Ko e Tikite Tauʻanga Meʻalelé
ʻOku nofo ʻa e tokotaha naʻá ne faʻú ʻi Paha Kalefōnia, Mekisikou.
Fātima!
Tā fakatātā ʻa Bryan Beach
Ne u ʻalu ki he heleʻuhilá mo hoku ngaahi kaungāmeʻa mei he lotú. ʻI heʻemau hū atu ki he falekoloá (mall), ne ʻomai kiate kimautolu ha tikite ki he feituʻu tauʻanga meʻalelé. ʻI he ʻosi ʻa e heleʻuhilá, ne mau fakatokangaʻi kuo mole ʻa e tikite tauʻanga meʻalelé. Ne mau fuofua fakakaukau te mau lava pē ʻo totongi ʻa e tikité, ka ne ʻikai ke mau maʻu ʻa e peso (lau paʻanga faka-Mekisikoú) ʻe 180 ne fie maʻu ke totongí.
Ko e nunuʻa ʻo hono taʻetotongi ʻo e tauʻanga meʻalelé ko hono tuku ʻo e kaá ʻi he falekoloá ke taulaniʻi ʻo ʻave (tow), ʻa ia ʻe toe mamafa ange ia. Naʻe ilifia hoku kaungāmeʻá, tautautefito ki he tokotaha naʻe fakaʻulí he ko e kā ia ʻene tamaí. Ne u ʻunu ki he tafaʻakí ke fai ha lotu. Ne u kole ki he Tamai Hēvaní ʻaki e kotoa ʻeku tuí mo e loto fakatōkilaló ke ʻomi muʻa ha founga ke lava ai ʻo fakaleleiʻi ʻemau palopalemá pea mau foki hao ki homau ngaahi ʻapí. ʻE ʻikai toe ngalo ʻa e meʻa ne hoko ʻi he hili pē ha lau sekoni mei he ʻosi ʻeku lotú.
Lolotonga ʻeku foki atu ki he kaá, ne ui mai ʻe ha taha hoku hingoá mei hoku tuʻá. Ko Falanisi, ko ha kaungāmeʻa mei he akó (high school). Naʻá ne ʻeke mai pe ko e hā ʻeku meʻa ʻoku faí, peá u talaange ʻa e meʻa kuo hokó. Ne ʻikai toe tatali, ka ne fā ki heʻene kato paʻangá pea ʻomi ha paʻanga feʻunga kiate au ke totongi ʻaki ʻa e tikite naʻe molé. Ko e angaʻofa ko ʻení ko ha tali vave ia ʻo ʻeku tautapa ki he Tamai Hēvaní.
Mahalo pē ʻe ʻikai ʻilo ia ʻe Falanisi ʻa ʻene fuʻu tokoni ʻaufuatoó, ka ʻoku ou ʻilo te u houngaʻia maʻu ai pē ʻi he toenga ʻeku moʻuí.
ʻI he taimi ʻe niʻihi ʻoku fakaofo e founga hono tali mai ʻe he Tamai Hēvaní ʻetau ngaahi lotú, ka ʻoku ʻikai tupukoso. ʻOku ʻiloʻi haohaoa kitautolu ʻe he Tamai Hēvaní mo Sīsū Kalaisi pea mo tākiekina ʻetau moʻuí.
ʻOku ou ʻilo ʻi heʻetau moʻui māʻoniʻoní, ʻoku tau fiefia ai ʻi he ngaahi tāpuaki taʻefaʻalaua ko e Tamai Hēvaní pē te ne lava ʻo ʻomi kiate kitautolu, kau ai ʻEne talaʻofa mai “kapau te [tau] fai ʻa e ngaahi meʻá ni, ʻe hiki hake ʻa [kitautolu] ʻi he ʻaho fakaʻosí” (ʻAlamā 37:37).