Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.

“ʻUhinga ʻe Hongofulu ʻOku ou Saiʻia ai ʻi he Tohi ʻa Molomoná,” peesi 12: Hili haʻamou lau fakataha fakafāmili e fakamatala ko ʻení, te ke lava ʻo fakaafeʻi ʻa e mēmipa takitaha ʻo e fāmilí ke nau hiki ʻa e ngaahi ʻuhinga ʻoku nau saiʻia ai ʻi he Tohi ʻa Molomoná. Fakakaukau ke kole ki he tokotaha kotoa ke nau vahevahe ʻenau lisí mo ʻenau potufolofola manakó mei he Tohi ʻa Molomoná. Te mou lava ʻo fokotuʻu ha taumuʻa ke maʻu ai ha ngaahi ʻuhinga lahi ange hoʻomou saiʻia ʻi he Tohi ʻa Molomoná ʻi hoʻomou toutou lau fakataha iá.

“Ko ʻEtau ʻi he Feituʻu ʻOku Totonu Ke Tau ʻI Aí,” peesi 66: Te mou lava ʻo lau fekauʻaki mo e aʻusia ʻa ʻEletā Fungí (Funk) ʻi heʻene fili ke tuʻu ʻi ha potu māʻoniʻoní pea mou toki fakahoko ʻa e ʻekitivitī ʻi he peesi 67. Fakakaukau ke mou aleaʻi fakafāmili ʻa e meʻa ʻokú ne ʻai ha feituʻu ke māʻoniʻoní pea mo e founga ʻe lava ai ʻe he tokotaha kotoa ʻo tuʻu ʻi he potu māʻoniʻoní, ʻo tatau ai pē kapau ʻoku ʻikai ko ha loto falelotu pe temipale. Aleaʻi ʻa e mahuʻinga mo e fatongia ʻo e Laumālie Māʻoniʻoní ʻi hono tokoniʻi kitautolu ke tau tuʻu ʻi he ngaahi potu māʻoniʻoní.