Ինչպես խաղաղություն գտնել դժվար պահերին մեր և ուրիշների համար

Ըստ Ալեքս Հյուգիի և Ասպեն Ստենդերի

Եկեղեցու ամսագրեր

Ահա ութ եղանակ՝ ինչպես զգալ խաղաղությունը, երբ կյանքը ծանր է դառնում:

Ֆոնը և նկարը՝ Getty Images-ի

Երբեմն կյանքը մեզ գլխիվայր շուռ է տալիս և փոխում մեր կյանքի հունը: Դուք կարող եք մտահոգվել ընտանեկան կամ առողջական իրավիճակով, դպրոցում առկա խնդիրներով կամ այսօր աշխարհում տիրող բազմաթիվ անհանգստացնող իրադարձություններով: Ինչպե՞ս կարող ենք անհանգիստ աշխարհում գտնել անձնական խաղաղություն: Անկախ նրանից՝ խաղաղության պակասը գալիս է ձեր վերահսկողությունից դուրս գտնվող իրադարձություններից, թե այնպիսի բաներից, որոնց դուք կարող եք միջամտել և փոխել, ահա մի քանի գաղափարներ, որոնք կօգնեն ձեզ գտնել ներքին խաղաղություն Հիսուս Քրիստոսի միջոցով:

Ինքներդ ձեզ համար խաղաղություն գտնելու 4 եղանակ

1. Կենտրոնացեք հավերժական բաների վրա

   Դժվար է խաղաղություն զգալ, երբ դուք կենտրոնացած եք միայն կարճաժամկետ խնդիրների վրա: Բայց եթե կենտրոնանաք մեծ պատկերի՝ Աստծո երջանկության ծրագրի վրա, կարող եք գտնել խաղաղություն, իմանալով, որ այն, ինչն անհանգստացնում է ձեզ այս պահին, հավերժ չի լինելու: Օրինակ, տաճարը օգնում է մեզ կենտրոնանալ հավերժության վրա: Նախագահ Գորդոն Բ. Հինքլին (1910–2008) ասել է, որ տաճարում «դուք կզգաք խաղաղություն, որն ուրիշ ոչ մի տեղ չեք գտնի»:¹

2. Մոռացեք այն, ինչը դուք չեք կարող վերահսկել

   Երբ ձեր վերահսկողությունից դուրս ինչ-որ բան խլում է ձեր խաղաղությունը, հուսահատություն կամ զայրույթ զգալու գայթակղություն է առաջանում: Բայց դա չի օգնում, եթե ոչինչ չես կարող փոխել: Փոխարենը, մոտեցեք Փրկիչին ներքին խաղաղություն գտնելու համար, նույնիսկ այն ժամանակ, երբ կյանքը ձեզ հետ վատ է վարվում: Նա խոստացել է ուղարկել ձեզ մոտ Մխիթարիչին՝ Սուրբ Հոգուն (տես Հովհաննես 14.26–27):

3. Ներեք մյուսներին

   Հաճախ ամենադժվար բանը բացասական զգացումը մոռանալն է այն դեպքում, երբ ինչ-որ մեկը սխալ է վարվել ձեր հետ: Բայց Տասներկու Առաքյալների Քվորումից Երեց Դիտեր Ֆ. Ուխդորֆն ուսուցանել է. «Մենք կստանանք ներման ուրախությունը մեր կյանքում, երբ կամենանք այդ ուրախությունը պատճառել ուրիշներին: … Արդյունքում Տիրոջ Հոգին կլցնի մեր հոգիները ուրախությամբ, որի հետ կգա նաև խղճի աստվածային հանգստությունը» (տես Մոսիա 4.2–3):² Եթե դառնաք դեպի Փրկիչը, դա կօգնի ձեզ ազատվել զգացմունքային բեռից և լցվել խաղաղությամբ:

