Fakatolonga ʻo e Meʻakaí: Siisi Faʻokapá mo e Pēseti ʻo e Nō Falé (Mortgage Rates)

Yvonne Aston, ʻOtumotu Sēnoló, Pilitānia

Naʻá ku kamata faivelenga ke fakatolonga meʻakai ʻi he taimi naʻá ku mali aí. Naʻá ku fie maʻu mo hoku husepānití ke tānaki ke lahi ʻaupito, ka naʻe ʻikai ke ma lava ʻo fakatau fakaʻangataha mai, peá ma pehē ai ke ma fakatau ʻo kiʻi fakalahi mai pē ʻi he uike takitaha. Naʻá ma kumi ʻa e ngaahi fakamaʻamaʻa ʻi he ngaahi meʻa naʻá ma faʻa fakataú, tautautefito ki he meʻakai faʻokapá.

Naʻá ku saiʻia ʻi he sio ki heʻeku kiʻi kōpaté, ki he kiʻi fokotuʻunga meʻakai kuo faʻokapa mo ʻosi fakamōmoá, ʻi heʻene fakaʻau ke lahí. Ne tuʻo taha haʻama fehalaaki ʻo ma fakatau mai ha siisi faʻo kapa, naʻe kovi, ka naʻe fakamālohi hoku husepānití ʻo ne kai ha kapa ʻe taha ʻi he uike kae ʻoua kuo ʻosi kotoa. Hili e lahi feʻunga ʻema meʻakai fakatolongá, ne ma kamata leva ke kai mei ai, mo tukupā ke fetongi kotoa e meʻa takitaha kuo kaí ʻaki ha meʻa ʻe ua kehe.

Naʻe ʻikai hano taimi kuo fuʻu fonu ʻema kōpaté, peá ma fakatau leva ngaahi meʻakai fakatolonga maʻa ʻema kulií mo e fanga pusí. Naʻá ma toe kamata foki ke fakatolonga ha ngaahi ʻakau fakaifo ki he meʻakaí (herbs and spices), uite naʻe faʻo ʻaki e vekiume, vai mo e kapa inu, pea mo ha meʻa pē naʻá ma ngāue ʻaki fakaʻaho naʻe ʻikai ko ha meʻakai, hangē ko e koá, ʻotolonó, mo e koa foó.

Peá ma fakatau leva ha fale, pea kimuʻa ke ma fakamoʻoni ʻi he laine motumotú, kuo hiki lahi ʻaupito ʻa e totongi noó ia. Naʻe pau ai ke mau moʻui ʻi heʻemau meʻakai fakatolongá ʻi ha meimei taʻu kakato ke ʻoua naʻa mole homa ʻapí.

Kuo hoko he taimí ni ʻa e fakatolonga meʻakaí ko ha konga pē ʻo e tauhi fakalūkufua ʻo e falé. ʻOku mau fakaʻaongaʻi ia pea ʻokú ne tāpuekina kimautolu ʻi he ʻaho kotoa pē. ʻOku ou mātuʻaki fakamālō ʻi heʻemau fakafanongo ki he faleʻi fakalaumālie mei he kau palōfita ʻa e ʻEikí koeʻuhí he ʻoku ou lava he taimí ni ʻo vakai takai mo e loto houngaʻia ki hoku ʻapi fiefia mo tokamālié.