Fanontaniana & Valiny

“Ankoatra ny vavaka sy ny fandalinana ny soratra masina dia inona no fomba tsara indrindra hanamafisako orina ny fijoroana ho vavolombelona ananako?”

Mazava ho azy fa tsy ho azo indray mandeha miaraka ny fijoroana ho vavolombelona anananao. Hitombo amin’ny alalan’ny zavatra iainana ara-panahy tsirairay isak’izay mandeha izany, araka ny voalazan’ny soratra masina hoe “andalan-tsoratra anampy andalan-tsoratra, fitsipika anampy fitsipika” (2 Nefia 28:30). Noho izany ianao dia tokony hikolokolo sy hanamafy orina ny fijoroana ho vavolombelona anananao, tahaka ny voa maniry mihitsy (jereo ny Almà 32:28–43). Ary tahaka ny zava-maniry izay tsy afaka ny hivelona amin’ny rano fotsiny ihany, dia tsy iray fotsiny ihany ny fomba “tsara indrindra” mba hanamafisana orina ny fijoroana ho vavolombelona anananao. Mila fomba maromaro mitambatra ianao.

Tsy isalasalana fa ny vavaka sy ny fandalinana ny soratra masina dia fomba tsara hikolokoloana ny fijoroana ho vavolombelona anananao. Rehefa mandalina ny filazantsara sy mivavaka omban’ny tena finiavana ianao mba hahafantatra fa marina ny zavatra iray dia hanampy anao ny Fanahy Masina mba hahatsapa ny fahamarinan’ny filazantsara (jereo ny Môrônia 10:4–5).

Afaka manamafy orina ihany koa ny fijoroana ho vavolombelona anananao ianao amin’ny alalan’ny fitandremana ny didy. Rehefa miaina ny fitsipiky ny filazantsara iray ianao, toy ny fifadian-kanina, ny fitandremana ny Sabata ho masina, na ny fandraisana ny fanasan’ny Tompo, dia manomboka mahazo fijoroana ho vavolombelona mikasika ny fomba sy ny antony maha-marina izany, toy izay hoe satria marina fotsiny izany. Nilaza i Jesoa fa rehefa mifidy ny “hanao ny sitrapony” ianao dia “hahalala ny amin’ny fampianarany” (Jaona 7:17).

Fomba iray hafa hikolokoloanao ny fijoroana ho vavolombelona anananao ny fizarana izany. Hoy ny Filoha Boyd K. Packer (1924–2015), Filohan’ny Kôlejin’ny Apôstôly Roambinifolo hoe: “Ny fijoroana ho vavolombelona iray dia tokony ho azo mandritra ny fizarana izany!” (“The Candle of the Lord,” Ensign, jan. 1983, 54; Tambuli, jolay 1983, 34). Azonao atao ny mizara ny fijoroana ho vavolombelona anananao ao am-piangonana, ao amin’ny kilasin’ny seminera, ao an-trano ary amin’ny namana. Rehefa manao izany ianao dia afaka mijoro ho vavolombelona aminao ny Fanahy Masina fa marina ny zavatra zarainao.

Rehefa manamafy orina ny fijoroana ho vavolombelona anananao amin’ny fomba maro samihafa ianao dia hitombo sy hihalalim-paka izany, ary hahatsapa fiadanana sy fifaliana ianao.

Miaraha miasa amin’ny misiônera

Ny asa fitoriana ny filazantsara no fomba tsara indrindra ho ahy mba hanamafisana orina ny fijoroana ho vavolombelona ananako. Isaky ny miara-miasa amin’ny misiônera aho dia mahatsapa ny fitiavan’i Kristy.

Joy D., 19 taona, Leyte, Philippines

Miezaha mba ho lasa mpianatra

Afaka manamafy orina ny fijoroana ho vavolombelona anananao ianao amin’ny alalan’ny fiezahana ny ho tena mpianatr’i Jesoa Kristy marina lalandava. Ny fankatoavana ny didin’ Andriamanitra dia mahatonga antsika ho maherifo amin’ny fijoroana ho vavolombelona ananantsika, ary izany kosa indray dia mahatonga ny fijoroana ho vavolombelona ananantsika ho mafy orina bebe kokoa aza sy ho vonona amin’ny fanjakan’ Andriamanitra (jereo ny F&F 76:79). Afaka manamafy orina ihany koa ny fijoroana ho vavolombelona anananao ianao amin’ny alalan’ny fizarana izany.

