’A haere ’āmui ai tātou i mua

Nā te peresideni Russell M. Nelson

E te mau taea’e ’e te mau tuahine, e ’ā’au ha’eha’a tō’u i te taera’a mai i rotopū ia ’outou. ’A maha mahana i teienei, ’ua huna tātou i te hō’ē ’aito, te hō’ē peropheta nā te Atua—te peresideni Thomas S. Monson. E’ita e nehenehe e parau i te rahi ’e te fa’ahiahia o tōna orara’a. E poihere noa vau i tō māua hoara’a, ma te māuruuru i tāna i ha’api’i mai iā’u. I teienei, e hi’o tātou i mua ma te fa’aro’o hope i tō tātou Fatu ia Iesu Mesia, nāna teie ’Ēkālesia.

’A piti mahana i ma’iri, ’ua ruru te mau ’āpōsetolo ora ato’a i roto i te piha ni’a o te hiero nō Roto Miti. I reira ’ua rave rātou i te hō’ē fa’aotira’a tāhō’ē, ’a tahi, e fa’anaho fa’ahou i te Peresidenira’a Mātāmua i terā taime ’e te piti, ’ia tāvini au ’ei Peresideni o te ’Ēkālesia. ’Aita e parau tano nō te fa’a’ite atu i tō’u mana’o i te tu’ura’a tō’u mau taea’e—tei mau i te mau tāviri ato’a o te autahu’ara’a i fa’aho’ihia mai nā roto i te peropheta Iosepha Semita—i tō rātou rima i ni’a i tō’u upo’o nō te fa’atōro’a ’e nō te fa’ata’a iā’u ’ei Peresideni o te ’Ēkālesia. ’Ua riro te reira ’ei ’ohipa mo’a ’e te ha’eha’a.

Ma’iri mai nei i ni’a iā’u te hōpoi’a ’ia hāro’aro’a ’o vai tā te Fatu i fa’aineine nō te riro ’ei tauturu nō’u. Nāhea pa’i i te mā’iti e piti noa i roto i nā ’āpōsetolo e ’ahuru ma piti, ’ua here ho’i au ia rātou tāta’itahi ? E māururuu rahi tō’u i te Fatu i te pāhonora’a i tā’u mau pure tu’utu’u ’ore. ’Ua māuruuru vau i te peresideni Dallin Harris Oaks ’e i te peresideni Henry Bennion Eyring nō tō rāua fāri’ira’a e tāvini nā muri iā’u ’ei tauturu hō’ē ’e ’ei tauturu piti. ’Ua ho’i te peresideni Dieter F. Uchtdorf i tōna pārahira’a i roto i te pupu nō te Tino ’Ahuru Ma Piti ’āpōsetolo. ’Ua fāri’i a’ena ’oia i te mau ’ohipa rārahi e tū’ati i tōna ’aravihi ta’a ’ē hō’ē roa.

Tē fa’ahiahia nei au iāna ’e te peresideni Eyring nō tā rāua tāvinira’a rahi fa’ahiahia ’ei tauturu nā te peresideni Monson. ’Ua ’aravihi mau rāua, ’ua itoito ’e ’ua fa’auruhia rāua. ’Ua māuruuru rahi mātou ia rāua. ’Ua hina’aro rāua tāta’itahi ’ia tāvini i teienei i reira e hina’aro-rahi-hia ai rāua.

Nō te mea ’o te peresideni Oaks te piti o te ’āpōsetolo maoro roa a’e, ’ua riro mai ’oia ’ei peresideni nō te pupu nō te Tino ’Ahuru Ma Piti ’āpōsetolo. Teienei rā, nō tōna pi’ira’ahia i roto i te Peresidenira’a Mātāmua, e mai te au i te fa’anahora’a o te ’Ēkālesia, nā te peresideni M. Russell Ballard, tei maoro roa a’e i muri mai iāna, e tāvini ’ei ti’a peresideni nō te pupu. E ’ohipa ’āpipiti te Peresidenira’a Mātāmua ’e te Tino ’Ahuru Ma Piti nō te hāro’aro’a i te hina’aro o te Fatu ’e nō te fa’anu’u i tāna ’ohipa mo’a i mua.

