Ngaahi Fehuʻi mo e Talí
ʻI he puke ʻeku fineʻeikí, ne mau ʻaukai mo lotu maʻana, ka naʻe iku pē ʻo ne mālōlō. Te u maʻu fēfē nai ʻa e nongá?
Ko ha taimi fakamamahi ʻeni ʻi hoʻo moʻuí. ʻOku fakanatula pē ke ke fie maʻu ha fakamahino mo ha ngaahi tali ki hoʻo ngaahi fehuʻí: “Ko e hā e ʻuhinga ne ʻikai ke ne moʻui aí? Te u toe fetaulaki nai mo ia? Te u fēfē ʻi he ʻikai te ne toe ʻi hení?
ʻOku ʻomi ʻe he ongoongolelei ʻa Sīsū Kalaisí ʻa e fakafiemālié mo e ngaahi talí. Naʻe talaʻofa mai ʻe he ʻEikí, “ʻOku monūʻia ʻa kinautolu ʻa ia ʻoku tangí, he ʻe fakafiemālieʻi ʻa kinautolu.” (3 Nīfai 12:4). Fekumi ki he Laumālie Māʻoniʻoní, ko Ia ʻa e Fakafiemālié.
ʻOkú ke fifili pe naʻe ongona nai hoʻo ngaahi lotú. Fakafiemālieʻi koe: ʻOku fanongo maʻu ai pē ʻa e ʻOtuá ki heʻetau ngaahi lotú. ʻOku talaʻofa mai ʻe he folofolá mo e kau palōfita moʻuí ʻoku moʻoni ia. Ko e meʻa naʻe folofola ʻaki ʻe he ʻEikí kia Siosefa Sāmitá, ʻoku kaungatonu ia kiate koe foki: “Kuo aʻu hake ki hoku telingá ʻa hoʻo ngaahi lotú mo e ngaahi lotu ʻa ho kāingá” (T&F 90:1). Ka ʻoku fie maʻu ke tau manauʻi ʻoku tali mai ʻe he ʻOtuá ʻetau ngaahi lotú ʻi ha ngaahi taumuʻa taʻengata (vakai ki he ʻIsaia 55:8–9). Ko hono ʻuhinga ia ʻoku tau muimui ai ki he sīpinga ʻa e Fakamoʻuí ki hono kole ha ngaahi tāpuakí pea kole fakamātoato ke fakahoko pē e finangalo ʻo e Tamaí (vakai ki he Luke 22:42).
Neongo ʻoku faingataʻa, ʻe malava ke hoko ʻa e ʻahiʻahi ko ʻení ko ha taimi ia ʻo e tupulaki kiate koe. Te ke ako ke ke maʻu ha tui ki he finangalo ʻo e ʻOtuá, neongo kapau ʻoku ʻuhinga ia ʻe ʻikai sai hoʻo fineʻeikí. ʻOku ʻosi mahino naʻá ke fie maʻu ke ne moʻui. Ka ko e sivi ia ʻo e moʻui fakamatelie ko ʻení ke falala ki he ʻOtuá ʻi he taimi hono kotoa pē—tautautefito ki he taimi faingataʻá. Kapau te ke falala kiate Ia, “ʻe fengāueʻaki fakataha ʻa e ngaahi meʻa kotoa pē koeʻuhi ko hoʻomou leleí” (T&F 90:24).
Ko e Maté Ko e konga Ia ʻo e Palaní
Fakatatau ki he palani ʻo e fiefia ʻa ʻetau Tamai Hēvaní maʻatautolú, ʻoku makatuʻunga ʻetau foki ki Hono ʻaó ʻi he maté mo e toetuʻú, ʻa ia ʻe tokoni ia kiate kitautolu ke tau liliu ai mei he tuʻunga matelié ni ki ha tuʻunga taʻe-faʻa-mate. Ko e meʻa pē ʻoku fie maʻú ke ke tali ko e maté ko e konga ia ʻo e palaní mo tui te ke lava ʻo toe femātaaki mo hoʻo faʻeé. ʻOku totonu ke ke ʻilo ʻoku tatali mai hoʻo faʻeé ʻi he maama tataliʻanga ʻo e ngaahi laumālié kiate koe.
