Aoaoina o le Autalavou Pe Faapefea ona Taitai i le Ala a le Faaola

Saunia e Carol F. McConkie

Fesoasoani Muamua i le Au Peresitene Aoao o Tamaitai Talavou

O a tatou tupulaga talavou e le na o ni taitai o le lumanai. O i latou o ni taitai i le taimi nei. E mafai ona tatou fesoasoani ia i latou e taitai e pei o le Faaola.

Youth preparing food for service project in Puerto Rico

I matua ma taitai o le autalavou, na saunoa Elder David A. Bednar o le Korama a Aposetolo e Toasefululua i le paleni maaleale e tatau ona tatou maua: “Valaaulia le tupulaga talavou e galulue. E tatau ona e i ai iina, ae e tatau ona e alu ese mai le ala. E tatau ona e tuuina atu le faatonuga e aunoa ma le puleaina.”¹

E mafai ona fesoasoani matua ma taitai i alii ma tamaitai talavou ia aoao i mataupu faavae e fa o le a saunia i latou e taitai ai i le amiotonu ma fausia le malo o le Atua i le lalolagi.

Ina ua 14 ou tausaga, sa ou feiloai i nisi o tamaitai talavou o e na avea ma taitai e sili ona lelei. O le taimi lena, na siitia atu ai lo‘u aiga i le isi itu o le Iunaite Setete ma avea ai ma ni tagata o se uarota fou. Ou te le manatua po o ai sa auauna atu i le au peresitene o le vasega a le Maea Maite, ae ou te manatuaina lelei lava o tamaitai talavou na faapitoa lava le agalelei ia te au. Na latou taliaina se teineitiiti fou fefe ma paee e avea ma se uo ua leva ona leiloa ma na ou lagonaina le taliaina. E o mai mai Delaware, lea sa na o au lava le teine Mamona i la‘u aoga maualuga ma e pau lava le isi teine Mamona sa ou iloaina sa nofo i le itula e malaga atu ai mai lo’u aiga, sa ou mafaufau, “Masalo e faapenei le lagi!”

Mo le taimi muamua i lo‘u olaga, sa ou maua ai se li’o o uo o e ola i tulaga faatonuina i Mo le Malosi o le Autalavou, na valaaulia au e auai i gaoioiga, ma faasoa mai a latou molimau o le talalelei ia te au. O a latou faataitaiga o le alofa-agalelei sa faamausaliina atili ai au i Le Ekalesia a Iesu Keriso o le Au Paia o Aso e Gata Ai i lena taimi nai lo se mea e mafai ona faia e soo se lauga po o se lesona. I lo latou alofa ma le malamalama e faapei o Keriso, sa avea i latou ma savali o le talalelei a Keriso, ma o i latou na taitaia ma taialaina au i totonu o Lana lafu.

O le a le mea na mafai ai e a‘u uo fou ona avea ma taitai sili?

Na faauigaina e se faifeautalai talavou le ala faataitai i se ala faigofie lava. Sa ia fai mai: “E tatau ona tatou i ai i le nofoaga sa‘o i le taimi sa’o ma faia le finagalo o le Alii ma fesoasoani atu i le tagata o loo moomia la tatou fesoasoani. O le ala lena e avea ai i tatou ma taitai.”² E ala i lo latou faasinomaga ma le Malamalama o Keriso e susulu i totonu o i latou, o alii ma tamaitai talavou faamaoni o lenei Ekalesia atoa ua i ai le malosiaga e taitai ai i le ala a le Faaola ma “fesoasoani i isi tagata e avea ma soo moni o … Iesu Keriso.”³

I le avea ai ma taitai tatou te taitai, taialaina, ma savavali i tafatafa o o tatou alii ma tamaitai talavou. Ae o au peresitene o vasega ma korama o loo nafa ma le taitaiina ma le faatonutonuina o galuega a a latou vasega ma korama, e aofia ai le filifilia o lesona i aso Sa ma le fuafuaina o gaoioiga o aso o le vaiaso. O taitai o vasega ma korama ua valaauina ma vaetofia i lalo o le taitaiga a i latou o e umia ki o le perisitua; o lea ua latou maua ai le pule e taitai ai ma faamalolosia isi talavou. Latou te mulimuli i le faataitaiga a le Faaola ma aoao e auauna atu e pei ona Ia auauna atu ma galue faapei ona Ia faia.

