Te fa’aipoipora’a, te moni’ e te fa’aro’o
Tē ora ra te ta’ata pāpa’i i te tufa’a fenua nō Ashanti, Ghana.
’E mea iti roa tō māua taime o tā’u vahine momo’ahia ’e o vau nei, hou tō māua fa’aipoipora’a, e mea iti roa te moni, tē vai ra rā tā māua te tahi mea hau roa atu i te faufa’a rahi : te fa’aro’o.
’Ua haere atu vau i te ’āmuira’a nā te feiā ’āpī pa’ari i Kumasi, Ghana, e ’ere nō te mea ’ua hina’aro vau i te hō’ē hoa here—’ua momo’a-a’ena-hia vau—nō te mea rā ’ua ’ite au ē, ’ua hina’aro vau i te tahi atu ā fa’aitoitora’a ’e ’ua riro te ’āmuira’a te vāhi tano nō te ’imi i te reira. ’Oia mau, ’ua pāhonohia mai tā’u mau pure i te ’āmuira’a ra i muri a’e i tō te tuahine Call, te hō’ē misionare pa’ari tei ha’a na muri i te feiā ’āpī pa’ari, paraparaura’a nō ni’a i te faufa’a rahi o te fa’aipoipora’a hiero.
I te pae hope’a o te tuatāpapara’a, ’ua taui ta’ue noa tōna hoho’a mata ’e ’ua parau mai ’oia e, « ’Aita ’outou e hina’aro i te moni nō te fa’aipoipo—te mau mea ana’e tā ’outou e hina’aro o te fa’aro’o ïa ». E au ra iā’u ē, tē parau ti’a mai nei ’oia iā’u, ’aita rā vau i mana’o e tano mau te reira iā’u nō te mea ’ua tiā ia māua ’ia ho’o mai i te mau mea e rave rahi ’ei fa’aineinera’a nō te fa’aipoipora’a. ’Ua parau vau iā’u iho, « Nāhea ïa ’ia ’ore au e hina’aro i te moni maori rā te fa’aro’o ana’e ? »
’Ua mana’ona’o vau i terā parau i te roara’a o te hepetoma. ’Ua ui au iā’u iho ’a na reira ai au, « ’Ua ta’oti’a-ānei-hia te Atua i te mea Tāna ’e nehenehe e rave ? » I te ha’amatara’a, ’ua mana’o vau ’aita, i muri iho rā, ’ua mana’o vau, ’oia. Puta mai ra teie uira’a, « Nāhea ïa ’Oia i te ta’ōti’ahia mai te mea ē, e Atua Mana Hope ’Oia ? » ’Ua ha’api’i mai te Vārua iā’u i te pāhonora’a : Te mau ha’amaita’ira’a a te Atua tei te huru ïa tō tātou fa’aro’ora’a Iāna. ’Aita ’Oia i ta’ōti’ahia i roto i Tōna ’aravihi i te ha’amaita’i ia tātou, ’e ti’a rā ia tātou ’ia tītau i taua mau ha’amaita’ira’a ra na roto i te fa’a’ohipara’a i te fa’aro’o nō te rave i te mea Tāna e hina’aro ia tātou ’ia rave.
I muri mai, ’ua pi’i au i tā’u vahine mōmo’a, nō te ’āparau i tā māua mau ’ōpuara’a nō te fa’aipoipora’a. Noa atu tō māua ’erera’a i te moni, ’ua fa’aoti māua i te hō’ē tai’o mahana nō tō māua fa’aipoipora’a, ’aita rā i nehenehe ia māua ’ia fa’aoti i te hō’ē tai’o mahana. ’Ua fa’aoti māua ē e ti’a iāna ’ia ani i tōna ’episekōpo e aha te mau tai’o mahana e vata i ni’a i te mau tārena a te pāroita ’e a te titi. Te hō’ē o nā tai’o mahana ’e piti tāna i hōro’a mai, ’ua mā’iti ïa māua i te 27 nō Tetepa 2014—’oia ho’i e hitu noa ïa hepetoma e tae atu ai i te mahana nō te fa’aipoipora’a.