Māuruuru nō tā ’outou mau pure. ’Ua pūpūhia te reira ’ati a’e i te ao nō mātou. I te po’ipo’i a’e i te fa’aru’era’a mai te peresideni Monson, ’ua pūpūhia te hō’ē pure mai te reira e te hō’ē tamāroa maha matahiti, tōna i’oa ’o Benson. Teie te tahi mea o tā tāna metua vahine i pāpa’i i roto i te hō’ē rata i tā’u vahine, ’o Wendy. ’Ua pure ’o Benson : « E te Metua i te Ao ra, māuruuru nō te peresideni Thomas S. Monson ’o te nehenehe e ’ite fa’ahou i tāna vahine. Māuruuru nō tō mātou peropheta ’āpī. Tauturu iāna ’ia vai itoito ’e ’eiaha e mata’u i tōna ti’ara’a ’āpī. Tauturu iāna ’ia pa’ari ’e ’ia maita’i tōna ea ’e ’ia pūai ’oia. Tauturu iāna ’ia roa’a te mana nō te mea e autahu’ara’a tōna. E tauturu ia mātou ’ia maita’i noa i ni’a ia vetahi ’ē ».

Tē ha’amāuruuru nei au i te Atua nō te mau tamari’i mai teie ’e nō te mau metua e feruri māite nei i tā rātou fafaura’a ’ia riro ’ei metua parau ti’a ’e te ’ōpua rahi—inaha pauroa te mau metua, te mau ’orometua ’e te mau melo e amo nei i te mau hōpoi’a teimaha ’e tē tāvini ato’a nei rātou ma te hina’aro pāpū. ’Oia ho’i ē, ’ua māuruuru roa ’ino vau nō ’outou tāta’itahi.

’O te Fatu te pēperu rahi

’A haere ’āmui ai tātou i mua, tē ani nei au ia ’outou ’ia feruri i te huru ari’i tā te Fatu e fa’atere nei i tāna ’Ēkālesia. ’Ia fa’aru’e mai te hō’ē peresideni o te ’Ēkālesia, ’aita e parau ’aro nō ni’a i te ta’ata e mono i ni’a i terā pārahira’a. ’Aita e mā’itira’a, ’aita e porititara’a, ’o te ’ohipa marū noa nō te fa’anahora’a hanahana o te monora’a tā te Fatu iho i tu’u mai.

Te mahana tāvinira’a tāta’itahi o te hō’ē ’āpōsetolo, e mahana ha’api’ira’a ïa ’e te fa’aineinera’a nō te hōpoi’a rahi atu ā ananahi. E ’ahuru matahiti tāvinira’a nō te hō’ē ’āpōsetolo nō te haere mai te pārahira’a ta’ata ’āpī roa a’e i te pārahira’a ta’ata maoro roa a’e i roto i te menemenera’a. I roto i terā tau, e roa’a iāna iho te ’ite o te mau hi’ora’a ta’a ’ē i te ’ohipa a te ’Ēkālesia. E mātau ato’a mai ’oia i te mau ta’ata o te ao, tō rātou ’ā’ai, te ta’ere ’e te reo, ’a tono-pinepine-hia ai ’oia nā te ao ato’a nei. E mea ta’a ’ē mau roa teie ’ohipa monora’a i roto i te fa’aterera’a o te ’Ēkālesia. Tā’u i ’ite, ’aita e mea mai te reira. ’Eiaha tātou e hitima’ue, inaha ’o teie te ’Ēkālesia a te Fatu. ’Aita ’oia e rave nei mai te au i te ravera’a a te ta’ata.

’Ua tāvini au i roto i te pupu nō te Tino ’Ahuru Ma Piti i raro a’e e pae Peresideni o te ’Ēkālesia. ’Ua hi’o vau i te peresideni tāta’itahi i te fāri’ira’a i te heheura’a ’e i te pe’era’a i terā heheura’a. ’Ua ha’api’i ’e ’ua fa’auru noa te Fatu i tāna mau peropheta, e nā reira noa ’oia. ’O te Fatu te pēperu rahi. E tāmau noa mātou nei tei fa’atōro’ahia nō te fa’a’ite pāpū i tōna i’oa mo’a nā te ao nei, ’ia ’imi ’ia ’ite i tōna hina’aro ’e ’ia pe’e i te reira.

