Ko e Meʻa ʻOku Tau Tui Ki Aí
ʻOku Tau Tui ki Hono Tauhi ʻo e Fekau ʻe Hongofulú
ʻOku maʻu ʻa e Fekau ʻe Hongofulú ʻi he Fuakava Motuʻá (vakai, ʻEkesōtosi 20:1–17), ka ʻoku ʻiloʻi ʻe he Kāingalotu ʻo e Ngaahi ʻAho Kimui Ní ʻoku fakaʻaongaʻi ʻa e ngaahi fekau ko iá ʻi he kuonga kotoa pē, kae ʻikai ko e taimi pē ʻo e Fuakava Motuʻá. Naʻe akoʻi ʻe ʻApinetai ʻa e Fekau ʻe Hongofulú ʻi he Tohi ʻa Molomoná (vakai, Mōsaia 12:33–36; 13:13–24), pea naʻe toe fakahā kinautolu ʻe he ʻEikí ki he Palōfita ko Siosefa Sāmitá maʻa hotau kuongá (vakai, T&F 42:18–29; 59:5–13).
Neongo ʻoku taʻetokanga ha kakai ʻi ha ngaahi sosaieti lahi he ʻahó ni ki he ngaahi fekau ko ʻení, ka ʻoku tau tui ʻoku nau kei ʻaonga pē. Naʻe fakamatalaʻi ʻe Palesiteni Tōmasi S. Monisoni:
“Ko e tōʻonga moʻui ko ia ne taʻe-feʻunga mo taʻe-maʻa he kuonga ko eé, kuo sai pē mo tali lelei ia ʻe ha tokolahi he taimí ni. …
“Neongo kuo liliu e māmaní, ka ʻoku kei tuʻu maʻu pē e ngaahi fono ʻa e ʻOtuá. Kuo teʻeki ai ke nau liliu; he ʻikai ke nau liliu. Ko e Fekau ʻe Hongofulú ko e—ngaahi fekau. ʻOku ʻikai ko ha ngaahi fokotuʻu. ʻOku nau kei mahuʻinga pē he ʻahó ni ʻo tatau mo e taimi ko ia ne foaki ai ʻe he ʻOtuá ki he fānau ʻa ʻIsilelí.”1
ʻOku ʻikai ke tau lea taʻeʻofa ki he niʻihi kehé ʻi he ʻikai ke nau muimui ʻi he ngaahi fekaú? Ka, ʻoku tau vakaiʻi ʻetau moʻuí pea fakafuofuaʻi e tūkunga ʻo ʻetau moʻui ʻaki e fakahinohino fakalangi kuo tuku mai kiate kitautolú.
ʻOku fakafofongaʻi ʻe he Fekau ʻe Hongofulú ʻa e ngaahi tuʻunga fakaʻulungāngá ʻa ia ʻe lava ke vahevahe ki ha kulupu ʻe ua: ko ʻetau tōʻonga ki he ʻOtuá mo ʻetau tōʻonga ki he niʻihi kehé. ʻOkú Ne fekau ke ʻoua te tau toe hū ki ha ʻotua kehe, tauhi ʻa e ʻaho Sāpaté ke māʻoniʻoni, pea fakaʻehiʻehi mei he takuanoá mo e tauhi ʻotua tamapuá, ke tokoni ke tau tauhi ʻa e ʻOtuá ko e uho ʻo ʻetau moʻuí. ʻOkú Ne fekau ke tau fakaʻapaʻapaʻi ʻetau mātuʻá pea ʻoua naʻa kaihaʻa, fakapō, loi, mānumanu, pe tono, ke tokoni ke tau ʻofa he fānau ʻa e ʻOtuá.
Kuo tau ʻilo lahi ange ki he meʻa ʻoku fie maʻu ʻe he ʻOtuá meiate kitautolú koeʻuhí ko e hokohoko ʻEne ngaahi fakahā ki Heʻene kau palōfitá, ka ʻoku kei hoko e Fekau ʻe Hongofulú ko ha kamataʻanga lelei ia ʻo ʻetau feinga ke talangofuá. “[Ko e] ngaahi fekau [ʻa e ʻOtuá] ko hano fakahaaʻi mai ia ʻo ʻEne ʻofa ʻiate kitautolú, pea ko e talangofua ki Heʻene ngaahi fekaú ko hano fakahaaʻi ia ʻo ʻetau ʻofa kiate Iá.”2
Ngaahi tā fakatātā ʻa J. Beth Jepson