O Le Pepa i le Paka
E alala le tusitala i Baja Kalefonia, ISA.
Fátima!
Ata na tusia e Bryan Beach
Sa matou o i le tifaga ma ni au uo mai le ekalesia. Ina ua matou ulu atu i le faletele, sa tuuina mai ia i matou se pepa mo le paka o taavale. Ina ua uma le tifaga, na matou iloaina ua leiloa le pepa o le paka o taavale. I le taimi muamua na matou manatu e mafai lava ona matou totogi mo le pepa, ae e leai se tasi o i matou sa i ai se 180 peso na manaomia mo le sala.
O le taunuuga o le le totogiina o le paka o le tuu lea o le taavale i le faletele mo le tosoina, lea o le a sili atu ona taugata. Sa faanoanoa uma au uo, ae maise lava le tagata na aveina le taavale ona o le taavale a lona tama. Sa ou laa ese e fai se tatalo. Sa ou ole atu i le Tama Faalelagi ma lo‘u faatuatua ma le lotomaualalo e tuuina mai ia i matou se auala e foia ai lo matou faafitauli ma toe foi saogalemu i o tatou aiga. O le a le galo lava ia te au le mea na tupu i ni na‘o ni nai sekone talu ona uma la‘u tatalo.
A o ou savali agai atu i le taavale, o se tagata sa i o‘u tua na amata ona valaau mai lo’u igoa. O Francisco, o se uo mai le aoga maualuga. Sa ia fesili mai po o le a lau mea o loo fai, ma sa ou tau atu ia te ia le mea na tupu. E aunoa ma le faatuai, na ia aumai i fafo lana atotupe ma tuu mai ia te au se tupe na lava ai le totogi o le pepa na leiloa. O lenei faatinoga o le agalelei o se tali vave i au talosaga i le Tama Faalelagi.
Atonu e le iloa e Francisco le tele o lana fesoasoani, ae ou te iloa o le a ou matuai faafetai lava mo ia i lo‘u olaga atoa.
O nisi taimi e ofoofogia auala e tali mai ai le Tama Faalelagi ia tatou tatalo, ae e leai ni mea e tupu fua. O lo tatou Tama Faalelagi ma Iesu Keriso e silafia lelei lava i tatou ma e faagaoioia filo o o tatou olaga.
Ou te iloa afai tatou te ola amiotonu, tatou te fiafia i faamanuiaga e le mafaitaulia, e mafai ona tuuina mai e le Tama Faalelagi ia i tatou, e aofia ai Lana folafolaga ia i tatou, “afai [tatou] te faia nei mea, o le a sii ae i [tatou] i luga i le aso gataaga” (Alema 37:37).