Fa’aea i ni’a i te ’ē’a nō te fafaura’a

I teienei, i te melo tāta’itahi o te ’Ēkālesia tē parau nei au, e tāmau noa i ni’a i te ’ē’a nō te fafaura’a. Nā tō ’outou pūpūra’a ia ’outou i te pe’era’a i te Fa’aora nā roto i te ravera’a i te mau fafaura’a i mua iāna ’e te ha’apa’ora’a i te reira mau fafaura’a, nā te reira e ’īriti i te ’ōpani nō te ha’amaita’ira’a pae vārua ato’a ’e te faufa’a e vai ra nō te ta’ata, te vahine ’e te tamari’i i te mau vāhi ato’a.

’Ei peresidenira’a ’āpī, ’ua hina’aro mātou e ha’amata ma te hope’a i te ferurira’a. Nō reira mātou e paraparau atu ai ia ’outou mai te hō’ē hiero atu. Te hope’a tā tātou tāta’itahi e tūtava nei, ’o te fāri’ira’a ïa i te mana i roto i te hō’ē fare o te Fatu, ma te tā’atihia ’ei ’utuāfare, ma te ha’apa’o maita’i i te mau fafaura’a i ravehia i roto i te hiero ’o te fa’aineine ia tātou nō te hōro’a rahi roa a’e a te Atua—’o te ora mure ’ore. E mea faufa’a roa ’ino te mau ’ōro’a o te hiero ’e te mau fafaura’a tā ’outou i rave i reira nō te ha’apūai i tō ’outou orara’a, tō ’outou fa’aipoipora’a ’e te ’utuāfare ’e te ’aravihi ’ia pāto’i i te ’arora’a a te ’enemi. E riro tā ’outou ha’amorira’a i roto i te hiero ’e tā ’outou tāvinira’a i reira nō tō ’outou hui tupuna i te ha’amaita’i ia ’outou ma te heheura’a rahi a’e nō ’outou iho ’e ma te hau ’e e ha’apūai te reira i tā ’outou pūpūra’a ia ’outou nō te fa’aea i ni’a i te ’ē’a nō te fafaura’a.

I teienei, mai te peu ’ua haere ’outou i rāpae i te ’ē’a, tē ani nei au ma te pūai ato’a o tō’u ’ā’au ’ia ho’i mai. Ta’a ’ē noa atu te māna’ona’ora’a ’e te fifi, tē vai nei te pārahira’a nō ’outou i roto i teie ’Ēkālesia, te ’Ēkālesia a te Fatu. E ha’amaita’ihia ’outou ’e te mau u’i i muri mai e tā ’outou mau ’ohipa i teie taime nō te ho’i i ni’a i te ’ē’a nō te fafaura’a. E mea poihere tō tātou Metua i te Ra’i i tāna mau tamari’i, ’ua hina’aro ’oia ia rātou tāta’itahi ’ia ho’i mai iāna. ’O te hō’ē fā rahi teie nō Te ’Ēkālesia a Iesu Mesia i te Feiā Mo’a i te mau Mahana Hope’a Nei—te tauturura’a ia tātou tāta’itahi ’ia ho’i i te fare.

Tē fa’atae atu nei au i tō’u here rahi ia ’outou—e here tei rahi noa mai i roto i terā nau ’ahurura’a matahiti fārereira’a ia ’outou, i te ha’amorira’a ’e ’outou ’e i te tāvinira’a ia ’outou. Tā tātou fa’aue hanahana, ’o te haerera’a ïa i te mau fenua atoʼa, i te mau nūnaʼa atoʼa, i te mau reo atoʼa, ʼe i te mau taʼata atoʼa nō te tauturu i te fa’aineinera’a i te ao nō te tae-piti-ra’a mai o te Fatu. E rave tātou i te reira ma te fa’aro’o i te Fatu ia Iesu Mesia, ma te ’ite ē, ’o ’ōna terā e fa’atere ra. ’O teie tāna ’ohipa ’e tāna ’Ēkālesia. E tāvini tātou nāna.

Tē fa’a’ite atu nei au i tō’u pūpūra’a iā’u i te Atua tō tātou Metua mure ’ore ’e i tāna Tamaiti, ’o Iesu Mesia. ’Ua ’ite au ia rāua, ’ua here au ia rāua, ’e te ’euhe nei au e tāvini ia rāua—’e ia ’outou—e pau noa atu tō’u aho ora. I te i’oa mo’a o Iesu Mesia ra, ’āmene.