Ou Te Lei Iloa pe Aisea Sa Ou i Ai Iina

Amber Cheney, Alapama, ISA

Na faatoa uma lava ona fai le ma tatalo i le po ma lou tina. Na ma opoina e le tasi le isi ma faapea atu, “Ou te alofa ia te oe.” Ona ou savali atu lea i lo‘u potumoe. Ao ou aapa atu mo la‘u au o le faitotoa, na oo mai se uunaiga malosi i lo’u mafaufau o le aso e sosoo ai o le a maliu ai lo‘u tina.

Sa taumafai lo‘u faiai ma lo’u loto e tetee le manatu. Sa leai se auala o le a tupu ai se mea i lo‘u tina. O le a lelei mea uma ia te ia.

O le taimi lava na ou oo ai i lo‘u potu, sa ou tootuli i le tatalo ma ta’u atu i le Tama Faalelagi o le uunaiga e uiga i lo‘u tina e le mafai ona moni. Sa ou tatalo atu ia te Ia e faamolemole e aveese le manatu, ae e lei aluese. Sa ou toe foi atu i le potu a o‘u matua ma fai atu i lo’u tina sa ou manao i se isi fusi ma se sogi se tasi ae ou te lei alu ou te moe. Sa ma toe fai atu foi, “Ou te alofa ia te oe,” ma sa ou toe foi atu i lo‘u potu. Sa umi se taimi faatoa mafai ona ou moe i lena po.

Ina ua ou ala ae i le taeao na sosoo ai, sa ou popole. O le mea e faafetai ai, sa i ai iina lo‘u tina, na fiafia ma manuia. Ae o le pito i tua o lo‘u mafaufau, sa i ai pea lena lagona faalavelave mai sa i ai se mea e le o sa’o. I le sauniga anapogi ma molimau i lena aso, sa tu i luga Tina ma tuuina atu se molimau matagofie.

Ina ua maea le sauniga faamanatuga sa alu o ia e aoao lana vasega Peraimeri, ma sa ou alu i le Aoga Sa. Sa ou maua se isi musumusuga manino, o le taimi lea ia ou tu i luga ma tuua le Aoga Sa. Ou te lei manao e tosina mai tagata ia te au, ae na tosoina atu a‘u e se mea mai lo’u nofoa ma agai atu i fafo o le faitotoa. I ni nai minute, sa ou saofai ai i le vasega Peraimeri a lou tina ma faalogo ao ia aoao atu. Sa ou le iloa pe aisea sa ou i ai iina, ae sa ou iloaina na ou manaomia ona i ai iina.

Mulimuli ane i lena aoauli i le fale o lo‘u tuagane, sa faataupupula sa‘o mai lava lou tina i o’u mata mo le taimi mulimuli a o ia solovi ifo i lalo ma maliu ai mai se faaletonu o le mama. Mo Ana mafuaaga ma Lona alofa mutimutivale, na auina mai e le Tama Faalelagi le Agaga Paia e saunia au. O na uunaiga na ou maua ai se taimi faaopoopo ma lo‘u tina semanu ou te le olioli ai pe ana ou le amanaiaina le leo filemu, ma le itiiti.

O le alofa o lo‘u Tama Faalelagi faatoa matuai manino mai lava ia te au i mea na tutupu i le taimi o le maliu o lo’u tina. E maeu le faamanuiaina o i tatou ina ua maua se Tama oi le Lagi e lava le alofa mo i tatou ua tuuina mai ai ia i tatou le meaalofa faapitoa a le Agaga Paia.