2018
6 Tāpa’o nō te Pāta o te nehenehe e fa’ataui i tō ’outou hi’ora’a i te Pāta
April 2018

6 Tāpa’o nō te Pāta o te nehenehe e fa’ataui i tō ’outou hi’ora’a i te Pāta

Nā Valerie Durrant

Te mau ve’a a te ’Ēkālesia

’Ia ha’amana’o ana’e tātou i te mau tāpa’o nō te Pāta, e rahi atu ā ïa tō tātou ’itera’a ’e tō tātou ’oa’oa i te hōhonu nō ni’a i te tupura’a mau o te ti’a-fa’ahou-ra’a.

table set with passover meal

Mea au nā’u te Pāta, te hō’ē tau fa’afaeara’a o te fa’aha’amana’o i tō Iesu Mesia fa’aorara’a i te mau tamari’i a te Atua i te fa’atītīra’a a te pohe ’e a hade.

E 1.500 matahiti rā hou te ti’a-fa’ahou-ra’a, ’ua fa’aha’amana’o te hō’ē ato’a mahana mo’a i tō Iehova fa’ati’amāra’a i te mau tamari’i nō ’Īsera’ela i tō rātou fa’atītīra’ahia i ’Aiphiti.

Tē ha’amana’o nei te Pāta i te tusia tāra’ehara a te Fa’aora; ’ua tohu ātea te Pāta i te reira. E nehenehe tā rāua to’opiti e fa’ahōhonu i tō tātou ’ite nō ni’a i te ti’a-fa’ahou-ra’a. Teie te tahi mau tū’atira’a i rotopū i te Pāta ’ati Iuda ’e te Pāta Keritetiano :

Pāta ’ati Iuda

Pāta Keritetiano

1. ’Ua fa’atumuhia te Pāta ’ati Iuda i ni’a i te arenio Pāta, ’e hō’ē oni ’ino ’ore (’a hi’o Exodo 12:5), ma te ivi tei ’ore i ’ōfatihia(’a hi’o Exodo12:46).

1. ’O Iesu te arenio a te Atua (’a hi’o Ioane 1:29), hara ’ore ’e ’aore te mau ivi i ’ōfatihia (’a hi’o Ioane 19:36).

2. Pane fa’ahōpue-’ore-hia, vi’ivi’i ’ore (’a hi’o Bible Dictionary, « Leaven »), o te ’āpe’e i te ’ōro’a Pāta (’a hi’o Exodo 12:8, 15).

2. ’O Iesu te pane ora, ’e ’aore e vi’ivi’i i roto iāna (’a hi’o Ioane 6:35).

3. Mau rā’au ri’i maramara, ’e hō’ē tāpa’o nō te fa’atītīra’a ’o ’Īsera’ela, o te ’āpe’e i te ’ōro’a Pāta (’a hi’o Exodo 12:8).

3. E nehenehe tātou e fa’atītīhia e te hara, nō te mea rā ’ua inu Iesu i te ’āu’a maramara (’a hi’o PH&PF 19:18), ’e nehenehe ïa ia tātou ’ia fa’ati’amāhia nā roto i tāna tāra’ehara (’a hi’o 1 Korinetia 15:22).

4. E ’amu-’oi’oi-hia te ’ōro’a Pāta (’a hi’o Exodo 12:11).

4. ’Ua fa’aineine-’oi’oi-hia te tino ’o te Fa’aora nō te hunara’a (’a hi’o Ioane 19:31).

5. Te feiā fa’aro’o tei peni i te toto ’o te arenio i ni’a i tō rātou mau ’ōpani, ’ua fa’aorahia ïa rātou i te pohe tino (’a hi’o Exodo12:7, 13).

5. Te feiā fa’aro’o tei rave i te tāpa’o o te toto ’o te arenio i te mau hepetoma ato’a i roto i te ’ōro’a ’e o te « ha’amana’o noa ā iāna » (PH&PF 20:77, 79) ’e nehenehe ïa rātou i te fa’aorahia i te pohe vārua ’e te pohe tino (’a hi’o Mosia 4:2).

6. Te mahana i muri mai i te ha’apohera’ahia te tamari’i matahiapo, ’ua fa’ati’amāhia te ’ati ’Īsera’ela tei fa’atītīhia (’a hi’o Exodo 12:29–32).

6. Te mahana i muri a’e i te tāparahi-pohera’a-hia te Fanau Tahi, ’ua poro Iesu i te ti’amāra’a i te feiā tei tāpe’ahia i roto i te Ao Vārua (’a hi’o PH&PF 138:18, 31, 42).