Te hō’ē ha’api’ira’a māere roa

Nā Elder Valeri V. Cordón

Nō te Hitu ’Ahuru

« I te ’orera’a vau… i te ’iritira’a i te mau ha’amāramarama o te ra’i ra, ’a nini’i atu ai i te tao’a rahi ’ei maita’i nō ’outou » (Malaki 3:10).

I tō’u pa’arira’a i Guatemala, e fare hāmanira’a piriaro nō te mau pupu tū’aro tā tō’u nei ’utuāfare.

’Ua hina’aro tō’u pāpā e ’ia ha’api’i mai te mau tamari’i i roto i tō mātou ’utuāfare i te rave pūai i te ’ohipa. ’Ua tauturu mātou iāna i roto i te fare hāmanira’a piriaro. E rave rahi mau taime tō’u fifira’a i tō’u na’ina’ira’a. E au ra e pārari te mau mea iā’u i te mau taime ato’a ! I tō’u rā pa’arira’a, ’ua vaiiho tō’u pāpā iā’u ’ia ha’apa’o i te mau mātini nirara’a ’ahu.

’Ua ’aufau tō’u pāpā ia mātou nō te ’ohipa tā mātou i rave. I muri iho e ani mai ’oia, « e aha ïa tā ’oe e rave i tā ’oe moni ? » ’Ua ’ite au te pāhonora’a ti’a o te : « ’aufau ra ïa i tā’u tufa’a ’ahuru ’e ’ia fa’aherehere nō tā’u misiōni ».

I te 13ra’a o tō’u matahiti, e pau rahi tō tā mātou ’ohipa ’imi’imira’a faufa’a. ’Ua ti’a ia mātou ’ia ho’o atu e rave rahi o tā mātou mau mātini nirara’a ’ahu. ’Aita fa’ahou tā mātou e piti hānere ta’ata rave ’ohipa, ’ua ’iti mai ïa i te pae ta’ata rave ’ohipa. ’Ua ’ohipa rātou i roto i tō mātou fare tāpe’ara’a pere’o’o uira i te fare nei.

’Ua ’aufau noa nā vau i tā’u tufa’a ’ahuru, ’aita rā vau i ’ite mau i te faufa’a rahi o te reira. ’Ua ha’api’i mai au i muri iho i te hō’ē ha’api’ira’a māere. I te hō’ē po’ipo’i mahana mā’a ’ua fa’aro’o vau i tō’u nā metua i te paraparaura’a ma te hau. ’Ua parau tō’u pāpā i tō’u māmā ē ’ua nava’i te moni nō te ’aufau i te tufa’a ’ahuru ’aore rā nō te ho’o mai i te mā’a. E’ita rā e nava’i nō te ’aufau i nā ’ohipa e piti. ’Ua pe’ape’a roa vau. E aha ïa tā tō’u pāpā e rave ?

I te sābati ’ua ’ite au i tō’u pāpā i te hōro’ara’a i te hō’ē vehi rata i tō mātou nei peresideni ’āma’a. ’Ua mā’iti ’oia i te ’aufau i te tufa’a ’ahuru ! ’Ua ’oa’oa vau i tōnā nā reirara’a, ’ua pe’ape’a ato’a rā vau. E aha ïa tā mātou e ’amu ?

I te po’ipo’i a’e ’ua pātoto mai te tahi mau ta’ata i tō mātou ’ōpani. ’Ua parau mai rātou i tō’u pāpā ē e hina’aro rātou i te mau piriaro i te reira ihoa taime. ’Ua mātau te ta’ata i te ’aufau mai ia mātou ’ia oti ana’e te mau piriaro i te hāmanihia. ’Ua ’aufau rā teie mau ta’ata i tō’u pāpā i taua mahana ra, noa atu ’aita ā mātou i hāmani atura i te mau piriaro !

I te hō’ē hope’a hepetoma, ’ua ha’api’i mai au i te hō’ē ha’api’ira’a nehenehe tei vai maoro mai i roto i tō’u orara’a. E tauturu te ture nō te tufa’a ’ahuru ia tātou ’ia patu i tō tātou fa’aro’o ’e ’ia fa’a’ite i tō tātou māuruuru i te Metua i te Ao ra. Te ’aufaura’a i te tufa’a ’ahuru e hō’ē ïa ha’amaita’ira’a !