David M., taʻu 18, Vahefonua Kasaí, Lepapulika Fakatemokālati ʻo Kongokoú
ʻOkú ne ʻi he Maama Tataliʻanga ʻo e Ngaahi Laumālié
Naʻe puke ʻeku faʻeé ʻi he fokoutua kanisaá he taʻu ʻe ua kuohilí. Naʻe ʻikai te u saiʻia ke u sio ki heʻene faingataʻaʻiá, pea ne u fakaʻamu pehē ange mai naʻe lava ke u fai ha meʻa. Pea ko ha aʻusia faingataʻa, neongo naʻá ne sai. ʻOku nofo atu hoʻo faʻeé ʻi he feituʻu ʻo e nonga ʻa ia ʻe ʻikai te ne ongoʻi ha mamahi pe faingataʻaʻia. ʻOku faingataʻa ʻene pulí, ka ʻoku ʻikai ʻaupito ke ke tuenoa. Te ne ʻofa maʻu ai pē ʻiate koe, pea ʻe ʻi ho tafaʻakí maʻu pē ʻa e Tamai Hēvaní ke fakamālohia koe ʻi he taimi ʻokú ke ongoʻi lotosiʻi aí. ʻE ʻikai ʻaupito te ke liʻekina. Naʻe fuesia ʻe Sīsū Kalaisi ʻa e ngaahi mamahi ʻo e māmaní; ʻOkú Ne ʻiloʻi e anga hoʻo ongoʻí mo e meʻa ʻokú ke fouá. Fai e meʻa ne u fai ʻi he taimi ʻo e ʻahiʻahí: ʻalu kiate Ia pea te Ne fakamaʻamaʻa ho ngaahi kavengá.
Shiloh W., taʻu 18, Sihuahua, Mekisikou
ʻE Toe Fakataha Ho Fāmilí
Naʻe mālōlō ʻeku faʻeé ʻi hoku taʻu 12. Naʻe teʻeki ke u kau ki he Siasí ʻi he taimi ko iá. ʻI he taimi naʻá ne puke aí, naʻá ku lotu lahi ke sai ʻeku faʻeé. Naʻe lahi ʻeku tuí, pea ne u falala ki he ʻOtuá ʻi heʻeku ʻamanaki lelei ʻe toe foki mai ʻene moʻui leleí. Meʻapango pē naʻe ʻikai ke ne toe sai. Ne u fifili pe ko e hā e ʻuhinga naʻá ne mate ai ʻi ha taʻu kei siʻi pea liʻaki mai au ʻoku ou kei siʻi. Naʻá ku ʻita pea ne ʻi ai e taimi ne u veiveiua pe ʻoku ʻi ai koā ha ʻOtua. Kuó u hoko ʻeni ko e mēmipa ʻo e Siasí, ʻo mahino kiate au ʻa e palani ʻo e Fakamoʻuí. ʻOku ou ʻilo ʻokú ne tatali mai kiate au pea ʻe toe fakataha homau fāmilí.
Inae L., age 19, Mina Kelaisi, Palāsila
ʻOku Akoʻi Kitautolu ʻe he Faingataʻá
Naʻe mālōlō ʻeku faʻeé he taʻu ʻe tolu kuohilí. ʻE tupulaki hotau vā fetuʻutaki mo ʻetau Tamai Hēvaní mo e Fakamoʻuí kapau te tau tafoki kiate Kinaua. Te ke ʻilo ai neongo e fakamamahi ʻa e ʻahiʻahi ko ʻení, ka ʻe lava ke hoko ia ko ha tāpuaki. Lotu ki hoʻo Tamai Hēvaní ki ha nonga mo ha fakafiemālie. Falala ki he palani ʻa e ʻEikí maʻaú. Tali ʻoku ʻafioʻi ʻe he Tamai Hēvaní ʻa e feituʻu ʻoku tau fononga ki aí mo e meʻa ʻoku tau fie maʻu ka tau aʻu ki aí. ʻOku ʻofeina koe ʻe he ʻEikí mo fie maʻu ke ke maʻu ʻa e fiefiá. ʻOku fakataumuʻa hotau ʻahiʻahiʻí ke akoʻi mo fakamālohia kitautolu.
Meghan B., taʻu 18, ʻOniteliō, Kānata
Te ke Toe Femātaaki Mo Ia
Naʻe mālōlō e faʻē ʻeku fineʻeikí ʻi he taʻu 17 ʻeku fineʻeikí. Naʻe lotu mo ʻaukai e fāmilí maʻana ʻi ha lau uike kimuʻa peá ne mālōloó. Naʻe tuku foki kiate ia ha tāpuaki lakanga fakataulaʻeiki. Ko e meʻa tefito naʻá ne fakanonga ʻeku fineʻeikí ko ʻene ʻilo te ne toe lava ʻo femātaaki mo ʻene faʻeé ʻi he moʻui ka hokó. Ko e taumuʻa ʻeku fineʻeikí ke ne moʻui ʻo taau mo e tāpuaki ko iá. ʻOku ou lotomamahi ko e ʻikai lava ke u toe feʻiloaki mo ia ʻi he moʻuí ni, ka ʻoku ou hanganaki atu ki he taimi te u toe feʻiloaki ai mo ia.
Cari R., taʻu 15, ʻIutā, USA