O Avanoa mo Tulaga Faaletaitai a le Autalavou

E amata le tulaga faaletaitai i le aiga. “Faia o lo tatou tiute i le Atua i le avea ai ma matua ma taitai e amata i le taitai e ala i faataitaiga—ola ai pea lava pea ma le maelega i mataupu faavae i le fale,” na aoao mai ai Elder Robert D. Hales o le Korama a Aposetolo e Toasefululua. “E manaomia ai le naunautai i aso taitasi ma le maelega.”⁴ E aoao atu e matua le aoaoga faavae a Keriso. Latou te fesoasoani i le autalavou e faatutu ma faataunuu ia sini. O le Alualu i Luma o le Tagata Lava ia ma le Tiute i le Atua e fesoasoani i autalavou e faamalolosia a latou molimau ia Iesu Keriso, saunia e osia ma tausia feagaiga paia, ma faataunuu a latou matafaioi paia ma tiutetauave i le aiga, au aiga, ma le Ekalesia.

I le lotu, e mafai ona fesoasoani taitai o le Perisitua Arona ma Tamaitai Talavou i le autalavou o loo auauna atu i le korama ma au peresitene o vasega ia malamalama i o latou tiute paia ma le faalauteleina o o latou valaauga e faafailele ma faamalolosia ai isi tagata uma o le korama ma vasega.

I le avea ai ma taitai matutua, tatou te saunia le autalavou e taitai korama ma fonotaga a vasega ma gaoioiga a le Mutuale. Tatou te feiloai ma le autalavou i fonotaga a le au peresitene a o latou fuafuaina ni auala e auauna atu ai ia i latou o loo tauivi, e faaaofia uma le autalavou i lesona i aso Sa, ma fuafua ai gaoioiga, galuega faatino, tolauapiga ma konafesi a le autalavou.

Tatou te fautuaina le au peresitene o le autalavou ina ia fesoasoani i tagata uma o korama ma vasega ia auai i soo se vaega o le galuega o le faaolataga, e aofia ai le galuega faafaifeautalai a tagata lotu, faatumauina, faatoaagaina mai o tagata ua le toaaga, galuega o le malumalu ma talafaasolopito o aiga, ma le aoaoina atu o le talalelei.⁵ O le au peresitene o le autalavou e fesoasoani i alii ma tamaitai talavou uma e aoao i le olioli ma le faamanuiaga o le auauna atu i le suafa o le Faaola ma le fafagaina o Ana mamoe.

O le galuega a le taitai e le o le faia o ni pepa e tufa ai le atoatoa mai le Pinterest po o le tuuina atu o lauga e faatumulia i mea moni. O le galuega a le taitai o le fesoasoani i alii ma tamaitai talavou e aoao ma faaaoga ia mataupu faavae o le a fesoasoani ia i latou e taitai i le ala a le Faaola. O mea nei o ni vaega e fa o na mataupu faavae.⁶

Saunia Faaleagaga

Family members sitting in the living room or family room of their home. They are reading the Church magazines.

Fesoasoani i le autalavou ia malamalama i le mana o lo latou sauniuniga faaleagaga faaletagata lava ia. Aoao i latou e faaaoga le faatuatua i feagaiga latou te faia i le sauniga o le faamanatuga. O lo latou naunautaiga e tauave i o latou luga le suafa o Keriso, ia manatua o Ia, ma tausi Ana poloaiga e faaagavaaina i latou i le mafutaga a le Agaga Paia. E le o tuulafoaiina i latou i la latou auaunaga pe a mafai ona latou maua, iloa, ma usitai i uunaiga a le Agaga Paia.

