Kae ʻOua Ke Tau Toe Fakataha Mai

Ko e Hala ki he Maluʻangá

Fai ʻe Palesiteni Henelī B. ʻAealingi

Tokoni ʻUluaki ʻi he Kau Palesitenisī ʻUluakí

Mei he “Finding Safety in Counsel,” Liahona, Siulai 1997, 23–25.

Ko e taha e ngaahi founga ʻoku tau ala ʻilo ai ha fakatokanga mei he ʻEikí ko hono ʻomai ʻa e fono ʻo e fakamoʻoní, mo e kau fakamoʻoni kuo fakamafaiʻí.

ʻOku hangē ʻoku ʻikai hano ngataʻanga ʻo e holi ʻa e Fakamoʻuí ke tataki kitautolu ki he maluʻangá. Pea ʻoku taʻefeliliuaki ʻa e founga ʻokú Ne fakahaaʻi mai ai kiate kitautolu ʻa e halá. ʻOkú Ne ui ʻi ha ngaahi founga lahi koeʻuhí ke aʻu atu kiate kinautolu ʻoku nau vilitaki ke tali iá. Pea ʻoku kau ʻi he ngaahi founga ko iá hono ʻomi e pōpoakí ʻi he ngutu ʻo ʻEne kau palōfitá ʻi ha taimi pē ʻoku feʻunga ai e kakaí ke maʻu ʻiate kinautolu ha kau palōfita ʻa e ʻOtuá. ʻOku fatongia ʻaki ʻe he kau tamaioʻeiki kuo fakamafaiʻi ko iá hono fakatokanga ki he kakaí, tala kiate kinautolu ʻa e hala ki he maluʻangá.

ʻI he taimi naʻe fakautuutu ai ʻa e ngaahi longolongoaʻa ʻi he fakatokelau ʻo Mīsulí, USA, ʻi he faʻahitaʻu fakatōlau ʻo e 1838, naʻe ui ʻa e Palōfita ko Siosefa Samitá ki he kāingalotú ke nau fakatahataha ki Hihifo Mamaʻo ke nau unga ai. Naʻe ʻi ai e tokolahi ʻi he ngaahi faama mamaʻo atú pe ʻi he ngaahi nofoʻanga moveteveté. Naʻá Ne faleʻi tonu ʻa Sēkope Hauna, ko e fuofua tokotaha ke nofoʻi ha kiʻi nofoʻanga ne ui ko Hauna Mila. ʻI ha lēkooti ʻo e taimi ko iá ne hā ai ʻeni: “Ne tala ʻe Siosefa ha fekau kia Hauni, ʻaʻana e falé, ke fakahā ki he kāingalotu ne nau nofo aí ke nau mavahe pea haʻu ki Hihifo Mamaʻo, ka naʻe ʻikai ke fakaaʻu ʻe Misa Hauna ia ʻa e fekaú” (Philo Dibble, ʻi he “Early Scenes in Church History,” ʻi he Four Faith Promoting Classics [1968], 90). Kimui aí, ne lēkooti ʻe he Palōfita ko Siosefá ʻi heʻene hisitōliá: “ʻOku aʻu mai ki he ʻahó ni kuo foaki mai ʻe he ʻOtuá ha poto kiate au ke fakahaofi ʻaki e kakai ne nau fakafanongo ki he fakahinohinó. ʻOku teʻeki ha taha [kuo fai] ki heʻeku ngaahi fakahinohinó ʻe tāmateʻi” (Hisitōlia ʻo e Siasí 5:137). Pea hiki leva ʻe he Palōfitá ʻa e moʻoni fakamamahi ko ia ki he ngaahi moʻui tonuhia ne mei fakahaofi ʻi Hauna Milá ʻo ka ne maʻu pea nau muimui ki heʻene fakahinohinó.

ʻI hotau taimí, kuo fakatokanga mai kiate kitautolu e feituʻu ke tau hao ai mei he angahalá pea mo e mamahí. Ko e taha ʻo e ngaahi kī ki hono fakatokangaʻi ʻo e ngaahi fakatokanga ko iá ko hono toutou lea ʻakí. Ko hono toe ʻai ke mahino angé, ʻoku tā tuʻo lahi ʻa hoʻo fanongo mei hotau palōfitá ʻi he ngaahi konifelenisi lahi ko ʻení, ki heʻene ngāue ʻaki e lea ha palōfita kimuʻa pea kuó ne hoko ai ko e fakamoʻoni hono ua mo tolu he taimi ʻe niʻihi. … Naʻe hiki ʻe he ʻAposetolo ko Paulá ʻo pehē “ʻi he ngutu ʻo e fakamoʻoni ʻe toko ua pe toko tolú ʻe fakamoʻoni ʻa e lea kotoa pē” (2 Kolinitō 13:1). Ko e taha e ngaahi founga ʻoku tau ala ʻilo ai ko e fakatokangá mei he ʻEikí ko hono ʻomai ʻa e fono ʻo e fakamoʻoní, mo e kau fakamoʻoni kuo fakamafaiʻí. ʻI he taimi ʻoku ngali toutou heʻaki ai e ngaahi lea ʻa e kau palōfitá, ʻoku totonu ke ne tohoakiʻi ʻetau tokangá pea fakafonu hotau lotó ʻaki ʻa e houngaʻia ke moʻui ʻi ha taimi monūʻia. …

ʻOku ʻofa ʻa e Tamai Hēvaní ʻiate kitautolu. Naʻá Ne tuku mai Hono ʻAlo Tofu Pē Tahá ke hoko ko hotau Fakamoʻui. Naʻá Ne ʻafioʻi te tau ʻi ha tuʻunga fakatuʻutāmaki ʻi he moʻui fakamatelié, ko e kovi tahá mei he ngaahi ʻahiʻahi ʻo ha fili fakalilifu. Ko e taha ia e ngaahi ʻuhinga ʻoku ʻomai ai ʻe he Fakamoʻuí ʻa e ngaahi kī ʻo e lakanga fakataulaʻeikí ke unga ki ai ʻa kinautolu ʻoku ʻi ai honau telinga ke fanongó mo e tui ke talangofuá.