Nimá, Lotó, mo ha Malimali
ʻOku nofo e tokotaha naʻá ne faʻu e talanoá ʻi ʻIutā, USA.
Naʻe siofi ʻe Litia e teuteu ʻa e Fineʻeikí ki he ngāué. Naʻe ʻai ʻe he Fineʻeikí ha lipisitiki fakaʻofoʻofa lanu pingikī. Naʻá ne hā fakaʻofoʻofa.
Naʻe sio ʻa Litia ki he sioʻatá. Naʻá Ne ongoʻi loto mamahi. Pehē ʻe Litia, “ʻOku ʻikai ke ʻi ai haʻaku lipisitiki.” “Pea ʻoku ʻikai ke u fakaʻofoʻofa.”
Naʻe kuku maʻu ia ʻe he Fineʻeikí. ʻOku ʻikai ko e ʻai pe lipisitikí ʻa e meʻa ʻokú ne ʻai ʻa e kakaí ke nau fakaʻofoʻofá. Hoko ʻo mālohi mo angaleleí ʻokú ne ngaohi e kakaí ke nau fakaʻofoʻofa.”
“ʻOkú ke mālohi mo angalelei ʻi he taimi ʻoku tokoni ai ho nimá ki he niʻihi kehé.
“ʻOkú ke mālohi mo angalelei ʻi he taimi ʻoku ʻofa ai ho lotó ki he taha kotoa pē.
“Pea ʻokú ke mālohi mo angalelei ʻi he taimi ʻokú ke malimali aí. ʻOku ʻai ʻe he meʻa ko iá ʻa e taha kotoa ʻokú ke ʻiló ke fiefia mo ia.
“ʻOku ʻai ʻe he ngaahi mālohi mo angaleleí koe ke ke fakaʻofoʻofa ʻi loto, kae ʻikai ki tuʻa pē.”
Naʻe fie maʻu ʻe Litia ke ne hoko ʻo mālohi mo angalelei.
Naʻá ne fakaʻaongaʻi hono ongo nimá ke ʻave ʻa e meilí kia Kulenipā. Naʻá ne foaki ʻene konga kūkisi sokoleti fakaʻosí ki he taʻahine ʻokú ne tokoua ʻakí.
Naʻá ne ongoʻi ha loto ʻofa ʻi he taimi naʻá ne vaʻinga ai mo hono kaungāʻapi foʻoú. Naʻá ne ongoʻi ha loto ʻofa ʻi he taimi naʻá ne foaki ai ha taki sēniti ʻe hongofulu ki ha kiʻi taʻahine tānaki paʻanga maʻá e kau tukuhausiá.
Naʻá ne malimali ki he kakai naʻá ne sio ki aí. Naʻa nau malimali ange foki.ʻ
I he pō ko iá naʻe talaange ʻe Litia ki he Fineʻeikí, “ʻOkú ke moʻoni! ʻOku ou ongoʻi mālohi mo angalelei. Naʻá ku fakaʻaongaʻi hoku nimá mo hoku lotó pea mo ʻeku malimalí he ʻahó ni.
Naʻe malimali ʻa e Fineʻeikí ʻOkú ke mālohi mo angalelei, ʻo hangē pē ko hono fie maʻu koe ʻe Sīsuú!”