Latou te saunia faaleagaga e ala i le sailia o le taitaiga i le tatalo faatauanau ma le suesueina o tusitusiga paia mo ni tali. Latou te taumafai e tausi poloaiga ina ia mafai e le Agaga Paia ona tautala atu ia te i latou i o latou loto ma mafaufau ina ia latou lagonaina ma iloa o loo manaomia la latou fesoasoani ma o le a se mea e mafai ona latou faia. Latou te lagonaina le alofa mama o Keriso mo tagata taitasi o le vasega po o le korama.

O le sauniuniga faaleagaga e maua ai e le autalavou le talitonuga o i latou o sui o le Alii ma o i latou o i ai i Lana galuega (tagai i le MF&F 64:29).

Auai I Aufono

Aoao atu le autalavou i le faatulagaga autu ma le mana faafaaaliga o le aufono a o latou auai i lenei faagasologa faalelagi na faatulagaina e ala mai ai le puleaina o le Ekalesia a le Alii ma faamanuiaina ai tagata taitoatasi ma aiga.⁷ O fonotaga a le komiti a le autalavou a le Epikopo ma le korama ma au peresitene o vasega o ni aufono e aoao ai e le autalavou o latou tiute ma maua ai tiutetauave e auauna atu ai i isi.

Tagata o le aufono:

E lotogatasi ma mulimuli i taitaiga a taitai perisitua, o loo umia ki o le perisitua.
Faasoa atu o latou mafaufauga ma manatu i se agaga o le amiotonu, paia, faatuatua, mama, onosai, alofa mama, ma le agalelei faauso.
E galulue faatasi, e pei ona taialaina ai e le Agaga Paia, e fuafua mea o le a latou faia e fesoasoani ai ia i latou e manaomia le fesoasoani.

Auauna Atu i Isi

E taitai le autalavou i le ala a le Faaola pe a latou auauna atu i le alofa ma le agalelei. Na aoao mai Iosefa Samita: “E leai ma se isi auala ua fuafuaina e taitaiina tagata ina ia tuueseina le agasala nai lo le uuina o o latou lima, ma leoleo ia i latou ma le alofa. A faaali mai e tagata le leai o se agalelei ma se alofa ia te au, Oka se mamafa o lena mea i lou mafaufau.”⁸

Na aoao mai e le Faaola le taua ma le taugata o agaga uma (tagai i le MF&F 18:10–15). Fesoasoani i a tatou talavou ia malamalama i le upumoni mamalu faapea o Iesu Keriso na ofoina mai Lona soifua ma tatala le ala e mafai ai ona o mai uma tagata ia te Ia. I le agaga faafetai mo mea ua Ia faia, o auauna faamaoni a le Alii e aapa atu ma auauna atu i le alofa ma le agalelei i alii ma tamaitai talavou uma, ia na ositaulagaina ai e le Faaola mea uma.

Aoao Atu le Talalelei a Iesu Keriso

Fesoasoani i alii ma tamaitai talavou e iloa avanoa e aoao atu ai le talalelei ma malamalama e faapea, o a latou aoaoga aupito sili ona taua o a latou faataitaiga. A o ola le autalavou e tusa ma upu a perofeta ma tausia o tulaga faatonuina i le Mo le Malosi o le Autalavou, ua latou taitai i le ala a le Faaola. E ala i le faamaoni o a latou upu ma amioga, ua latou faaalia ai le uiga o le avea ma se soo moni o Iesu Keriso. Latou te laulaututu e fai ma Ana molimau e aunoa ma le pepelo. Ona, pe a latou molimau atu, fesoasoani e aoao atu se lesona o le Aso Sa, po o le faasoa atu o upumoni o le talalelei i a latou uo, o le a faatumuina i latou i le Agaga, ma o a latou upu o le a maua ai le mana e liua ai.

Taitai i le Ala a le Faaola

O le taitai i le ala a le Faaola o se avanoa paia o le a manaomia ai le autalavou e tuu atu le mea sili latou te mafaia a o latou auauna atu i le Alii i le fale, i le Ekalesia, ma le nuu. O alii ma tamaitai talavou e taitai i le ala a le Faaola e avea ma le savali o le talalelei a Keriso, o le tali i tatalo a se isi, o agelu e auauna atu ia i latou e manaomia le fesoasoani, ma le malamalama o Keriso i le lalolagi.