ʻOtu Lea ki he ʻOtu Lea
Sēnesi 1:26–27
ʻOku ʻuhinga ki he hā ʻa e ngaohi ʻi he tatau ʻo e ʻOtuá?
26 Pea naʻe alealea ʻa e ngaahi ʻOtuá ʻiate kinautolu pē pea nau folofola: Tau ō hifo ʻo ngaohi ʻa e tangatá ʻi hotau ʻīmisí, mo hotau tataú, pea te tau foaki kiate kinautolu ke pule ki he fanga ika ʻo e tahí, pea ki he fanga manupuna ʻo e ʻataá, pea ki he fanga pulú mo honau faʻahingá, pea ki he māmaní kotoa pē, pea ki he meʻa totolo kotoa pē ʻa ia ʻoku totolo ʻi he funga ʻo e fonuá.
27 Ko ia naʻe ngaohi ʻa e tangatá ʻe he ʻOtuá ʻi hono tataú, naʻá ne ngaohi ia ʻi he tatau ʻo e ʻOtuá; naʻá ne ngaohi ʻa kinaua ko e tangata mo e fefine.
Ko e tatau ʻo e ʻOtuá
“ʻOku ʻikai ke taʻefakaʻapaʻapa hono fakatokangaʻi ko ia ha mafai ʻoku māʻolunga ange ʻi ha taha; ka, ʻokú ne hakeakiʻi. Kapau te tau ʻiloʻi naʻe ngaohi kitautolu ʻi he tatau ʻo e ʻOtuá, ʻe ʻikai faingataʻa ke tau talanoa kiate Ia. … ʻE hanga ʻe he ʻiló ni, ʻoku maʻu ʻi he tuí, ʻo ʻomi ha loto nonga mo ha melino tuʻuloa.”
Palesiteni Thomas S. Monson, “The Lighthouse of the Lord,” Ensign, Nov. 1990, 95–96.
Tau ō hifo
Ko e faʻunga fakatokolahi ko ʻení ʻoku ongo ʻo hangē ʻoku folofola ʻa e ʻOtuá ki ha tokotaha kehe—koeʻuhí ko Ia ʻoku folofolá. Naʻe akoʻi ʻe Siosefa Sāmita, “ʻI he kamataʻangá, naʻe ui ʻe he taki ʻo e Ngaahi ʻOtuá ha fakataha alēlea ʻo e Ngaahi ʻOtuá; pea ne nau haʻu fakataha ʻo faʻu [teuteuʻi] ha palani ke fakatupu ha māmani mo ha kakai ʻi ai” (Hisitōlia ʻo e Siasí, 6:308). Ne kau ʻi he fakataha ko ʻení ʻa e ʻEiki ko Sīsu Kalaisí mo ha niʻihi kehe (vakai ki he Mōsese 2:26–27; ʻĒpalahame 4:26–27).
ʻI hotau tataú
“Naʻe ʻi he tuʻunga ʻoku tau ʻi ai he taimi ní ʻa e ʻOtuá ʻi ha taimi ʻe taha, ka kuo hoko ia ko ha tangata kuo hakeakiʻi, pea ʻokú ne ʻafio kuo fakakalauni ʻi he langí! Ko e fakapulipuli lahí ia. Kapau naʻe fakamavaeuaʻi ʻa e veilí he ʻahó ni, pea … kapau te mou mamata kiate Ia he ʻahó ni, te mou mamata kiate Ia ʻokú Ne fōtunga tatau mo e tangatá—ʻo hangē ko kimoutolú ʻi he meʻa kotoa pē, ʻi he ʻīmisí, pea tatau tofu mo e tangatá.”
Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 40.
“Ko e tangatá ko e fānau ia ʻa e ʻOtuá, naʻe fakatupu ia ʻi hono tatau fakalangí mo fakakoloaʻi ʻaki ʻa e ngaahi ʻulungaanga faka-ʻOtuá, pea hangē ko e malava ko ia ʻa ha foha kei valevale ʻo ha tamai mo ha faʻē fakamāmani ʻo fatutangata ʻi hono taimi totonú, ʻoku pehē pē ʻa e malava ʻa e fānau ʻa ha mātuʻa fakalangi ʻoku teʻeki ai tupu, ke nau aʻusia ha ngaahi meʻa lalahi, ʻi ha ngaahi taʻu mo ha ngaahi vahaʻa taimi lōloa, ʻo aʻu pē ki haʻanau hoko ko ha ʻOtua.”
The First Presidency, “The Origin of Man,” Improvement Era, Nov. 1909, 81; Ensign, Feb. 2002, 30.
Pule
“ʻOku totonu ke ngāue ʻaki fakapotopoto e māmaní mo e ngaahi meʻa kotoa pē ʻoku ʻi aí ke poupouʻi ʻa e fāmili ʻo e tangatá. Ka neongo iá, ko e kau tauhi kotoa pē—ʻoku ʻikai ʻanautolu—ʻo e māmaní pea ʻe fakamatala kotoa ʻi he ʻao ʻo e ʻOtuá ki he meʻa ne nau fai ki Heʻene fakatupú.”
“Environmental Stewardship and Conservation,” mormonnewsroom.org; vakai foki ki he Tokāteline mo e Ngaahi Fuakavá 104:13–15.
Tangatá mo e Fefiné.
“Ko e kakai tangata mo e kakai fefine kotoa pē ʻi he tatau ʻo e Tamai mo e Faʻē fakamāmani lahi, ko e ngaahi foha mo e ngaahi ʻōfefine kinautolu ʻo e ʻOtuá.”
The First Presidency, “The Origin of Man,” Improvement Era, Nov. 1909, 78; Ensign, Feb. 2002, 29.
“Ko e tuʻunga tangata pe fefiné ko ha ʻulungāanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié pea mo e taʻengatá.”
“Ko e Fāmilí: Ko ha Fanongonongo ki Māmani,” Liahona, Nōvema 2010, 129.