mātuʻá ke faʻu ha palani ke maluʻi ai koe mei he mamata ki he ngaahi meʻa taʻefeʻungá. Kapau ʻokú ke ongoʻi pōpula, hohaʻa, pe hangē ʻokú ke toe fie sio ki ha faʻahinga meʻa taʻefeʻunga, fakapapauʻi ʻokú ke tala mo ia foki kiate kinaua.
ʻOua te ke tangutu pē ai. Mamata mo lau ha meʻa ʻoku leleí. Fai ha faʻahinga meʻa longomoʻui. Fai ha ngāue lelei. Feohi mo e fāmilí mo e kaungāmeʻá.
Manatuʻi kohai koe. ʻOku ʻikai te ke kovi koeʻuhí ko e meʻa naʻá ke mamata aí. Ko e fānau koe ʻa e ʻOtuá, pea ʻokú Ne ʻofa ʻiate koe mo fie tokoniʻi koe ke ke malu mo fiefia.
Tukuange ia. Fakakaukau loto kiate koe hangē hano tukuange ha foʻi pula pea mamata ki heʻene tētē atu he ʻeá. Fakafiemālieʻi koe pea tuku ke tēkina atu e meʻa naʻá ke mamata aí mei ho ʻatamaí. Fakakaukau loto leva ki he temipalé, ho fāmilí, pe ko ha meʻa kehe ʻokú ke manako ke mamata ki ai.

Tā fakatātaaʻi ʻe Shawna J. C. Tenney