Ko Hono Tanumaki Fakataha ʻo e Fāmilí

Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE fakatupulaki fēfē ʻe he mahino “Ko e Fāmilí: Ko ha Fanongonongo ki Māmaní” ʻa hoʻo tui ki he ʻOtuá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.

Tuí, Fāmilí, Fakafiemālié

“ʻOku ʻi ai ha fatongia toputapu ʻo e husepānití mo e uaifí ke na feʻofaʻaki mo fetauhiʻaki pea ki heʻena fānaú foki.”¹ Naʻe pehē ʻe Palesiteni Lāsolo M. Nalesoni, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e ʻapí ʻa e feituʻu ʻoku finangalo ʻa e ʻOtuá ke tau akoʻi ai ʻa e ʻofá mo e tokoní.”

“ʻOku finangalo ʻetau Tamai Hēvaní ke fefaitotonuʻaki ʻa e husepānití mo e uaifí pea ke [na] mahuʻingaʻia ʻi [heʻena] fānaú ko ha tofiʻa mei he ʻEikí.”²

Naʻe pehē ʻe Sēkope ʻi he Tohi ʻa Molomoná naʻe kau e ʻofa ʻa e husepānití ki hono uaifí, ʻofa ʻa e uaifí ki hono husepānití, pea mo e ʻofa ʻokú na fakatou maʻu ki heʻena fānaú ʻi he ngaahi ʻuhinga naʻe māʻoniʻoni ange ai ʻa e kau Leimaná ʻi ha taimi ʻe taha ʻi he kau Nīfaí (vakai, Sēkope 3:7).

Ko e taha ʻo e ngaahi founga lelei taha ke fakaafeʻi ai ʻa e ʻofá mo e uouangatahá ki hotau ngaahi ʻapí ko e lea ʻofa ki he kau mēmipa hotau fāmilí. ʻOku ʻomi ʻe he lea ʻofá ʻa e Laumālie Māʻoniʻoní. Naʻe fehuʻi mai ʻe Sisitā Linitā K. Pētoni, ko e palesiteni lahi ʻo e Fineʻofá: “Kuo tuʻo fiha nai ʻetau [lea ʻofa ki he niʻihi kehé]?”³

Ngaahi Potufolofola Kehe

Loma 12:10; Mōsaia 4:15; Tokāteline mo e Ngaahi Fuakava 25:5

Ngaahi Talanoa ʻa e Kakai Moʻuí

Naʻe vahevahe ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha aʻusia heʻene kei siʻí naʻe ongo ai kiate ia ʻa e mahuʻinga ʻo ha fāmili ʻofa. ʻI he taimi naʻá ne kei siʻi ai mo hono ngaahi tokouá, naʻe fakahoko ha tafa kanisā lahi ki heʻenau faʻeé pea naʻe mātuʻaki mamahi ke ne toe fakaʻaongaʻi hono nima toʻomataʻú. Naʻe lahi ʻa e haiané ʻi he fāmili fānau tangatá, ka ʻi he taimi naʻe haiane ai ʻene fineʻeikí, naʻá ne faʻa taʻofi kae hū ki he loki mohé ʻo tangi kae ʻoua kuo mōlia atu ʻa e langá.

ʻI he ʻilo ʻe he tangataʻeiki ʻa ʻEletā Kulisitofasoní e meʻa naʻe hokó, naʻe ʻikai ke ne tala ki ha taha ʻene ʻalu taʻe ʻi ai haʻane kai hoʻataá ʻi ha meimei taʻu ʻe taha kae fakahaofi ha paʻanga feʻunga ke fakatau mai ʻaki ha mīsini ke faingofuaʻi ange ʻa e haiané. Tuʻunga ʻi heʻene ʻofa ki hono uaifí, naʻá ne tā ha sīpinga ʻo e fetauhiʻaki ʻi he lotoʻi fāmilí maʻa hono ngaahi fohá. Naʻe pehē ʻe ʻEletā Kulisitofasoni ʻi he fengāueʻaki pelepelengesí ni, “Naʻe ʻikai ke u fakatokangaʻi he taimi ko iá e feilaulau mo e ngāue ʻi he ʻofa ʻa ʻeku tamaí ki heʻeku faʻeé, ka kuó u ʻilo he taimí ni, peá u pehē loto pē, ‘Ko e tangatá ia.ʻ”⁴