Ko ʻEtau ʻi he Feituʻu ʻOku Totonu Ke Tau ʻi Aí

Fai ‘e ‘Eletā Randy D. Funk

ʻO e Kau Fitungofulú

Tā fakatātaaʻi ʻe Mark Robison

ʻOlungá: Tā Fakatātā ʻe Mark Robison; Toʻomataʻu: Tā Fakatātā ʻe Alyssa Tallent

Naʻá ku nofo ʻi Manitai, ʻIutā, USA ʻi hoku taʻu 11. Naʻe ʻomai heʻeku faiako Palaimelí, ʻi he kamataʻanga ʻo e taʻú, ha kiʻi toki fakaʻofoʻofa te ke lava ʻo tā ʻakau ʻaki.

Naʻá ne pehē, “Ko ia pē ʻe tuʻo lahi taha ʻene haʻu ki he Palaimelí he taʻu ní, te ne maʻu ʻa e tokí.” Naʻá ku fakapapau he taimi pē ko iá ke u haʻu he uike kotoa pē. Naʻá ku maʻu ʻa e kiʻi tokí ʻi he fakaʻosinga ʻo e taʻú!

Ne ʻikai hano taimi kuo hoko hoku taʻu 12. Naʻe fakanofo au ko ha tīkoni. Naʻe hiki hoku fāmilí, ʻi he meimei taimi ko ʻení, ki Metisoni, Uisikonisini, USA. Naʻá ku ʻofa ki hoku ngaahi kaungāmeʻá, ka naʻá ku fiefia ke maʻu ha ngaahi kaungāmeʻa foʻou. Naʻe lahi ʻaupito ange ʻa Metisoni ia ʻi Manitai. Naʻe lahi hoku ʻapiako foʻoú. Naʻe ʻikai ke tokolahi e kāingalotu ʻo e Siasí. Naʻe fakaafeʻi au ki ha paati he ʻaho ʻe taha ʻe ha tamaiki ʻiloa. Ka naʻe pō tatau pē ʻa e pātí mo ha ʻekitivitī ʻa e Siasí. Naʻá ku ʻiloʻi ʻoku totonu ke u ʻalu ki he ʻekitivitií. Naʻá ku ako mei haʻaku aʻusia ʻi he Palaimelí ʻoku hoko mai ʻa e ngaahi meʻa leleí ʻi he taimi ʻoku ou faivelenga ʻo kau ʻi heʻeku ngaahi houalotu ʻi he Siasí. Naʻá ku fakamālō ange heʻenau fakaafeʻi aú, mo fakamatalaʻi ange ʻa e ʻuhinga he ʻikai te u ʻalu ange aí.

Naʻe talanoa ʻa e taha kotoa he akó ki he pātí, ʻi he ʻaho hono hokó. Naʻa nau inu kava mālohi he pātí, pea naʻe palopalema lahi ʻa e taha kotoa pē naʻe ʻalu ki ai! Naʻá ku fakamālō ʻi heʻeku ʻi he feituʻu naʻe fie maʻu ke u ʻi aí.

ʻOku ou fakamālō ʻi heʻeku ʻalu ki he Palaimelí mo e ngaahi houalotu kehe ʻa e Siasí ʻi heʻeku kei tupu haké. Naʻá ku ako ai ki he ngaahi meʻa mahuʻinga fekauʻaki mo e ongoongoleleí. Pea naʻá ku fiefia ʻi he ngaahi ʻekitivitií. ʻOku tāpuakiʻi kitautolu ʻe he Tamai Hēvaní ʻi he taimi ʻoku tau feinga ai ke ʻi he feituʻu ʻoku totonu ke tau ʻi aí mo fai e meʻa ʻoku totonu ke tau faí. ʻOkú Ne fakamālohia ʻetau tuí. ʻOkú Ne maluʻi kitautolu mei he ʻahiʻahí mo e faiangahalá.

ʻI he Tokāteline mo e Ngaahi Fuakava 88:63, naʻe folofola ai ʻa Sīsū, “ʻUnuʻunu mai kiate au pea te u ʻunuʻunu atu kiate kimoutolu.”

ʻI heʻetau kau atu ki heʻetau ngaahi houalotu ʻa e Siasí, kau ai ʻa e houalotu sākalamēnití, ʻoku tau ʻunu ʻo ofi ange ai ki he Tamai Hēvaní pea mo Sīsū Kalaisi. ʻOku tau ako ai ʻa e ngaahi moʻoni mahuʻinga ke ne tataki ʻetau ngaahi filí lolotonga e uiké, tatau pē ʻi he taimi ʻoku ʻikai ke tau ʻi he lotú ai pe ʻātakai ʻo e niʻihi ʻoku tatau ʻetau tui fakalotú. ʻI he taimi ʻokú ke moʻui angatonu aí, ʻe tokoniʻi koe ʻe he Laumālie Māʻoniʻoní ke ke ʻiloʻi ʻa e feituʻu ʻoku fie maʻu ke ke ʻi aí mo e meʻa ʻoku totonu ke ke faí.

ʻUNU KE OFI KIA SĪSŪ

ʻI he siasí, ʻoku tau ako ai ki he founga ke fai ai ha ngaahi fili leleí pea hoko ko e kau muimui lelei ange ʻo Sīsū. Fakafonu ʻa e ngaahi laine ʻataá ke tokoni ki he fānau ʻi he fakatātaá ke nau ʻilo e meʻa ʻoku totonu ke faí.

1. “Kae _______ ʻakimoutolu kiate kimoutolu” (ʻEfesō 4:32).

2. “ʻOku monūʻia ʻa e _________ ” (Mātiu 5:9).

3. “ʻO ka mou ka ʻi he __________ ʻʻo homou kāingá, ʻoku mou ʻi he tauhi pe ʻo homou ʻOtuá” (Mōsaia 2:17).

4. “Kapau ʻoku ai ha meʻa ʻoku __________, fakaʻofoʻofa, pe ongoongo lelei pe __________, ko e ngaahi meʻa ia ʻoku mau fekumi ki aí” (Ngaahi Tefito ʻo e Tui 1:13).