Ngāue ʻi he Siasí
Ko Ha Meʻaʻofa Maʻongoʻonga Ange Fau
ʻOku nofo e tokotaha naʻá ne fai e talanoá ʻi Kalefōnia, USA.
Naʻe ʻikai akoʻi ʻataʻatā pē kimautolu ʻe Misa Lainolo—naʻá ne ʻofa ʻiate kimautolu.
Tā fakatātaaʻi ʻe Janice Kun
Ne mau maʻu ha faiako foʻou lolotonga hoku taʻu fakaʻosi ʻi he Palaimelí: Misa Lainolo. Naʻe ʻulu-hinā mo mingimingi, pea naʻá ne vahevahe ha ngaahi talanoa fekauʻaki mo e Tō-lalo Fakaʻekonōmiká mo ʻene ngāue ʻi he vaʻa fakakautau ʻa ʻAmeliká he lolotonga ʻo e Tau ʻa Māmani Hono II. ʻI he kamataʻangá naʻe ʻikai fuʻu ʻuhinga kiate au ʻene ngaahi talanoá—naʻe taʻe-oli pea ʻosi hoko fuoloa.
Naʻá ku pauʻu mo hoku ngaahi kaungāmeʻá he taimi ʻe taha ʻi he kalasí. Naʻe ʻave ai au ʻe Misa Lainolo ʻo lea hangatonu mai kiate au. Naʻá ne kole mai ke u ngāue lelei ange peá ne talamai naʻá ne fie maʻu ʻa e lelei tahá maʻaku. Kimuʻa aí, naʻe ʻikai ke u fuʻu tokanga au mo hoku ngaahi kaungāmeʻá. Ka naʻe vave ʻemau ako ha meʻa mahuʻinga fekauʻaki mo Misa Lainolo—naʻá ne tokanga lahi kiate kimautolu, pea ko ʻene taumuʻá pē ke ʻofa ʻiate kimautolu.
Naʻe vahevahe maʻu pē ʻe Misa Lainolo ʻene fakamoʻoni ki he Fakamoʻui ko Sīsū Kalaisí. Naʻe malama Hono fofongá ʻi Heʻene akoʻi kimautolu fekauʻaki mo e mālohi ʻo e moʻui fakatefito ʻia Kalaisí. Naʻe hoko ʻene ngaahi talanoá ko ha meʻa moʻoni naʻá ne ueʻi ʻemau fakakaukaú mo ʻai ke mau fie ngāue maʻá e ʻEikí.
ʻOku ou kei manatuʻi pē ha lēsoni naʻá ne akoʻi fekauʻaki mo e Palōfita ko Siosefa Sāmitá pea mo e founga ʻo ʻene fakamoʻoniʻi naʻe hoko ʻa Siosefa ʻi ha taimi ko ha tamasiʻi kei siʻi hangē ko kimautolú. Naʻá ne fakatē-loʻimata mo talamai ʻoku falala lahi mai ʻa e ʻEikí kiate kimautolu, ʻo hangē ko ia kuó Ne fai kia Siosefá. Naʻe pehē ʻe Misa Lainolo te mau takitaha fakahoko ha ngaahi meʻa maʻongoʻonga ʻi heʻemau moʻuí, pea naʻa mo e liliu ʻo e māmaní, kapau te mau hangē ko Siosefá ʻo ofi ki he Fakamoʻuí.
Hili ha ngaahi taʻu siʻi mei ai, ko e taimi naʻá ku ʻi he ako māʻolungá ai mo hoku ngaahi kaungāmeʻá, ne mau ʻilo ne fie maʻu ʻe Misa Lainolo hono ʻuluʻakau ʻepilikotí ke ʻauhani. Naʻa mau ʻauhani fiefia e ʻuluʻakaú, ʻa ia naʻe lau houa e kaka he tuʻungá mo hono ʻauhaní. Ko ha ngāue faingataʻa, ka naʻa mau ʻiloʻi ʻe mahuʻinga kia Misa Lainolo.
ʻI he taʻu pē ko iá naʻa mau toe ʻilo foki naʻe fie maʻu ʻe Misa Lainolo ha seti folofola foʻou. Ko ʻene folofolá ne motuʻa, manusinusi, mo fehomokaki. Ne mau lukuluku paʻanga ʻo fakatau maʻana ha tohi folofola takafi leta naʻe ʻi ai e ngaahi folofolá ʻe fā pea tohitongi ai hono hingoá. Naʻa mau foaki ange ia maʻana ʻi heʻemau paati Kilisimasi fakauōtí. He ʻikai toe ngalo ʻiate au e malama hono fofongá mo ʻene fakatē-loʻimata fiefia ʻi heʻene vakai mai kiate kimautolu tamaiki tangatá, heʻemau fai ha meʻa naʻe mahuʻinga lahi kiate iá.
Naʻá ku toki ʻilo ʻi he ʻosi ha ngaahi taʻu, hili ʻeku ʻalu ki he ʻunivēsití, kuo siʻi mālōlō ʻa Misa Lainolo. Naʻá ku ʻaʻahi ki hono uaifí mo e fāmilí mo fakahā ʻeku fakaʻapaʻapa mo e houngaʻia lahi ʻiate iá. Ko e taimi naʻá ku vakai ai ki he fiefia ʻene fānaú mo e makapuná, naʻá ku fakatokangaʻi ʻeku monūʻia lahi ke maheni mo e tangata maʻongoʻongá ni.
Naʻe pehē ʻe Sisitā Lainolo ʻi heʻene tangí pea toe malimali, “Naʻe ʻofa ʻiate kimoutolu tamaiki tangatá.” “Naʻe ʻofa moʻoni ʻiate kimoutolu.”
Naʻe fakahā mai ʻe Misa Lainolo kiate kimautolu ʻoku mahuʻinga taha homau vā fetuʻutaki mo e Tamai Hēvaní mo Hono ʻAló, ʻi ha māmani ʻoku faingataʻa ai ke tokanga taha ki he ngaahi meʻa ʻoku totonú. Mahalo pē ne mau ʻauhani e ʻuluʻakau ʻa Misa Lainoló mo foaki ange haʻane ngaahi folofola foʻou, ka naʻá ne foaki mai kiate kimautolu ha meʻaʻofa lelei ange fau: ko ha ʻofa tuʻuloa ki he Fakamoʻuí, ko Sīsū Kalaisi.