Nō te aha te Atua e fa’ati’a ai i te tama’i ?

I riro nā te tama’i ’ei tufa’a nō te ’ā’ai o te ta’ata i ni’a i teie nei fenua fātata mai te ha’amatara’a mai. ’Aita rā te Fatu, te Hui Ari’i nō te Hau, e hina’aro ia tātou ’ia tama’i i te tahi ’e te tahi. E heva ’oia ’ia mā’iti ana’e te ta’ata ’ia ’ore ’ia here te tahi i te tahi ’e « ’aore tō rātou ’e aroha ’e… ’ua au ’ore rātou i tō rātou iho » (Mose 7:33), ma te ha’avi’ivi’i i te fenua ’e te ’āhitahita (’a hi’o Genese 6:11-13). E ha’avāhia te feiā e fa’atupu mai i te tama’i nā roto i tō rātou parau-ti’a ’ore nō tā rātou mau ’ohipa.

’Ua fa’aue te Fatu i tōna nūna’a ’ia « fa’a’ore atu i te tama’i ’e ’a poro i te parau hau » (PH&PF 98:16). Tera rā, ’ia rave ana’e te mau fenua i te mauha’a tama’i nō te aro i te tahi ’e te tahi, ’ua parau ato’a te Fatu ē ’ua fa’ati’ahia tātou i te tahi mau taime ’ia pāruru i tō tātou mau ’utuāfare, tō tātou mau fenua, ’e tō tātou ti’amāra’a i te urupi’ipi’i, te fa’atītīra’a ’e te fa’afao (’a hi’o Alama 43:47 ; Alama 46:12-13 ; PH&PF 134:11). ’E tē fa’atura nei te feiā mo’a i te mau mahana hope’a nei e tāvini ra i roto i te nu’u o tō rātou mau fenua i te ha’api’ira’a ’ia « auraro i te mau ari’i, te mau peresideni, te mau fa’atere hau, ’e te mau ha’avā » (Te mau Hiroa Fa’aro’o 1:12).