ʻUhinga ʻe Hongofulu ʻOku ou Manako ai ʻi he Tohi ʻa Molomoná

Fai ʻe David Fullmer

ʻOku nofo ʻa e tokotaha naʻá ne faʻú ʻi ʻIutā, USA.

ʻOku akoʻi ʻe he tohi maʻongoʻongá ni, ʻi heʻene hoko ko e fakamoʻoni hono ua ʻo Sīsū Kalaisí, ha ngaahi fakakaukau mo ha ngaahi tokāteline ʻoku ʻikai toe maʻu ʻi ha feituʻu kehe.

ʻOku ou Manako ʻi he Tohi ʻa Molomoná. ʻI hono fakalūkufuá, ʻoku ou ʻofa ai koeʻuhí ʻoku ʻomi ʻe he mālohi ʻokú ne maʻú, ki he niʻihi ʻoku nau lau iá, ke nau toe “ofi ange ki he ʻOtuá ʻi haʻane tauhi ki hono ngaahi akonakí ʻi ha toe tohi kehe.” Ko hono ʻuhinga ia e lea ʻa e Palōfita ko Siosefa Sāmitá ki ai ʻo pehē ko e “maka-tuʻu-loto ia ʻo ʻetau tui fakalotú” pea “ko e tohi totonu taha ia ʻi he ngaahi tohi kotoa pē ʻi he māmaní.”¹

Ka ʻoku ʻi ai ha ngaahi ʻuhinga mahino ʻoku ou ʻofa ai he tohí. Ko ha ʻuhinga ʻeni ʻe 10 mei he ngaahi ʻuhinga lahi mo faufauá:

Ko e Tohi ʻa Molomoná …

Naʻe lēkooti ia ʻi ha vahaʻataimi ʻe taha ʻo e hisitōliá ke fakaʻaongaʻi ʻe he kau laukongá ʻi ha kuonga kehe—ko kitautolu ia. Vakai, Molomona 8:16, 34–35.
Fakamatalaʻi mahino ai ʻa e ngaahi founga fakaʻauha ʻa Lusifā ʻi he ngaahi ʻaho fakaʻosí. Vakai, 2 Nīfai 28:3–29.
Fakahā ai ko e vaivai fakaetangatá ko ha faingamālie ia ke ngaohi ai ke mālohi, ʻo haʻu ʻi he loto fakatōkilalo kia Kalaisi. Vakai, ʻEta 12:27.
Fakamatalaʻi ai ko e manavaʻofá ʻa e ʻofa haohaoa ʻa Kalaisí, ko ha meʻaʻofa fakalangi ia ʻe lava ke tau maʻu ʻi haʻatau fai ha ngaahi meʻa pau. Vakai, Molonai 7:43–48.
Fakamahino ʻa e fie maʻu ke ʻi ai e fehangahangai ʻi he meʻa kotoa pē. Vakai, 2 Nīfai 2:11–13.
Fakahā mahino ai ʻa e founga ʻe lava ai ʻe he ʻaloʻofá ʻo fakafiemālieʻi ʻa e fakamaau totonú. Vakai, ʻAlamā 34:11–30.
Lekooti ha falukunga kakai ʻe ua ne ʻoange ki ai ha ngaahi fakahinohino pau ke ako ʻa e ngaahi lea ʻa ʻIsaiá, ko e taha ko kitautolu ia. Vakai, 2 Nīfai 25:4-8; Molomona 8:23.
Hoko ko e fakamoʻoni tākaua mo e Tohi Tapú ki he vā fetuʻutaki ʻo e ʻOtuá mo e faʻahinga ʻo e tangatá, ʻo hangē ko hono talamuʻaki ʻe ha kikite ʻi he Fuakava Motuʻá. Vakai, ʻIsikeli 37:15–20; 2 Nīfai 28:29; 29:3–8.
ʻOku ʻi ai ha talaʻofa ʻo ka taú ka lau mo lotua ia ʻi he loto fakamātoato, ʻo maʻu ʻa e tui kia Kalaisí, ʻe fakahā mai ʻe he ʻEikí kiate kitautolu ko ʻEne folofolá ia. Vakai, Molonai 10:4–5.
ʻOku akoʻi mai ne hoko e mamahi ʻa e Fakamoʻuí ke ne maʻu ai ʻa e ongoʻi haohaoa ki hotau ngaahi ʻahiʻahí pea mo ʻEne malava ke tokoniʻi kitautolu ʻi hotau faingatāʻiá. Vakai, ʻAlamā 7:11–13.

Kae meʻa tēpuú, ʻoku ou ʻofa ʻi he Tohi ʻa Molomoná ko ʻene fakamoʻoni mahino ko e Kalaisí ʻa Sīsū. ʻOku ou ʻofa ai ko ʻene talaʻofa ʻe huhuʻi ʻe he ʻEikí ʻa e fale ʻo ʻIsilelí ʻi heʻenau fakahoko mo tauhi ʻa e ngaahi fuakava toputapu ne fakahoko mo Iá. Ko ha mana fakaeonopooni ʻa e Tohi ʻa Molomoná—ko ha meʻaʻofa ʻo e ʻofa mei he ʻOtuá Tonu kiate kitautolu.