Mau hōho’a nō te fa’aro’o
Rakotomalala Alphonse
Sarodroa, Madagascar
I te taime ’a ’ana’anatae ai ’o Rakotomalala i te ’evanelia, te fare purera’a fātata roa a’e tei Antsirabe ïa, te hō’ē ’oire e 50 kilometera i te ātea i tōna ’oire iti i Sarodroa. ’Ua ’ite ’o Rakotomalala ’e te hō’ē hoa i te hō’ē rāve’a nō te haere atu i te fare purera’a i te mau sābati ato’a.
I teie mahana, tē vai nei te hō’ē fare purera’a iti i Sarodroa ’e ’ua hau atu i te 100 melo e tae nei i te mau sābati ato’a. ’Ua ’ite ’o Rakotomalala i tōna ’oire iti i te fāri’ira’a i te ’evanelia. E maha misiōnare tei tāvini nō Sarodroa atu ’e tē tāmau noa ra te ’Ēkālesia i te tupu i te rahi.
Cody Bell, ta’ata pata hōho’a
I te taime ’a ma’ihia ai tō’u pāpā rū’au, ’ua tere atu vau i Antsirabe nō te fa’aea i piha’i iho iāna. ’Ua haere atu te mau misiōnare i tōna ra fare e rave rahi taime. E ’ere pāpā rū’au ’e ’o vau nei i te mau melo nō te ’Ēkālesia, e mea au rā nāna ’ia fārerei i te mau misiōnare. I te hō’ē pō, ’ua hōro’a rātou i te hō’ē ha’amaita’ira’a nō pāpā rū’au, ’e i muri a’e i te hō’ē purera’a pō ’utuāfare, ’ua hōro’a mai rātou ia mātou te hō’ē Buka a Moromona.
« ’A tai’o i teie buka ’e ’a ani i te Atua e parau mau ānei te reira », ’ua parau mai ra rātou.
I tō’u ho’ira’a atu i Sarodroa, ’aita vau i hina’aro i te tai’o i te Buka a Moromona nō te mea ’ua mana’o vau e ’ere i te mea mau. I muri iho, i te hō’ē mahana ’ua ma’i-roa-hia vau ’e ’ua fa’aea noa vau i roto i tō’u nei fare e rave rahi mahana. I tō’u ’imira’a i te tahi mea nō te rave, ’ua ’ite a’era vau i te Buka a Moromona ’e ’ua ha’amata iho ra vau i te tai’o.
I muri a’e, ’ua ho’i atu vau i Antsirabe ’e ’ua fārerei i te mau misiōnare. ’Ua ha’api’i rahi atu ā rātou iā’u nō ni’a i te Buka a Moromona ’e nō ni’a i te peropheta Iosepha Semita. ’Ua parau vau ia rātou ē ’aita mātou e hina’aro nei i te mau peropheta ’e ’aita e peropheta i teie mahana. ’Ua ani mai te mau misiōnare ē ’ia pure au i te Atua ’e ’ia ani mai te mea tē vai ra te hō’ē peropheta i teienei. ’Ua fafau mai rātou ē e pāhono mai te Atua iā’u. ’Ua pure au ’e ’ua ’ite au ē te mea tā te mau misiōnare i parau e parau mau ïa.
’Ua hina’aro vau i te haere i te purera’a, ’aita rā tā’u e moni nō te pere’o’o uta ta’ata. ’Ua parau atu vau i tō’u hoa, Razafindravaonasolo, ’e ’ua parau mai ’oia e nehenehe tā māua e tere nā ni’a i tō’u pere’o’o ta’ata’ahi. ’Ua ta’ahi māua e piti hora mai Sarodroa e tae atu i Antsirabe i te mau sābati ato’a. ’Ia rohirohi ana’e au i te ta’ata’ahi, e haere ïa vau i muri ’e e ta’ata’ahi ïa ’oia. I muri iho ’ia rohirohi ana’e ’oia, e tāui fa’ahou ïa māua i te pārahira’a.
I te pae hope’a, ’ua riro mai au ’e te ’utuāfare ’o Razafindravaonasolo ’ei melo nō te ’Ēkālesia. ’Ua haere atu mātou i te purera’a i Antsirabe e tae noa atu ’ua matara te hō’ē ’āma’a i Sarodroa. ’Ua ’oa’oa roa mātou ’e ’ua nehenehe ia mātou ’ia haere i te purera’a i tō mātou iho nei ’oire iti !
’Ua pi’ihia te metua tāne ’o Razafindravaonasolo ’ei peresideni ’āma’a. I te hō’ē mahana ’ua fārerei mai ’oia iā’u ’e ’ua fa’aitoito mai iā’u ’ia fa’aineine nō te hō’ē misiōni. ’Aita vau i mana’o ē e nehenehe tā’u e tāvini, ’ua ha’apāpū mai rā ’oia ē e nehenehe tā’u. ’Ua fāri’i au i te pi’ira’a ’ia tāvini i roto i te misiōni nō Madagascar Antananarivo. ’Ua fa’aipoipohia vau i teie nei ’e e piti tā’u nā tamari’i. Tē māuruuru nei au nō tō’u ’utuāfare, ’e ’ua rahi atu ā te mau mea tā’u i ’ite ’o tā’u e nehenehe e fa’a’ite atu o tei tauturu iā’u ’ia ’ite e parau mau teie ’Ēkālesia.
I muri a’e i te tomora’a mai i roto i te ’Ēkālesia, ’ua tāvini ’o Rakotomalala (i te pae ’atau), i roto i te misiōni nō Madagascar Antananarivo, ’e ’ua tāvini ’o Razafindravaonasolo (i te pae ’aui) i roto i te misioni nō te Repupirita Nūna’a nō Congo Kinshasa.
I te matahiti 2013 ra, ’ua patu te mau melo nō Sarodora i teie nei fare purera’a rā’au nō te ha’amorira’a. Tē ’oa’oa nei ’o Rakotomalala i te tauturura’a i te fa’atupu i te mau tauira’a i hina’arohia i ni’a te fare purera’a.
E mā’a tumu te raiti i Madagascar. Fātata pauroa te mau ta’ata i Sarodroa e ’ohipa nei i roto i te mau fa’a’apu raiti nō te pāturu i tō rātou mau ’utuāfare.
’A tāmau noa ai te ’Ēkālesia i te rahi, ’ua hina’aro te mau melo nō Sarodroa i te hō’ē fare purera’a ’āpī. Ma te hō’ē fare purera’a ’āpī tāpiri atu, tē ’ohipa nei ’o Rakotomalala ’e te tahi atu mau ta’ata nō te fa’ariro i te fare purera’a rā’au tahito ’ei mau piha ha’api’ira’a ’e hō’ē piha nā te ’episekōpo.
Mai te mau mahana ’a ta’ahi ai rāua e piti hora nō te tere i te fare purera’a i te mau sābati ato’a, ’ua vai noa ’o Rakotomalala ’e ’o Razafindravaonasolo ’ei mau hoa maita’i. Tē māuruuru nei rāua nō te mau ha’amaita’ira’a tā te ’evanelia i ’āfa’i mai ia rāua ’e i tō rāua mau ’utuāfare.
Tē ti’a ra ’o Rakotomalala ’e ’o Razafindravaonasolol i mua i te fare purera’a ’āpī i Sarodroa. ’Ua patuhia teie fare purera’a tima ’e te pirīti e te mau melo.