Tāvinira’a ’āmui a te feiā ’āpī
’Ua hau atu i te 700 feiā ’āpī tei ’āmui atu i te mau ’ōpuara’a tāvinira’a, ’oia ho’i te penira’a i te fare ’oire ’e te S.O.S. Village d’enfants i roto i te mata’eina’a nō Papara, Tahiti.
’Ua ta’iruru atu te feiā ’āpī mai te 14 e tae atu i te 18 matahiti i te ’āmuira’a u’i ’āpī « Nō te Pūai o te Feiā ’Āpī », tei fa’atupuhia i te fare ha’api’ira’a tuarua nō Papara i te ’āva’e tiurai i ma’iri a’e nei.
’Ua haere atu te feiā ’āpi mai te 14 e tae atu i te 15 matahiti i te tuha’a mātāmua ’e i te tuha’a piti o te feiā ’āpī ïa mai te 16 e tae atu i te 18 matahiti.
Te fā a te JSF ’aore rā a te FSY mai tei pi’ihia i roto i te mau fenua reo Peretāne i Patifita Apato’a, o te tauturura’a ïa i te feiā ’āpī ’ia ha’apūai i tā rātou tītaura’a ’ia ora i te ’evanelia a Iesu Mesia ma te hōro’ara’a ia rātou i te mau rāve’a ha’api’ira’a fa’auruhia ’e te mau ’itera’a tōtiare mā.
Mai tā Marc Valenza, te ti’a fa’atere ha’apa’o i te JSF i parau, te rahira’a o te ’ōpuara’a tāvinira’a ’oia ho’i te penira’a i te mau patu i rāpae ’e te mau ’ōpani o te fare ha’api’ira’a tuarua i reira te ’āmuira’a i te tupura’a. ’Ua tāmā ato’a te feiā ’āpī i te mau fare hapura’a pape, te mau piha ’ohipara’a ’e te mau piha ha’api’ira’a a te S.O.S. Village d’enfants, o tē ’atu’atu ra, tē ha’api’i ra ’e tē tāvini ra i te pae nō te ea i te mau tamari’i ’e te mau ’utuāfare i roto i te fifi.
Hau atu, ’ua hāmani ’e ’ua nira te feiā ’āpī i te mau ’animala ’e te mau hauti i roto i te ’ahu marū nā te tā’atira’a « Petits Dodos » o tē tauturu nei i te mau tamari’i tei ro’ohia i te ma’i gastro-oesophagien chronique.
I roto i te mau ’oire iti ’ohipara’a nō Papara, ’ua fa’aineine te feiā ’āpī ’e ’ua peni i te mau fa’anehenehera’a i rāpae, te mau vaira’a tanura’a tiare ’e te mau patu i rāpae, ’oia ato’a te mau piha ’āpo’ora’a ’e te mau piha a te fare ’oire. ’Ua parau o Valenza, ’ua hōro’a mai te ’oire i te peni ’e te mau materia.
Hau atu i te mau ’ōpuara’a tāvinira’a, ’ua ’āmui mai te feiā ’āpī i roto i te hō’ē hautira’a tāleni, te ha’api’ira’a ’evanelia, i te hō’ē orira’a ’e te tahi atu mau ’ohipara’a i te pō, ’oia ato’a nō te hō’ē poro’i ta’a ’ē video nā roto mai i te ’āpōsetolo Neil L. Andersen ’e te ’Episekōpo Fa’atere Rahi o te ’Ekālesia Gérald Caussé.
« Te manuira’a rahi o te ’āmuira’a o te ’itera’a ïa i te māra’ara’a i roto i te fa’aro’o o te feiā ’āpī », ’ua parau ’o Gilbert Tunutu, tauturu ti’a fa’atere o te JSF Tahiti.
Te mau ta’ata a’o i te ’āmuira’a ’oia ho’i o Elder Benjamin T. Sinjoux, hō’ē Hitu ’Ahuru Ārea, te ti’a ha’apa’o i te ’Ēkālesia i Pōrīnetia Farāni.
Nō roto mai te parau tumu o te ’āmuira’a i te Iakobo 1:5-6 ’e ’ua fa’aitoitohia te feiā ’āpī ’ia ha’afātata atu i te Atua nā roto i te pure.
« Tē ti’aturi nei au ē e rave mai ’outou i te rāve’a ’ia heheu i tō ’outou vārua ’e ’ia heheu i tō ’outou ’ā’au nō te ’imi i te hina’aro o tō tātou Metua i te Ao ra nō ’outou » ’ua parau o Elder Sinjoux i te feiā ’āpī. « Mai te mea e ’ā’au tae tō ’outou, e hina’aro mau tō ’outou ’ia ’ite i te hina’aro o te Metua i te Ao ra, e fa’a’ite mai te Vārua Maita’i ia ’outou i tōna hina’aro ».
’Ua rautīhia te ’āmuira’a fātata e 100 feiā ’āpī pa’ari ’e feiā pa’ari ’ā’au hōro’a tei riro ’ei ha’apa’o i te puhapara’a ’e tei tāvini i roto i te haruharura’a, te pārurura’a, te fa’aineinera’a i te mā’a, te ’atu’atura’a, te ha’apararera’a parau, te ha’api’ira’a i te pae vārua ’e te pāturura’a i te fa’a’ana’anataera’a.
Tē tupu nei teie huru ’āmuira’a i roto i te tahi atu mau tuha’a fenua nō Pātifita Apato’a ’e nā te ao ato’a nei.