Savali a Faiaoga Asiasi
O Uiga Paia o Iesu Keriso: Faatumulia i le Alofa Mama ma le Alofa
Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i uiga paia o le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
The Influence of Righteous Women, saunia e Julie Rogers
Ua faamatalaina e le Taiala i Tusitusiga paia o le alofa moni o le “o le ituaiga alofa lea e silisili ona maualuga, silisili ona mamalu, silisili ona malosi, ae lē naʼo se aafiaga o le alofa” (“Alofa Mama”). O le alofa le pona lea o Iesu Keriso. A o tatou aoao e uiga ia Iesu Keriso ma taumafai ia avea faapei o Ia, o le a amata ona tatou lagonaina Lona alofa le pona i o tatou olaga ma uunaia e alolofa ma auauna atu i isi e pei ona o le a Ia faia. “O le alofa o le onosai i se tasi ua mafua ai ona tatou le fiafia,” o le saunoaga lea a Peresitene Thomas S. Monson. “O le teenaina lea o le lagona ia itaitagofie. O le taliaina lea o vaivaiga ma faaletonu. O le taliaina o tagata i o latou tulaga moni o i ai. O le faaseloa o le vaai i luga atu o le vaaiga faaletino, i le uiga faaleatua e le mu itiiti i le gasologa o le olaga. O le teena lea o le lagona e tuufaavasega isi.”1
I le Tusi a Mamona, ua tatou aoao ai le upumoni maoae faapea tatou te “tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea outou ma atalii o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamaina i tatou e pei lava ona mama o ia” (Moronae 7:48).
Mau Faaopoopo
Ioane 13:34–35; 1 Korinito 13:1–13; 1 Nifae 11:21–23; Eteru 12:33–34
Mai lo Tatou Talafaasolopito
“Sa i ai se tuafafine sa oti talu ai nei lona toalua, sa maua lona lotofaafetai mo faiaoga asiasi o ē sa faanoanoa faatasi ma ia ma faamafanafanaina o ia. Sa ia tusia: ‘Sa ou matua manaomia lava se tasi e mafai ona ou aapa atu i ai; se tasi e mafai ona faalogo mai ia te au. … Ma sa laua faalogo mai. Sa la faamafanafanaina au. Sa la fetagisi ma a‘u. Ma sa la opoina a’u … [ma] sa la fesoasoani mai e aveesea ai lo’u lē fiafia ma le faavauvau i na uluai masina o le tuulafoaiina.’
“Sa aotele e se tasi tamaitai ona lagona, ina ua avea o ia ma se tasi na tuu atu i ai le alofa moni a’ia’i mai se faiaoga asiasi: ‘Sa ou iloa sa sili atu a’u nai lo le na o se fuainumera i tusi faamaumau na te asia. Sa ou iloaina sa popole o ia mo au.’”2
E pei o nei tuafafine, e mafai ona faamaonia e le toatele o le Au Paia o Aso e Gata Ai i le lalolagi atoa le moni o lenei saunoaga a Peresitene Boyd K. Packer (1924–2015), le Peresitene o le Korama a Aposetolo e Toasefululua: “E maeu le mafanafana o le iloa po o fea lava e o i ai [se aiga], e i ai lava se aiga o le Ekalesia e faatali maia. Mai le aso latou te taunuu ai, o le a avea le alii ma se itutino o le korama a le perisitua ae avea le tuafafine ma se itutino o le Aualofa.”3