Leʻo ʻo e Kau Māʻoniʻoni ʻi he Ngaahi ʻAho Kimui Ní
Meʻa Fakapaʻangá: Polisí, Maá, Laisé mo e Pīní
ʻOku ʻikai fakahā ʻa e hingoá, Hauaiʻi, USA
Tā fakatātaaʻi ʻe Stan Fellows
Naʻe totongi mamafa e fakaʻosi ako hoku husepānití, ko ia naʻá ma nofo ʻamanaki ki ha ngāue ʻe tokoni ke ma totongi ʻosi homa moʻuá. Naʻe tuʻuaki mai ha ngaahi tuʻunga lahi ka naʻá ma ongoʻi ko e lelei tahá naʻe fekauʻaki mo ha tuʻunga fakapalōfesa ʻi Hauaiʻi. Ka, ko e taimi naʻe aʻu mai ai ʻema aleapaú, naʻe māʻulalo ange ʻa e vāhengá ia ʻi he meʻa ne mau alea ki aí. Naʻe fakahā mai kiate kimaua ne ʻi ai ha tuʻutuʻuni foʻou pea he ʻikai ke lava hano toe aleaʻi. Kuó ma ʻosi fakapapauʻi ʻa e ngāue foʻoú, peá ma fakamoʻoni ai pē he aleapaú.
Naʻá ma saiʻia ʻi Hauaiʻi, saiʻia mo hoku husepānití ʻi heʻene ngāué, pea naʻe tāpuekina homa fāmilí. Naʻe ngali lele lelei e meʻa kotoa ʻi he totongi fakafoki ʻema nō akó kae tālunga hono fakahoko mai ʻe he kautaha kaati fakamoʻuá ʻe hiki hake ʻema totongi tupú ki he peseti ʻe 14 kae ʻikai ko e peseti ʻe 3 lolotongá. Naʻá ma talaange ne ma totongi taimi totonu maʻu pē pea kuo ʻosi totongi ʻo ʻosi ha moʻua lahi. Ka naʻe ʻikai toe holomui ʻa e kautahá ia.
ʻUluakí, naʻá ma fakahoko ha founga ngāue fakapaʻanga mālie, ʻo ʻave ʻema toenga paʻangá ki ha ngaahi kaati fakamoʻua kehekehe ʻoku siʻi ai ʻa e totongi tupú. Peá ma kamata tuʻutuʻu leva e fakamolé. Naʻá ma holoki lahi ʻaupito e patiseti ki he meʻakaí, valá, mo e taipá, ki homau fāmili toko fitú. Naʻa mau moʻui pē ʻi heʻemau meʻakai naʻe fakatolongá. Naʻa mau kai polisi he pongipongi kotoa: mau kai mā taʻo pē ʻi ʻapi he hoʻatā efiafi kotoa; pea mau kai laise mo e piini he efiafi kotoa. Naʻe ʻikai ha meʻakai fakaifoifo hangē ko e patá, huʻakau foʻoú, pe huhuaʻi fuaʻi ʻakau. Hili pē hono totongi ʻemau vahehongofulú mo e ngaahi fakamole tefitó, ne ʻalu kotoa ʻemau paʻanga hū maí ki he totongi homau moʻua he kaati fakamoʻuá.
ʻOsi ha māhina ʻe ono mei ai, kuo mau ʻosi totongi ha peseti ʻe 90 homau moʻuá! Kuo liuliunga ʻe he ʻEikí ʻemau paʻanga hū maí ʻi ha ngaahi founga fakaofo. Naʻe lava ke vave ʻemau totongi ʻosi homau toenga moʻuá, pea ʻoku mau fakamālō ʻaupito ai. ʻOku kei lāunga pē hoku ʻofefiné fekauʻaki mo e taimi naʻe pau ai ke kai polisi he pongipongi kotoá, ka ʻoku ou ʻiloʻi naʻe tāpuekina fakapaʻanga mo fakatuʻasino kimautolu ʻi he totongi ʻemau vahehongofulú mo talangofua ki he palōfitá.