Pōpoaki ʻa e Faiako ʻAʻahí
Ngaahi ʻUlungaanga Fakalangi ʻo Sīsū Kalaisí—Fonu ʻi he Manavaʻofa mo e ʻOfa
Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. Ko e hā ha founga ʻe hanga ai ʻe ha mahino kiate koe e ngaahi ʻulungaanga fakalangi ʻo e Fakamoʻuí, ʻo fakatupulaki hoʻo tui kiate Iá mo tāpuekina ai ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Ko e Tākiekina ʻa e Kau Fefine Angatonú, fai ʻe Julie Rogers
ʻOku fakamatalaʻi ʻe he Fakahinohino ki he Ngaahi Folofolá ʻa e manavaʻofá “ko e ʻofa ia ʻoku māʻolunga, fakaʻeieiki, mo mālohi tahá” (“Manavaʻofá”). Ko e ʻofa haohaoa ia ʻa Sīsū Kalaisí. ʻI heʻetau ako kia Sīsū Kalaisi mo fāifeinga ke hangē ko Iá, ʻe kamata ke tau ongoʻi ʻEne ʻofa haohaoá ʻi heʻetau moʻuí pea ueʻi kitautolu ke tau ʻofa mo tokoni ki he niʻihi kehé ʻo hangē pē ko ia naʻá Ne mei faí. Ne pehē ʻe Palesiteni Tōmasi S. Monisoni, “Ko e manavaʻofá ko haʻate kātakiʻi ha taha kuo faihala mai.” Ko hono fakafepakiʻi ia e ongoʻi ʻitangofuá. Ko hono tali ia ʻo e ngaahi vaivaí mo e tōnounoú. Ko hono tali ia ʻo e kakaí ʻi honau tuʻunga totonú. Ko e vakai atu ia ʻo fakalaka ʻi he fōtunga fakaesinó ke aʻu ki he ngaahi ʻulungaanga he ʻikai toe mōlia he ʻalu ʻa e taimí. Ko hono fakafepakiʻi ia ʻo e ongoʻi ke fakakalakalasi e niʻihi kehé.”1
ʻI he Tohi ʻa Molomoná, ʻoku tau ako ai ʻa e moʻoni maʻongoʻonga ko ia ʻoku tau “lotu ki he Tamaí ʻaki ʻa e ivi kotoa ʻo e lotó, koeʻuhi ke fakafonu ʻa [kitautolu] ʻaki ʻa e ʻofá ni, ʻa ia kuó ne foaki kiate [kitautolu] kotoa pē ʻoku muimui moʻoni ʻi hono ʻAlo ko Sīsū Kalaisí; koeʻuhi ke [tau] hoko ko e ngaahi foha [mo e ngaahi ʻōfefine] ʻo e ʻOtuá; koeʻuhi ka hoko ʻa e taimi te ne hā mai aí te tau tatau mo ia, he te tau mamata kiate ia ʻi hono anga totonú; koeʻuhi ke tau maʻu ʻa e ʻamanaki leleí ni; koeʻuhi ke fakahaohaoaʻi ʻa kitautolu ʻo hangē ko ʻene haohaoá” (Molonai 7:48).
Ngaahi Potufolofola Kehé
Sione 13:34–35; 1 Kolinitō 13:1–13; 1 Nīfai 11:21–23; ʻEta 12:33–34
Mei Hotau Hisitōliá
“Naʻe houngaʻia ha fefine ne toki mālōlō hono husepānití koeʻuhí ko ha ongo faiako ʻaʻahi ne na kaungā mamahi fakataha mo ia pea mo fakafiemālieʻi ia. Naʻá ne tohi ʻo pehē: “Ne u fuʻu fie maʻu ha taha ke u talanoa ki ai; ha taha ke fanongo kiate au. … Pea naʻa na fakafanongo. Naʻá na fakafiemālieʻi au. Naʻá na tangi fakataha mo au. Naʻá na fāʻofua kiate au … [peá na] tokoni ke u mavahe mai mei he loto foʻí mo e loto mafasia ʻi he ngaahi fuofua māhina ʻo e ongoʻi tuēnoá.”
Naʻe fakanounouʻi ʻe ha fefine ʻe taha e ngaahi ongo naʻá ne maʻú ʻi he taimi naʻá ne maʻu ai ha tokoni ʻofa faka-Kalaisi moʻoni mei ha faiako ʻaʻahi: ‘Ne u ʻiloʻi naʻe ʻikai ko ha mataʻifika pē au ʻi he ngaahi tohi lekōtí ke ne ʻaʻahi ki ai. Naʻá ku ʻiloʻi naʻá ne tokanga mai kiate au.’”2
Hangē ko e kau fineʻofa ko ʻení, ʻe lava ke fakamoʻoni ʻa e Kāingalotu tokolahi ʻi māmani ki hono moʻoni ʻo e lea ko ʻeni ne fai ʻe Palesiteni Poiti K. Peeka (1924–2015), Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá: “He toki meʻa fakanonga ia ko ʻetau ʻilo neongo pe ko e fē ha feituʻu ʻe ʻalu ki ai ha fāmili, te nau kau ki ha fāmili ʻo e Siasí. Mei he ʻaho te nau tūʻuta aí, ʻe kau ʻa e husepānití ki he kōlomu ʻo e lakanga fakataulaʻeikí pea kau ʻa e uaifí ki he Fineʻofá.”3