Elder Mule Simon, 23 taona, manompo ao amin’ny Misiônan’i Lubumbashi, Repoblika Demôkratikan’i Congo

Mandehana manao asa fitoriana amin’ny fotoana feno

Ny fandehanana manao asa fitoriana amin’ny fotoana feno dia hanamafy orina ny fijoroana ho vavolombelona anananao manokana sy ny an’ny hafa izay ampianarinao. Mandritra ny asa fitoriana amin’ny fotoana feno ianao dia hianatra hiantehitra tanteraka amin’ny Tompo fa tsy amin’ny herin’ny tenanao manokana. Hampatanjaka anao ny asa fitoriana amin’ny fotoana feno, ary rehefa manompo ny Tompo sy manao ny asany ianao dia hanamafy orina ny fijoroana ho vavolombelona anananao izany.

Elder Bailey Peaali’I Williams, 19 taona, Misiônan’i Singapour

Zarao izay fantatrao fa marina

Nianatra aho fa anisan’ny fomba tsara indrindra hanamafisana orina ny fijoroana ho vavolombelona ananako ny mizara izany amin’ny hafa. Isaky ny mizara ny zavatra inoako sy fantatro fa marina aho, na dia mety ho tsotra sy kely aza izany, dia mahatsapa hafanana lehibe ao amin’ny tratrako aho, ary tonga miaraka amin’izany ny fanamafisana mafimafy kokoa ao am-poko fa marina ireo zavatra nolazaiko ireo! Na raha lazaina amin’ny teny hafa dia tsapako fa nampatanjahana ny fijoroana ho vavolombelona nananako.

Douglas S., 20 taona, São Paulo, Brésil

Mihainoa ny Fanahy Masina

Ny fandehanana any am-piangonana, ny famakiana soratra masina, ny fihainoana ireo lahateny tamin’ny fihaonambe, sy ny sisa dia tsy hanampy anao hanamafy orina ny fijoroana ho vavolombelona anananao raha tsy mihaino ny Fanahy Masina ianao. Hijoro ho vavolombelona aminao momba ny fahamarinana Izy. Henoy mandrakariva ny Fanahy Masina satria eo Izy ary hanampy anao hanamafy orina ny fijoroana ho vavolombelona anananao.

Alyssa B., 16 taona, Virginie, Etazonia

Ataovy izay hahatongavana ho tahaka an’i Kristy bebe kokoa

Afaka manamafy orina ny fijoroana ho vavolombelona ananantsika isika amin’ny alalan’ny fahatongavana tahaka an’i Kristy bebe kokoa. Nanamafy orina ny fijoroana ho vavolombelona nananako aho rehefa naneho ny fitiavana madion’i Kristy sy nanompo ny hafa tahaka ny nataon’ny Mpamonjy.

Kyung Jin P., 17 taona, Séoul, Kôrea atsimo

Zarao ny fijoroana ho vavolombelona anananao

Fomba tsara hanamafisana orina ny fijoroana ho vavolombelona anananao ny fizarana izany. Indraindray dia rehefa mizara ny fijoroana ho vavolombelona anananao ianao no lasa tena mahazo izany. Afaka mifady hanina ihany koa ianao mba hahafantaranao mivantana raha toa ka marina izay ampianarina anao. Efa samy nataoko ireo zavatra roa ireo ary tena nanamafy orina tokoa ny fijoroana ho vavolombelona ananako izany.

Porter S., 12 taona, Idaho, Etazonia

Manompoa ny hafa

Ankoatra ny vavaka sy ny fandalinana ny soratra masina dia heveriko fa ny fomba tsara indrindra hanamafisana orina ny fijoroana ho vavolombelona ananan’ny tena dia amin’ny alalan’ny asa fanompoana. Rehefa manompo ny hafa isika dia mampiseho amin’ Andriamanitra fa miraharaha ireo zanany. Afaka mahazo ny Fanahy ihany koa isika rehefa manao ny asan’ Andriamanitra. Fantatro fa efa im-betsaka aho no nahazo fankaherezana tao anatin’ny fotoan-tsarotra sy nahazo ny valin’ireo fanontaniako teo am-panaovana asa fanompoana.

Caroline J., 18 taona, Utah, Etazonia