4. Ապաշխարեք և ապավինեք Քրիստոսին

   Անկախ նրանից, թե ձեր կյանքում ինչն է լավ ընթանում, մեղքի բեռը միշտ խլելու է ձեր խաղաղությունը: Երբեմն մեր եպիսկոպոսի օգնությամբ մենք կարող ենք լիարժեք ապաշխարել: Սակայն մենք բոլորս պետք է պարբերաբար ապաշխարենք և Հիսուս Քրիստոսի Քավության միջոցով մաքրվենք այն ամենից, ինչը խանգարում է, որ ավելի նմանվենք Նրան:

4 եղանակ՝ ինչպես օգնել, որ մյուսները խաղաղություն գտնեն

1. Կիսվեք Հիսուս Քրիստոսի ավետարանով

   Ինչպես մենք կարող ենք խաղաղություն գտնել մեզ համար՝ կենտրոնանալով Փրկիչի վրա, այնպես էլ կարող ենք ուրիշներին ուղղել դեպի Նա, որպես «խաղաղության հիմնադիր» (Մոսիա 15.18): Օրինակ, փորձեք կիսվել սուրբ գրության հատվածով կամ գերագույն համաժողովի ուղերձներից մեջբերումով, որն օգնել է ձեզ ավելի շատ բան իմանալ Հիսուս Քրիստոսի մասին:

2. Եղեք խաղաղարար

   Օգնեք ձեր ընկերներին կամ եղբայրներին ու քույրերին հարթել վիճաբանությունները: Ալմայի գրքի Անթի-Նեփի-Լեքիացիների նման մենք կարող ենք թաղել մեր պատերազմի զենքերը, օրինակ՝ բամբասելու, վրեժխնդրություն փնտրելու կամ եսասեր լինելու զենքերը, և փոխարինենք դրանք խաղաղության, սիրալիր խոսելու, Աստծո պատվիրաններին հնազանդվելու և մյուսներին ներելու գործիքներով (տես Ալմա 24.19):

3. Եղեք լավ ունկնդիր

   Երբեմն մարդիկ, ովքեր դժվարությունների մեջ են, կարիք ունեն բաց խոսելու իրենց մտքերի և զգացմունքների մասին, իրենց ներսում պահելու փոխարեն: Մենք չպետք է լուծենք խնդիրները նրանց փոխարեն, բայց մենք կարող ենք պարզապես լսել իրենց մտահոգությունները և աջակցություն ցուցաբերել, ցույց տալով Քրիստոսանման սեր և հասկացողություն:

4. Սպասավորեք ձեր ծխի կամ համայնքի մարդկանց

   Դուք կարող եք կամավոր լինել ծառայելով անօթևան մարդկանց, ձեր հասակակիցների դասապատրաստման հարցում կամ ձեր հարևանությամբ տեղափոխված նոր ընտանիքին քաղցրավենիք մատուցելով: Օգնեք մարդկանց խաղաղություն գտնել փոքր բաներում: Ունենալով ուտելու և քնելու կայուն հարմարություն, վստահելի ուսուցիչ կամ փոքրիկ երաշխիք, որ ինչ-որ մեկը հոգ է տանում, կարող է մեծ նշանակություն ունենալ:

Հիսուսն ասել է այս մխիթարության խոսքերը բոլոր նրանց, ովքեր ձգտում են խաղաղություն գտնել. «Խաղաղություն եմ թողում ձեզ, իմ խաղաղությունն եմ տալիս ձեզ. ոչ թե ինչպես աշխարհքն է տալիս՝ ես տալիս եմ ձեզ. Ձեր սիրտը չխռովի եւ չվախենայ» (Հովհաննես 14.27): Եթե ինքներս մեզ և ուրիշներին ավելի մոտեցնենք Հիսուս Քրիստոսին, մենք խաղաղություն կգտնենք նույնիսկ այն ժամանակ, երբ կյանքը ծանր է դառնում:

Հղումներ

1. Գորդոն Բ. Հինքլի, in “Rejoice in the Blessings of the Temple,” Liahona, Dec. 2002, 33.

2. Դիտեր Ֆ. Ուխդորֆ, «Ապահով վերադարձի կետ», Լիահոնա, մայիս 2007, 101: