Seia Tatou Toe Feiloai

O Le Ala I le Saogalemu

Saunia e Peresitene Henry B. Eyring

Fesoasoani Muamua i le Au Peresitene Sili

Mai le “Mauaina o le Saogalemu i Fautuaga,” Liahona, Iulai 1997, 28–31.

O se tasi o auala tatou te iloa ai o se lapataiga e mai le Alii e faapea o le tulafono o molimau, ua faatagaina ai molimau, ua faamaoniaina.

E foliga mai e leai se gataaga i manaoga o le Faaola e taitai atu ai i tatou i le saogalemu. Ma o loo i ai le faamaoni i le ala au Ia faaalia ai ia i tatou le ala. Na te valaauina e ala i auala e sili atu nai lo le auala e tasi ina ia oo atu ia i latou e naunau e taliaina. Ma o na auala e masani ona aofia ai le auina atu o le savali e ala i fofoga o Ana perofeta i soo se taimi lava e agavaa ai tagata ina maua perofeta a le Atua ia te i latou. O na auauna faamaonia ua tofiaina i taimi uma e lapataia tagata, ma ta‘u atu ia i latou le ala i le saogalemu.

A o faateleina le feteenaiga i matu o Misuri, ISA, i le tautoulu o le 1838, na valaau atu le Perofeta o Iosefa Samita i le Au Paia uma e faapotopoto i Sisifo Mamao mo le puipuiga. O le toatele sa nonofo i faatoaga e mamao ese po o nuu e salalau solo. Sa ia fautua faapitoa atu lava ia Jacob Haun, na faavaeina se nuu laitiiti e taua o le Haun‘s Mill. O se faamaumauga o lena taimi e aofia ai le mea lenei: “Na auina atu e Uso Iosefa le upu e ala atu ia Haun, e ona le fale gaosi falaoamata, e faailoa atu i uso o e sa nonofo ai iina e tuua loa ma o mai i Sisifo Mamao, ae o Mr. Haun na lē tuuina atu le savali” (Philo Dibble, i “Early Scenes in Church History,” i Four Faith Promoting Classics [1968], 90). Mulimuli ane, na tusia ai e le Perofeta o Iosefa i lana talafaasolopito: “E oo mai i lenei aso na tuuina mai e le Atua le poto ia te au e laveai ai tagata na taliaina fautuaga. E leai lava se tasi na fasiotia [sa usitaia] laʼu fautuaga” (History of the Church, 5:137). Ona tusia lea e le Perofeta le upumoni faanoanoa lea semanu e faasaoina ai ola o tagata mama i Haun‘s Mill pe ana faapea e maua lana fautuaga ma mulimuli i ai.

I o tatou taimi, ua uma ona lapataia i tatou i fautuaga o le mea e maua ai le saogalemu mai le agasala ma le faanoanoa. O se tasi o ki o le iloaina o na lapataiga e faapea e toe tuuina mai. Mo se faataitaiga, e sili atu nai lo le faatasi i nei konafesi aoao, ua outou faalogo i lo tatou perofeta o faapea mai o le a ia sii mai se saunoaga a se perofeta na muamua atu, ma o le mea lea o le a avea ai o ia ma molimau lona lua ma o nisi taimi e oo lava i le lona tolu. … Na tusia e le Aposetolo o Paulo, “e mautu upu uma i le mau a le toalua po o le toatolu (2 Korinito 13:1). O se tasi o auala e mafai ona tatou iloa ai o le lapataiga e mai le Alii e faapea o le tulafono o molimau, molimau ua faatagaina, ua faamaoniaina. Pe a foliga mai e tautu i upu a perofeta, e tatau ona taulai la tatou gauai atu ma le faatumulia o o tatou loto i le agaga faafetai e ola ai i se taimi faamanuiaina. …

E alofa lo tatou Tama Faalelagi ia i tatou. Na ia auina mai Lona Alo Pele e Toatasi e avea ma o tatou Faaola. Sa ia silafia o le olaga nei o le a tatou i ai i se tulaga matautia tele, o le vaega aupito sili ona leaga o le faaosoosoga lea e se fili matautia. O se tasi lea o mafuaaga ua saunia ai e le Faaola ki o le perisitua ina ia mafai ai e i latou e i ai taliga e faalogo ai ma le faatuatua ona usitai ma o i nofoaga saogalemu.