Vahevahe ʻo e Fiefia Taʻengatá

Ko e taha ʻo e ngaahi meʻa lelei taha fekauʻaki mo e ongoongoleleí ko hono ʻilo e palani ʻo e fakamoʻuí. ʻOku tau maʻu e faingamālie fakaʻofoʻofa ke nofo mo hotau fāmilí ʻo taʻengata. ʻOku tokoni mai ʻa e ʻilo ko iá ke tau maʻu ha ʻamanaki lelei ʻi ha taimi ʻoku tau ongoʻi ʻoku lōmekina ai kitautolu ʻe he māmaní. ʻOku akoʻi mai ʻe Palesiteni ʻAealingi, “ʻOku ʻafioʻi ʻe heʻetau Tamai Hēvani ʻofá ʻa hotau lotó. Ko ʻEne taumuʻá ke foaki mai e fiefiá kiate kitautolu (vakai, 2 Nīfai 2:25). Pea ko ia naʻá Ne foaki mai Hono ʻAló ko ha meʻaʻofa ke lava ʻo hokohoko atu ʻa e fiefia ʻo e ngaahi feohi fakafāmilí ʻo laui kuonga. … Ko ha meʻaʻofa ia ʻe ala ʻekea ʻe he taha kotoa pē ʻo e fānau ʻa e ʻOtuá ʻoku haʻu ki māmani.

ʻOku kaunga e tāpuaki ko iá kiate kitautolu ʻoku lolotonga moʻui he taimi ní pea mo kinautolu kuo nau ʻosi hiki atú—kae tuʻunga pē ʻi haʻatau tokoni. ʻOku ʻi he maama tataliʻanga ʻo e ngaahi laumālié ʻetau ngaahi kuí he taimí ni, ʻo tatali mai ke tau teuteuʻi honau ngaahi hingoá ke fakahoko e ngaahi ouau fakatemipalé ke fakafofongaʻi kinautolu. Ka ʻi he taimi ʻe niʻihi ʻe lava ke faingataʻa hono fakahoko ʻa e ngāué maʻanautolu. Mahalo pē ʻoku tau fuʻu femoʻuekina, pe ʻoku tau nofo fuʻu mamaʻo mei ha temipale ke toutou ʻalu ki ai.

Kae mālié, he ʻoku ʻi ai mo ha ngaahi founga kehe ʻoku tau lava ai ʻo tokoniʻi ʻetau ngaahi kuí, hangē ko e fai ʻo e ngāue hisitōlia fakafāmilí, fakahokohoko fakamotuʻaleá, pe tokangaʻi e fānaú lolotonga ʻe ʻalu ʻetau mātuʻá ki he temipalé. ʻI heʻetau tokoní, ʻoku tau ngāue ai maʻá e ʻEikí mo ʻomi ʻa e ʻamanaki lelei ʻo e fāmili taʻengatá kiate kinautolu ʻi he tafaʻaki ʻe taha ʻo e veilí.