’Ua ani Priscilla : « Obim [’oia ho’i « tā’u here » na roto i te reo Igbo], ’e moni ānei tā ’oe ? ’E mea poto roa te taime ».
’Ua pāhono atu vau, « ’Aita, ’e fa’aro’o rā tō’u. »
’Ua ’ata a’era ’oia ’e ’ua parau mai, « Nā reira ïa. ’E ha’apae ïa tāua ’e e pure ana’e ». Mai tā 1 Nephi 3:7 i parau, ’ua parau mai ’oia, « E ’iriti mai ïa te Fatu i te hō’ē rāve’a nō tāua nō te mea ’ua fa’aue ’Oia ia tāua ’ia fa’aipoipo ».
I roto i taua iho hepetoma ra, ’ua ’aufauhia vau nō te hō’ē ’ohipa tā’u i rave e rave rahi mau ’āva’e nā mua atu. ’Ua parau mai o Priscilla iā’u ē, ’ua hina’aro ’oia i te ha’amata i te hō’ē ’imi’imira’a faufa’a nō te tītau i te tahi atu ā moni. Na roto i te moni tei noa’a ia’u, ’ua ho’o mai ’oia i te mau pute vahine tei fa’a’ohipa-a’ena-hia ’e ’ua ho’o fa’ahou atu i te reira. I muri a’e i te ho’ora’a mai i te tahi o te mau mea i ni’a i tāna tāpura o te mau mea i hina’arohia, ’ua tata’i piti ïa tāna moni i te moni tā’u i hōro’a atu iāna.
I roto i taua ārea taime ra, ’aore rā ïa e ’ohipa i ’itehia. ’Aita te mau ’ohipa i parauhia mai i tupu. Tē vai nei ’e piti hepetoma e toe ’e tē vai noa rā ā te mau mea ’e ti’a ia māua ’ia ho’o mai. ’Ua parau tā’u vahine momo’a ē, ’ia fanu’u atu i te tai’o mahana. Te mea noa tā’u i parau, « E tae mai te hō’ē temeio ».
E piti noa mahana hou tō māua mahana fa’aipoipora’a, ’ua tupu te temeio : ’ua ’aufauhia vau nō te hō’ē ’ohipa tā’u i rave e piti hepetoma nā mua atu. ’Ua ha’api’i ato’a mai au ē, nā roto i te fa’aro’o ’e te ’ohiipa, e ha’amaitai mai ïa te Fatu ia māua nō te fa’atupu i tā māua mau ’ōpuara’a parau-ti’a.
’Ua haere atu māua i te fare moni nō te ti’i i te moni ’e mai reira e haere ti’a atu i te mātete nō te ho’o mai i te toe’a o te mea tei tītauhia nā roto i te ūa rahi, tā māua ’i fa’ariro mai te fa’ati’ara’a a te ra’i nō tā māua ’ohipa i rave nā roto i te fa’aro’o.
Iti mai i te 24 hora i muri mai, ’ua fa’aipoipohia māua. I te taime ’a anihia ai māua ’ia parau i tā māua mau parau fafau, ’ua tae mai te mana’o mai tei ’ore roa i ’itehia e au i roto i tō’u nei orara’a. ’Ua māuruuru roa vau ’e ’ua ti’aturi au ē, e nehenehe iā’u ’ia rave i te mau mea ato’a nā roto i te fa’aro’o mai taua taime ra. ’Ua ta’atihia māua i muri mai i roto i te Hiero nō Accra Ghana.
Noa atu ē, e hina’aro paha ’outou i te tahi moni nō te fa’aineine nō te fa’aipoipora’a, te mea hau roa atu i te faufa’a rahi tā ’outou e hina’aro, o te fa’aro’o ïa.